Алтыншы тур аясында "Каспий" "Оқжетпесті" 2:1 есебімен ұтты. Ақтаулықтар грузин бапкері Кахабер Цхададзе қызметінен босатылғаннан кейін алғашқы ойынын өткізді. Шабуылшы Георгий Панцулай мен Рубен Бригидоның голдары "Каспийге" ҚПЛ-ның ағымдағы маусымындағы алғашқы ұпайларын алуға мүмкіндік берді. "Оқжетпес" сапынан жалғыз голды Руслан Болов соқты. Бұған дейін "Каспий" бес матч қатарынан жеңіліп, осыған байланысты Кахабер Цхададзе қызметінен кеткен болатын. "Оқжетпеске" қарсы ойында бас бапкердің міндетін атқарушы Евгений Тарасов болды. Қазақстан құрамасының бұрынғы шабуылшысы және "Зенит" академиясының жаттықтырушысы биылғы жылы клубта Ақтауда жұмыс істей бастады. Жақын арада Фархадбек Ирисметовтың орнына спорт директоры қызметіне Тарасов ауысып, "Каспийдің" бас бапкері қызметіне Македония құрамасының бұрынғы жаттықтырушысы Игор Ангеловский келеді деп күтілуде.
Айта кетейік, "Каспий" "Оқжетпесті" жеңгеннен кейін Қазақстан чемпионатында қоржынында ұпайы жоқ команда қалмады.
"Қайсар" Қазақстан премьер-лигасының алтыншы туры аясындағы сырт алаңда "Жетісуды" жеңіп (2:0) чемпионат көшбасшыларының қатарына енді. Қызылордалықтар сапынан беларусиялық жартылай қорғаушы Дмитрий Бородин дубль авторы атанды. Ол бірінші таймның соңында қарсылас қақпасын дәл көздесе, кездесудің екінші жартысында пенальтиден мүлт кеткен жоқ. "Қайсар" үшін бұл маусымдағы үшінші жеңіс. Виктор Кумыковтың шәкірттері он ұпай жинап, турнир кестесінде көш бастап тұр. Ал "Ақтөбе", "Тобыл" және "Ордабасының" ұпай саны бірдей, бірақ алтыншы турдағы матчтарын әлі өткізген жоқ.
ҚПЛ алтыншы турында "Шахтер" өз алаңында "Мақтааралды" 3:0 есебімен ұтты. Игорь Солошенко шәкірттері бірінші таймда айтарлықтай артта қалды. Үзіліске дейін қарағандылықтар сапынан Юрий Перцух, Иван Свиридов және Егор Алишаускас мергендігімен көзге түсті. Кездесудің екінші бөлігінде қонақтар он ойыншымен қалды. Қырғызстан құрамасының жартылай қорғаушысы Одилжон Абдурахманов 68-минутта қызыл қағаз алды. "Шахтер" үшін бұл жаңа маусымдағы дебюттік жеңісі. Алты турдың қорытындысы бойынша кеншілердің еншісінде төрт ұпай бар. Ал "Мақтаарал" Қазақстан чемпионатындағы бесінші кездесуінде ұтылып отыр.
Бүгін, 16 сәуірде премьер-лига командалары арасында футболдан Қазақстан чемпионатының алтыншы турының төрт ойыны өтеді. Елорда уақытымен сағат 15:00-де Павлодарда "Ақсу" "Қызыл-Жарды" қабылдайды. Сағат 17:00-де "Ақтөбе" - "Атырау" басталса, сағат 19:00-де елордада "Астана" - "Қайрат" кездесуі өтеді. Ал 21:00-де "Ордабасы" мен "Тобыл" Шымкентте өзара мықтыны анықтайтын болады.
