/img/tv1.svg
RU KZ
DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 376,04 Brent 36,55
Қазақ құрамасы қалпақпен ұрылмас

Қазақ құрамасы қалпақпен ұрылмас

Қазақстан құрама командасы Ресеймен ойынның соңғы минутында гол жіберіп алды. Дегенмен, құрамамыздың ойыны жаман емес.

03:34 10 Қыркүйек 2019 1895

Қазақ құрамасы қалпақпен ұрылмас

Автор:

Ермұхамед Мәулен

Өз жерінде өткізген Әлем чемпионатынан соң тұралап қалған Ресей құрамасы әбден ісіп-кеуіп еді. Шотландияны сырт алаңда жеңіп кеткен соң, ЕУРО 2020 додасына шықтық деп мәлімдей бастаған. Енді тек Қазақстан құрамасын қалпақпен ұрып аламыз деп көлгірсігенін де байқадық. Алайда ойынның алғашқы бөлігі олай болмады. Қазақстан құрамасы әдетіне басып қорғанысқа қамалып алды. 6 қорғаушы, 3 жартылай қорғаушы және бір шабуылшымен алаңға шыққан Михал Билектің көксегені тең ойын екені анық байқалды.

89-минут бойы шыдас беріп, соңғы бір минут қалғанда қақпасына гол жіберіп алған Қазақстан құрамасының ойыншыларының жағдайын түсінуге болады. Бірақ, бұл матчта ұлттық құрамамыз бірде бір бұрыштама добын көтермей, дені сау соққы да жасай алмады. Қарсылас команда матч бойына 10 бұрыштама көтерді. Шеберлігі шабандап қалған ресейлік футболшылардың деңгейі түсінікті. Сондықтан да, Ресеймен терезесі тең ойнауымыз таңқаларлық емес.

Бас бапкер осы жуырда ғана құрамаға алдыртқан қорғаушы Александр Марочкин бірнеше қателік жасады. Абзал Бейсебековтің де орнына шығатын өзге ойыншы жоқ сияқты. Кипрмен болған ойында қатты шаршап қалған футболшылардың екінші ойынға шықпағаны әсерін берді. Ал жас футболшы Айбол Әбікеннің болашағы зор футболшы екені көрінді. Бас бапкер Исламханды негізгі құрамға қойып, Абат Айымбетовті сәл ертерек шығарғанында бәлкім басқаша көрінер ме едік. Дегенмен, чехиялық маманның тактикасы да түсінікті. Топтың фаворитіне қарсы ашық ойын көрсете алмайды. Бірақ, ортадағы ойыншыларды күшейтіп, қарымта шабуылдар жасап отырудың да ретін қарастырған дұрыс еді.

Дегенмен, 7 ұпаймен Қазақстан құрамасы топтағы 3-орында тұр. Кипр құрамасы Сан-Мариноны жеңіп, ұпай саны бойынша теңесті. Дегенмен, ЕУРО 2008 додасында жинаған 10 ұпайлық рекордымыздың осы жолы мұрты бұзылатын сыңайлы.

Ресей - Қазақстан - 1:0

Гол: Марио Фернандес 89

Ермұхамед Мәулен

Тегтер:

euro 2020

Михал Билек: Қазақ футболшылары шетелде ойнау керек

Қазақстан - Бельгия матчы 0-2 есебімен қонақтардың пайдасына шешілді. Жеңілістің себебін бас бапкер Михал Билек түсіндірді. 

14 Қазан 2019 01:08 2664

Михал Билек: Қазақ футболшылары шетелде ойнау керек

– Өткен жолы Қазақстан құрамасы Бельгиядан ірі есеппен жеңілген еді. Ал бұл жолғы ойынға көңіліңіз тола ма?

– Мен жеңіліспен аяқталған ойынға ешқашан көңілім толған емес. Дегенмен футболшыларым тапсырманы орындағысы келді. Алаңда жандарын аямай өнер көрсетті. Мен сол үшін оларға алғыс айтқым келеді. Бельгия Әлемнің үздік командасы екенін ұмытпауымыз қажет. 

 Азар, Мертенс секілді бельгиялық ойыншылардың деңгейі қазақ футболшыларына қарағанда анағұрлым жоғары. Біздің ойыншылардың да деңгейі өсуі үшін не істеу керек?

– Ең алдымен, қазақстанның ойыншылары шетелдің біріншіліктерінде ойнауға тиіс. Мысалы, Ресей чемпионатына барып ойнауға болады. Сосын қазақ командалары Еурокубокте көбірек ойнаса. Сонда деңгей көтеріледі, тәжірибие де жинақтайды. 

 Ойыннан соң Бельгия қорғаушысы Томас Менье Исламхан Қазақстан премьер-лигасында ойнайды дегенге сенбейтінін айтты. Ол футболшының деңгейі Еуропа біріншіліктерінде ойнауға жетеді дегенді айтты. Сіз қалай ойлайсыз?

– Иә, Исламхан біздің құраманың маңызды футболшысы. Қазақстандағы ең үздік ойыншы. Ол бүгін шабуылшының қызметін де атқарды. Мен оның Еуропаның Топ лигаларының бірінді ойнағанын қалаймын. 

Ермұхамед Мәулен

Қателесетін қорғаныс, сылбыр қимылдайтын шабуыл

Қазақстан Кипр құрамасына өз алаңында жеңілді. Кім жауапты, кінәні кім мойнына алады?

10 Қазан 2019 23:10 2652

Қателесетін қорғаныс, сылбыр қимылдайтын шабуыл

«Астана Аренада» Қазақстан құрамасы жақсы өнер көрсетеді, ойындарын жеңілмейді деген қағиданың беріктігіне балта шабылғандай болды. Себебі ешқандай букмекерлік кеңсе, сараптау орталықтары Кипр командасы Қазақ елінің бас командасын Нұр-Сұлтан қаласына келіп тұрып жеңеді деп ойламаған. Оның үстіне алғашқы ойында отандастарымыз Кипр аралына барып тең ойнап келді. Өз алаңымызда жеңіске жетеміз деп топшылағанымыз өтірік емес еді. 

Бірінші таймның соңғы он минутын Қазақстан футболшылары керемет өткізді. 34-минутта Темірлан Ерланов есеп ашып, жанкүйер көңілін шат-шадыман қылды. Екінші таймның да басым бөлігін шабуылда өткіздік. Құрамамыз қайта-қайта шабуылдап, қарсыласты қақпасына тықсырды. Бірақ қорғаныстағы Ян Вораговскийдің шаршағаны байқалды. Соның қателігінен қақпамызға бірінің артынан бірі екі гол енді. Бас бапкер Михал Билек бұл ойыншының орнына Абзал Бейсебековты шығарады деп күткен едік, болмады. Шабуыл шебіндегі Сергей Хижниченконың қимылдары тым сылбыр болды.

Жеңіп тұрған матчты бас-аяғы 15 минуттың ішінде түбегейлі жеңіле салу қазақ жанкүйерлеріне ауыр тиді. Команда футболшыларының да жай-күйі белгілі. Дегенімен бас бапкердің ойыншыларды дер кезінде шығармай, кешеуілдеткенінің себебін ешкім түсінбеді. Әлбетте, команданың жеңілісіне бірінші кезекте чех маманы Михал Билек жауап беретіні анық. Алайда бар жауапкершілікті Исламбек Қуат өзіне алды.

Топ ішінде 3-орынға таласамыз деген болжамымыз бордай тозды. Енді Бельгиямен, сонымен қатар сыртта Шотландиямен болатын матчтарда ұпай алу қиынның қиыны. Негізгі бәсекелес Кипрден жеңілуіміз құрама командамыздың аспандап тұрған армандарын жерге бір-ақ түсірді. Қателесе беретін қорғаныс, сылбыр қимылдайтын шабуылмен ұзаққа бармасымыз анық.

Ермұхамед Мәулен