XDS Astana Team командасының велошабандозы Макс Кантер Бельгиядағы "Омлууп ван хет Хутланд" біркүндік жарысында жүлделі екінші орынға ие болды. Жарыс спринтпен аяқталып, Кантер Еуропа чемпионы Тим Мерлирге ғана есе жіберді. Үшінші болып мәреге Арне Марит келді.
"Жарыс күні қиын әрі күтпеген жағдайларға толы болды, соның ішінде жел тұрған учаскелер де әсер етті. Иван Смирнов пен Глеб Сырица әрдайым қасымда болып, мені қорғап жүрді. Сол себепті финалға жеткілікті күш сақтай алдым. Соңғы екі айналымда пелотоннан бірнеше шабуыл жасалды. Оларды бақылау оңай болған жоқ. Евгений Федоровтың шабуылы жақсы болды. Ол алға кеткен кезде мен топта болдым. Кейін Кейс Бол да шабуыл жасады. Ақырында, мәреге жақындағанда Глеб мені алға шығарып берді, содан кейін соңғы 200 метрде шабуыл жасауға ыңғайлы орынды іздедім. Спринтте барымды салдым және мәреге екінші болып келдім", – деді Макс Кантер.
XDS Astana Team командасы жарыстың соңғы бөлігін өте белсенді өткізді. Алдымен Қазақстан чемпионы Евгений Федоров мықты шабуыл жасады. Бұл талпыныс сәтсіз аяқталған соң, Кейс Бол алға шықты. Ол екі рет топтан озып, тек мәреге 1,5 шақырым қалғанда оны пелотон қуып жетті.
Айта кетейік, "Омлууп ван хет Хутланд" бұл Бельгияда, Батыс Фландрия аймағында тас жолдарда жыл сайын өтетін біркүндік велодода. Жарыс Эренгем қаласынан басталып, негізінен жазық жолдарда өтеді. Әдетте жеңімпаз спринтте анықталады.
2007 жылдан бастап UCI Europe Tour күнтізбесіне енгізілген және 1.1 санатына ие.
Биыл біркүндік жарыс 24 қыркүйекте ұйымдастырылып, шамамен 199 шақырымды құрады. Ол UCI 1.1 санатындағы ерлер арасындағы элиталық дода ретінде өтті.
