Қазақстандықтар Александр Бублик пен Андрей Голубев жұптық сында Аустралия ашық чемпионатының екінші айналымына шықты, деп хабарлайды ҚТФ баспасөз қызметі. Қазақстандық жұп алғашқы айналымда италиялық Сальваторе Карузо – фин Эмил Руусувуоримен күш сынасты. Бірінші партия тағдыры тай-брейкте қазақстандықтардың пайдасына шешілді – 7:6 (8:6). Бублик пен Голубев екінші сетте де есесін жіберген жоқ – 7:5. Бәсеке 1 сағат 30 минутқа созылды. Қазақстандық жұп екінші айналымда осы "Үлкен дулыға" турнирінің 1-ракеткалары, колумбиялықтар Хуан-Себастьян Кабаль – Роберт Фарахпен шеберлік байқасады.
Әлемнің 28-ракеткасы Юлия Путинцева екінші айналымда дүниежүзілік рейтингте 67-орында тұрған бельгиялық Элисон Ван Эйтванкпен шеберлік байқасты. Қарсыластар бұған дейін үш мәрте кездесіп, бәрінде де Юлия жеңіске жеткен болатын. Бірінші партияда есеп 3:3 болған мезетте қазақстандық теннисші брейк жасай алды. Содан кейін сетке доп бергенде, қателескен жоқ – 6:4. Есесіне екінші сетте бельгиялық спортшы брейкпен алға шықты – 2:0. Тағы бір брейк – 4:0. Ақыры ол сол басымдылығын сақтап қалды – 6:1. Үшінші, шешуші партияда қазақстандық теннисші брейкпен алға кетті – 3:1. Ақыры ол матчты тағы бір брейкпен түйіндеді – 6:2. Тартысты бәсеке 1 сағат 55 минутқа созылды.
Путинцева үшінші айналымда әлемнің 5-ракеткасы, украиналық Элина Свитолина немесе рейтингте 48-сатыдағы АҚШ-тың жас жұлдызы, 16 жастағы Кори Гауффтың біреуімен кортқа шығады.
Ермұхамед Мәулен
