Парижде өтіп жатқан Олимпиада ойындарында АҚШ құрамасы жалпы медальдар саны 100-ге жуықтап қалды, деп хабарлайды inbusiness.kz сайты.
Қазіргі уақытта АҚШ құрамасының еншісінде 27 алтын, 35 күміс, 32 қола медаль бар. Әзірге олар Париж Олимпиадасынан жалпы 94 медаль иеленіп, жеке дара көш бастап келеді.
Ал Қытай құрамасының қоржынында 25 алтын, 23 күміс, 17 қола медаль бар. Жалпы медальдар санын 65-ке жеткізді.
Үздік үштікті әзірге Аустралия құрамасы түйіндеп тұр. Оларда 18 алтын, 12 күміс, 11 қола (41) медаль бар.
Ал Париж Олимпиадасында 1 алтын, 3 күміс, 3 қола (7) медаль жеңіп алған Қазақстан спортшылары әзірге 28-орынды қанағат тұтты. Осылайша Париж Олимпиадасынан медаль алған елдер саны 72-ге жетті.
Ал Олимпиада қожайындары Франция құрамасы әзірге төртінші орында келеді. Олардың еншісінде 13 алтын, 17 күміс, 21 қола (51) медаль бар. Жалпы Олимпиада алтынына 48 мемлекет, күміске 63 ел, ал қолаға 72 ел қол жеткізді.
Естеріңізге сала кетсек, Франция астанасы Париж қаласында өтіп жатқан XXXIII жазғы Олимпиада ойындары 11 тамызда мәресіне жетеді.
