Өткен жылы бұл міндетті Әзербайжан атқарған болатын. Төрағалықтың ауысуы 8 қаңтар күні Астанада өткен TCCI үшінші Бас ассамблеясы барысында жүзеге асты, деп хабарлайды inbusiness.kz сайты.
Бұл кезең Қазақстанның Түркі мемлекеттері ұйымына мүше елдермен саудасының тұрақты өсімімен сәйкес келді.
"QazTrade" Сауда саясатын дамыту орталығының мәліметінше, 2025 жылдың қаңтар-қазан айларының қорытындысы бойынша Қазақстан мен Түркі мемлекеттері ұйымына мүше елдер арасындағы тауар айналымы 10,4 млрд АҚШ долларын құрады. Бұл өткен жылдың сәйкес кезеңімен салыстырғанда шамамен 11 пайызға жоғары. Өсімнің негізгі үлесі экспортқа тиесілі.
Экспорт 17 пайызға артып, 7,6 млрд долларды құрады. Ал импорт керісінше 2,8 млрд долларға дейін төмендеді. Нәтижесінде, сауда балансы жақсарып, профицит 4,8 млрд долларға жетті.
QazTrade бас директоры Айтмұхаммед Алдажаров бұл динамика түркі елдерінің нарықтарында қазақстандық өнімге тұрақты сұраныс бар екенін көрсететінін атап өтті.
Экспорттың өсуі бидай, мыс, мұнай, күнбағыс майы, металл өнімдері, сондай-ақ агроөнеркәсіп кешені мен тамақ өнеркәсібі өнімдерін жеткізу есебінен қамтамасыз етілді. Бұл ретте ең жоғары өсім өңделген өнімдерге тиесілі болды. Бұл экспорт құрылымының жоғары қосылған құны бар тауарлар жағына қарай біртіндеп өзгеріп келе жатқанын көрсетеді.
Табиғи газ және кейбір жартылай фабрикаттар сияқты жекелеген шикізат тауарларының жеткізілімінің төмендеуін QazTrade теріс үрдіс емес, құрылымдық қайта құрудың бір бөлігі ретінде қарастырады.
Түркі мемлекеттері ұйымына мүше елдермен сауданың негізгі бөлігі Түркия, Өзбекстан, Қырғызстан және Әзербайжанға тиесілі. Бұл бағыттар жалпы тауар айналымының шамамен 96 пайызын құрайды. Мұндай шоғырлану логистиканың жақындығымен, орнықты сауда байланыстарымен және болжамды сұраныспен түсіндіріледі.
"2026 жылы Қазақстанның Түркі сауда-өнеркәсіп палаталары одағына төрағалық етуі бізге Одақтың экономикалық күн тәртібін қалыптастыруға мүмкіндік береді. Бұл – халқының жиынтық саны 160 миллионнан асатын түркі елдерінің нарықтары, онда қазақстандық өнімге тұрақты сұраныс бар екенін көріп отырмыз. Негізгі назар – өндірушілер арасындағы кооперацияны кеңейту және компаниялар арасында тікелей B2B-байланыстар құру", – деді QazTrade бас директоры Айтмұхаммед Алдажаров.
