Қазақстан құрамасының, сондай-ақ елордалық XDS Astana Team командасының өкілі Евгений Федоров Таиландта өтіп жатқан Азия чемпионатында жекелей жарыста алтын медаль жеңіп алды.
Ол 42,8 шақырым жарыс жолын 49 минут 12 секундта еңсерді.
Федоров жарыс аяқталған соң Азия чемпионатына қатысты пікір білдірді.
"Қазақстан үшін алтын медаль жеңіп алғаныма өте қуаныштымын! Жекелей жарыс мен үшін маусым басындағы ең басты мақсаттардың бірі болды. Ақпан айының басына қарай бабыма келуге тырыстым. Осылайша, Қазақстанды Азия чемпионатында лайықты түрде көрсету үшін дайындалдым. XDS Astana Team командасымен бірге желтоқсан және қаңтар айларында екі нәтижелі оқу-жаттығу жиынын өткіздік. Бүкіл маусымға қажетті негізді қалыптастыру үшін үлкен жұмыс атқардық. Содан кейін командаммен бірге "АльУла Турына" қатыстым. Ондағы жер бедері мен ауа райы Азия чемпионатына дайындалуға өте қолайлы болды. Бүгінгі өзімді жақсы сезіндім. Жарыс жолы оңайға соқпады және ұзақ болды. Соған қарамастан барлығы ойдағыдай өтіп, жеңіске жеттім. Бұған дейін мен Азия чемпионатында "жекелей жарыста" үш рет жеңіске жеттім. Бүгін чемпиондық атағымды қорғап, Қазақстанға тағы бір алтын медаль әкелгеніме қуаныштымын", – деді Евгений Федоров.
Евгений Федоров қатарынан төрт рет Азия чемпионы атанған алғашқы шабандоз атанды.
Бұған дейін ол 2022, 2023 және 2024 жылдары аталмыш жарыста жеңіске жеткен. Мұндай жетістікке қазақстандық Андрей Мизуров (1995, 1999, 2006, 2010) пен қырғызстандық Евгений Вакер (2007, 2008, 2011, 2012) ғана (бірақ қатарынан емес) қол жеткізген.
Сонымен қатар, тағы бір қазақстандық шабандоз Дмитрий Груздев те жекелей сында күміс медаль иеленді. Ол жарыс жолын 50 минут 25 секундта еңсерді.
