Дүниежүзілік рейтингіде 208-орында тұрған Бейбіт Жұқаев әлемнің 127-ракеткасы, сербиялық Хамад Меджедовичті жарыс жолынан тайдырды. Қазақстандық теннисші бірінші сетте 6:7 (3:7) есе жібергенімен, камбэк жасай білді – 7:5, 6:4. Екі сағат 21 минутқа созылған тартысты матчта Бейбіт эйс санын 27-ге жеткізіп, 4 брейк-пойнттың тең жартысын мүлт жіберген жоқ.
Тағы бір қазақстандық, әлемнің 229-ракеткасы Тимофей Скатов рейтингіде өзінен 100 саты жоғары тұрған словакиялық Лукас Клейнді қапы қалдырды – 7:6 (10:8), 7:6 (7:5). Іріктеу сайыстарының финалында Бейбіт Жұқаев әлемнің 223-ракеткасы, франциялық Кентен Галимен, Тимофей Скатов рейтингіде 111-орындағы Чили өкілі Кристиан Гаринмен шеберлік байқасады.
Әйелдер арасында рейтингіде 967-орындағы Зарина Дияс сенсация жасап, әлемнің 138-ракеткасы, америкалық Сачия Викериді жеңіп кетті – 3:6, 7:5, 7:5. Зарина Дияс іріктеу кезеңінің финалында әлемнің 92-ракеткасы, қытайлық Чжосюань Бай немесе рейтингіде 194-сатыдағы таиландтық Ланлана Тарарудидің қай жеңгенімен таласады.
Әлемнің 132-ракеткасы Кукушкин іріктеу кезеңінің жартылай финалында дүниежүзілік рейтингіде 152-орында тұрған франциялық Бенджамин Бонзидің мысын басты. Қазақстандық теннисші қарсыласынан 6:4, 7:5 есебімен басым түсті. Ю Михаил Кукушкин іріктеу сайыстарының финалында әлемнің 70-ракеткасы, тағы бір франциялық Юго Гастонмен кездеседі.
Әлемнің 163-ракеткасы Евсеев рейтингіде 133-орындағы франциялық Титуан Дрогенің меселін қайырды – 6:4, 7:6 (7:3). Денис Евсеев әлемнің 179-ракеткасы, бельгиялық Зизу Бергспен ойнайды.
