Бухарестте (Румыния) ATP-250 сериялы турнирі өтіп жатыр. Қазақстандық теннисші Тимофей Скатов (ATP 174) жекелей сында алғашқы айналымдағы матчын өткізді.
Тимофей Скатовтың алғашқы қарсыласы Швейцариядан келген атақты теннисші, әлемнің бұрынғы үшінші ракеткасы, 40 жастағы Стэн Вавринка болды.
24 жастағы қазақстандық спортшы Бухарест турнирінің негізгі кезеңіне іріктеу арқылы өткен еді. Алайда “Үлкен дулыға” турнирлерінің үш дүркін чемпионынан 4:6, 7:6 (7:5), 6:7 (1:7) есебімен жеңіліп қалды.
Вавринка мен Скатов арасындағы матч 3 сағат 16 минутқа созылды.
Келесі кезеңде Вавринка испаниялық Педро Мартинеспен кездесетін болды.
Осылайша, Вавринка биылғы маусымда ATP деңгейіндегі алғашқы жеңісіне қол жеткізді. Бұдан бөлек, Стэн ATP турнирінің негізгі кезеңінде 40 жастан кейін топырақта (грунт) матч жеңген тарихтағы үшінші ойыншы атанды.
Бұған дейін мұндай жетістікке тек америкалық Джимми Коннорс (41 жасында) және хорват Иво Карлович (40 жасында) қол жеткізген еді.
