Мемлекеттік кірістер комитетінің ресми мәліметіне сәйкес, 2025 жылдың қаңтар-қыркүйек айларында Қазақстан 56 млн 40,3 мың тонна шикі мұнай экспорттап, одан 29 млрд 696 млн 184,9 мың доллар кіріс түсірген. Оның ішінде 7,4 млн тоннасы қыркүйек айында жөнелтілген.
Биылғы көрсеткіш былтырғы кезеңмен салыстырғанда көлем жағынан 2,2 млн тоннаға көп, бірақ түсім көлемі төмен.
Нақтырақ айтқанда, 2024 жылдың 9 айында ел 53 млн 811,9 мың тонна мұнай экспорттап, 32 млрд 829 млн 748,06 мың доллар табыс тапқан болатын.
2025 жылы экспортталған 56 млн тонна мұнайдың ішінде:
- 1,4 млн тоннасы – Германияға,
- 3,7 млн тоннасы – Грекияға,
- 2 млн тоннасы – Испанияға,
- 22 млн тоннасы – Италияға,
- 2,7 млн тоннасы – Қытайға,
- 7,7 млн тоннасы – Нидерландыға,
- 3,8 млн тоннасы – Румынияға,
- 1,1 млн тоннасы – Сингапурге,
- 2 млн тоннасы – Түркияға,
- 3,7 млн тоннасы – Францияға,
- 1,4 млн тоннасы – Швейцарияға жөнелтілген.
Оның ішінде:
- Германияға жөнелтілген мұнай көлемі былтырғы 9 аймен салыстырғанда 221,4 мың тоннаға,
- Испанияға – 698,2 мың тоннаға,
- Қытайға – 226,3 мың тоннаға,
- Нидерландыға – 2,2 млн тоннаға,
- Румынияға – 798,8 мың тоннаға,
- Түркияға – 583,4 мың тоннаға артқан.
Ал Грекия (-122,1 мың тонна), Италия (-965,4 мың тонна), Сингапур (-199,6 мың тонна), Франция (-354,5 мың тонна) және Швейцария (-137,2 мың тонна) Қазақстан мұнайының импорт көлемін былтырғы кезеңмен салыстырғанда азайтқан.
