Арменияның Ереван қаласында еркін күрестен ересектер арасындағы халықаралық турнир аяқталды, деп хабарлайды inbusiness.kz сайты.
Қазақстан құрамасы жарысты сегіз медальмен қорытындылады.
Бірінші жарыс күнінде 86 келіге дейінгі салмақта Асхаб Хаджиев финалда 2025 жылғы әлем чемпионы америкалық Захид Валенсияны 12:11 есебімен жеңіп, алтын медаль алды. Осы салмақта Рүстем Мырзағалиев қола жүлдегер атанды.
65 келіге дейінгі салмақта Өсімжан Дастанбек күміс, Әділ Оспанов қола медаль жеңіп алды. Ал 74 келіге дейінгі салмақта Дархан Есенғали үшінші орынға ие болды.
Екінші жарыс күнінде Мейрамбек Қартбай 61 келіге дейінгі салмақта күміс медаль еншіледі. Ернұр Нұрғазы (70 келіге дейін) және Диас Сағдатов (79 келіге дейін) қола жүлдеге ие болды.
Осылайша, Қазақстан құрамасы Армениядағы турнирді нәтижемен аяқтады.
