Қазіргі кезде микро және шағын бизнес субъектілерін тексеруге 3 жылдық мораторий жалғасып жатыр. Үкімет басшысы Асқар Мамин осылай мәлімдеді, деп хабарлайды Inbusiness.kz.
Арнайы салық режимін қолданатын шағын және орта бизнес субъектілері табыс салығынан босатылғанын еске салған премьер-министр елімізде жаңа арнайы салық режимі қолданылатын қызмет түрлерінің тізбесі анықталғанын жариялады.
"Бұл шаралар кәсіпкерлердің 3 жылда шамамен 400 млрд теңгені өз бизнесін кеңейту мен дамытуға жұмсауына мүмкіндік береді. Бұған қоса, Мемлекет басшысы Қасым-Жомарт Кемелұлы Тоқаевтың тапсырмасы бойынша осы жылғы 1 қаңтардан бастап ерікті түрде қолданылатын, жаңа арнайы салық режимі – бөлшек салық енгізілді. Салық мөлшерлемесі табыстың 3%-ы мөлшерінде белгіленді. Үкімет бұл режим қолданылатын қызмет түрлерінің тізбесін анықтады. Тізбеге пандемия кезінде карантиндік шектеу шаралары қолданылған қызметтер енгізілді", – деді Асқар Мамин.
Үкімет басшысы бұл бастама шағын және орта бизнес субъектілерінің салық жүктемесін азайту және салық пен төлемдерді бюджетке төлеу тәртібін оңтайландыру мақсатында дағдарысқа қарсы шара ретінде 2 жылға есептелгенін баяндады.
"Жеке тұлғалардың салық міндеттемесін орындауын жеңілдету үшін биылдан бастап мүлік және жер салығы бір төлемге біріктірілді, көппәтерлі үйлердің иелеріне жер салығы салынбайтын болды", – деді Асқар Мамин.
Қанат Махамбет
