Ауыр атлет Нұрғиса Әділетұлы Эр-Риядта өтіп жатқан Ислам ынтымақтастығы ойындарында 94 кг салмақта жұлқа көтеру, серпе көтеру және қос сайыс бойынша чемпион атанды.
Жұлқа көтеруде Нұрғиса 175 кг көтеріп, 2025 жылғы әлем чемпионатының күміс жүлдегері, ирандық Алиреза Мойениден төрт келіге озып кетті. Қазақстандық спортшы 183 келіде бақ сынап көрді. Бірақ бұл салмақ бағынбады. Айта кетейік, әлем рекорды 182 кг. Оны дәл осы Мойени орнатқан.
Серпе көтеруде Әділетұлы 205 кг-нан бастады. Кейін 210 кг-ға өтініш берді. Алғашқы мүмкіндігі есепке алынбады. Алайда екінші мүмкіндігі сәтті болды. Екінші орын египеттік Карим Ибрахим Али Абокахлада (206 кг), ал үшінші орын — Мойениде (203 кг).
Қос сайыс нәтижесі мынадай: Нұрғиса Әділетұлы — 385 (175+210), Алиреза Мойени — 374 (171+203), Карим Ибрахим Али Абокахла — 370 (164+206).
Сондай-ақ қазақстандық тағы бір ауыр атлет Аянат Жұмағали Эр-Риядта өтіп жатқан Ислам ынтымақтастығы ойындарында қола жүлде алды.
Аянат 77 келі салмақта серпе көтеруде 128 кг нәтижемен үшінші орынға ие болды.
