Қазақстанның бірінші, әлемнің 21-ракеткасы Елена Рыбакина Истбурн (Ұлыбритания) WTA 500 турнирінің екінші айналымына шықты, деп хабарлайды ҚТФ баспасөз қызметі.
Қазақстандық теннисші бастапқы кездесуін дүниежүзілік рейтингте 141-орында тұрған ұлыбританиялық Хэрриет Дартпен өткізді. Бірінші партияда Рыбакина сенімді ойнай білді - 6:2. Екінші сетте Дарт брейкпен алға шыққанымен, Елена таразы басын теңестірді. Бірақ тай-брейкте Дарттың жолы болды - 7:6 (7:5). Үшінші, шешуші партияда Рыбакина жеңісті жұлып алды - 6:4. Тартысты бәсеке 2 сағат 20 минутқа созылды. Матч барысында Рыбакина 22 брейк-пойнттың алтауын пайдаланды. Қарсыласы үш брейкпен шектелді. Рыбакина жүлде қоры 565 мың АҚШ долларынан асатын доданың ширек финалына шығу үшін әлемнің 5-ракеткасы, украиналық Элина Свитолинамен таласады. Ол дәл осындай тартысты кездесуде әлемнің 33-ракеткасы, испаниялық Паула Бадосаны ұтты.
Сонымен қатар Қазақстанның бірінші, әлемнің 39-ракеткасы Александр Бублик Истбурн (Ұлыбритания) ATP 250 турнирін жеңіспен бастады. Бублик алғашқы айналымда негізгі додаға іріктеу сайыстарынан кейін қосылған отандасы, дүниежүзілік рейтингте 106-орында тұрған Михаил Кукушкинмен кездесті. Бұған дейін қарсыластар бір-ақ рет шеберлік байқасып, онда Кукушкиннің мерейі үстем болған екен. Бұл жолы Бублик ойын тізгінін бірден қолына алып, 6:1, 6:4 есебімен жеңіске жетті.
Бір сағатқа жуық уақытқа созылған матчта Бублик 18 эйс, 4 брейк жасады. Қарсыласы бір брейкке ғана қол жеткізді. Бублик ширек финалға шығу үшін әлемнің 72-ракеткасы, Беларусь өкілі Егор Герасимовпен таласады.
Тағы бір қазақстандық Дмитрий Попко Уимблдон турнирінің іріктеу сайысында латвиялық Эрнест Гулбистен 3:6, 7:5, 4:6 есебімен жеңіліп қалды.
Ермұхамед Мәулен
