Елена Рыбакина Australian Open турнирінің 1/8 финалында америкалық Мэдисон Кизге есе жіберді. Матчтың қорытынды есебі – 3:6, 6:1, 3:6.
Жеңіліске қарамастан, Рыбакина маусымның басында жоғары деңгейдегі ойын көрсетті және әзірге live-рейтингте әлемнің бесінші ракеткасы мәртебесін сақтап қалуда. Алайда, оның рейтингі Эмма Наварро мен Дарья Касаткинаның нәтижелеріне байланысты өзгеруі мүмкін.
Ал, Мэдисон Киздің келесі матчы Элина Свитолинамен өтеді. Украиналық спортшы Вероника Кудерметованы сенімді түрде жеңді. Теннис жанкүйерлерін жартылай финалға жолдама үшін өтетін тартысты матч күтіп тұр.
Сонымен бүгін жарыстың тоғызыншы күні қазақстандық тоғызыншы теннисші турнирді аяқтады. Ал біз олардың қанша табыс тапқанын санап көрейік.
Елена Рыбакина – 420 000 аустралиялық доллар (138,55 миллион теңге), өз отандастары арасында ең табысты нәтиже көрсетіп, сәйкесінше ең көп сыйақы алды. Ол 1/8 финалда жарыс жолын аяқтады.
Анна Данилина – 27 000 аустралиялық доллар (8,9 миллион теңге). Жұптық сайыс бойынша еліміздің үздік теннисшісі әйелдер арасында (жұп) бірінші айналымда күтпеген жерден жеңіліп, ал микстте екінші айналымға жетті.
Александр Недовесов – 20 000 аустралиялық доллар (6,59 миллион теңге). 37 жастағы теннисші ерлер арасындағы жұптық сында бақ сынады. Бірақ бірінші айналымнан әрі аса алмады.
Тимофей Скатов, Дмитрий Попко, Михаил Кукушкин – әрқайсысы 35 000 аустралиялық доллар (11,54 миллион теңге). Үш қазақстандық теннисші де жекелей сында іріктеу кезеңінде өнер көрсетті. Бірақ барлығы бірінші айналымда жарыстан шығып қалды. Дегенмен әрқайсысы бір сәтсіз ойын үшін де тиесілі жүлдесін алды.
Александр Бублик және Александр Шевченко – әрқайсысы 152 000 аустралиялық доллар (50,14 миллион теңге). Қос теннисші жұптық сында да, жекелей сында да өнер көрсетті.
Юлия Путинцева – 310 000 аустралиялық доллар (102,26 миллион теңге). Теннисшіміз Australian Open турнирінде жекелей сында үшінші айналымға дейін жетті. Ал жұптық сайыста 1-кезеңнен кейін жарыс жолынан шығып қалды. Осылайша, қазақстандық теннисшілер Аустралия ашық чемпионатын табысты аяқтады.
