Қазақ қоғамын қақ жарған үйлену тойы қаржы бақылаушылардың назарына да ілікті, деп хабарлайды inbusiness.kz сайты.
Қос жұп осы уақытқа дейін ресми некеде болса да, дәстүрлі той өткізбеген еді. Сондықтан да, Ерболат жарының "ақ көйлек кисем" деген арманын орындап, тосынсый ретінде үлкен мерекелік кеш ұйымдастырған. Той ауқымы шоу-бизнес жұлдыздарына лайықты деңгейде өтті.
Тойға Қайрат Нұртас, Мот (Матвей Мельников), Тұрар Ыдырыс, Amre сынды шоу-бизнес жұлдыздары мен танымал блогерлер қатысты. Десек те, ең көп талқыланғаны – құны 40 миллион теңге тұратын торт. Кейбір деректе оның бағасы 47 миллион теңге екені де айтылады.
Әлеуметтік желі қолданушыларының дәл осы тортқа келгенде пікірі қарама-қайшы келді. "Өз ақшасы, қалай жұмсаса да өз еркі" дегендер болса, кейбірі мұндай аста-төк тойдың Рамазан айымен тұспа-тұс келгенін сынап жатты. Олардың уәжі "Ораза айында мұқтаждарға көмектескені дұрыс еді" дегенге саяды.
Той видеосы желілерде жарияланған соң, тағы бір мәселенің "төбесі" көрінді. Ол – соңғы айларда БАҚ бетінен түспеген салық мәселесі. Салық органдарының блогерлердің тойын, қымбат көлігін, қаламақысын бақылап жүргені жасырын емес.
Блогер Біржан Әшім "Мен видеоға түспесем де, осындай контенттен кейін салық органдары мені тексереді" деп жазған Ғани Әжікеновке: "Салық органдары да бұл видеоны көріп отыр ғой?" деп ескертті.
Сайлаубек Ерғазы: "Құрметті салық комитеті! Мені қонаққа да шақырмады. Ал жас жұбайларға бақыт тілеймін" деп салық қызметіне тікелей үндеу тастады.
Шыны керек, кей блогерлер салықтан қорқып, бизнесін жапса, енді бірі бар табысын несиемен байланыстырғанын мойындайды. Айталық, блогер Жеңіс Омаров, яғни Zheka есімімен көпке танымал блогер тойын банк көмегімен жасағанын айтқан.
Ал актриса Дарья Александрова салық қарызы жайлы қате хабардан кейін ауруханаға түсіп, дүкенін жабуға мәжбүр болған.
Репутация және жеке бренд бойынша сарапшы Фатима Қосаева аталған жайтқа қатысты былайша пікір білдіріп отыр.
– Шоу-бизнес өкілдері үшін мұндай той – назар аудартудың бір амалы. Егер бұл мемлекеттік қызметкер не бизнесмен болса, қоғам тарапынан қатты сын туады, – деді ол.
Ал медиасарапшы Махаббат Есен "Экономикалық қиындықтар белең алып тұрған уақытта мұндай аста-төк іс-шаралар қоғамда теріс реакция тудырады. Жұртшылық оны шындықтан алшақтау, жұртты менсінбеу деп қабылдауы мүмкін" дейді.
Сарапшылардың пайымынша, той ақылмен жасалса, PR құралы болуы да мүмкін. Мысалы, тойдың бір бөлігін қайырымдылықпен байланыстыру не болмаса, қонақтардан сыйлық орнына қайырымдылық жасауын сұрау сияқты қадам қоғам тарапынан оң бағаланар еді.
"Мұндайда бастысы – шынайылық пен ашықтық. Әйтпесе, халықтың сенімін жоғалтып алуыңыз мүмкін", – деп қоса кетті Махаббат Есен.
Кейбір сарапшы мұндай тойды "мереке кезіндегі масқара" деп сипаттаса, екіншісі "бұл – медиа тұлғаның хайп арқылы аудитория тартуы" деп есептейді.
Махаббат Есеннің сөзінше, кезінде табысымен "мақтанған" бірқатар блогер бүгінде "бәрі несие арқылы болды" деп ақталып жүр. Бұл – қоғамның реакциясын ескермеудің салдары.
Аталған мәселеге орай Қаржы министрлігі Мемлекеттік кірістер комитетінің өкілі Гүлжан Кәлменова да пікір айтты.
– Біз барлық азамат үшін камералдық бақылау жүргіземіз. Оның арасында блогерлер де бар, – деп түсіндірді ол Inbusiness.kz-ке берген сұхбатында.
Қалай десек те, Жанәбіловтердің тойы жай ғана мереке емес. Бұл оқиға қоғамдағы әлеуметтік теңсіздік, рухани құндылықтар мен мемлекеттік бақылау тақырыптарын ашып көрсетті. Қоғамды қақ жарды деуіміздің сыры – осыда.
