Халықаралық үстел теннисі федерациясы жариялаған жаңартылған әлемдік рейтинг қазақстандық жанкүйерлер үшін жағымды жаңалық әкелді. Ел намысын халықаралық аренада қорғап жүрген Кирилл Герасименко бірден 19 орынға жоғарылап, 74-сатыдан 55-орынға көтерілді.
Айтарлықтай серпіліс спортшының беделді "WTT Singapore Smash" турниріндегі сәтті өнерінің арқасында жүзеге асты. Герасименко жарыс барысында төрт қарсыласын айқын басымдықпен жеңіп, 1/16 финалға дейін жетті. Нәтижесінде ол 100 рейтингтік ұпай еншілеп, әлемдік рейтингтегі жағдайын едәуір жақсартты.
Айта кетейік, енді қазақстандық теннисшіні жаңа сынақ күтіп тұр. 2 наурыз күні Германияның Дюссельдорф қаласында "WTT Feeder Düsseldorf" турнирі басталды. Аталған жарысқа Еуропа, Азия және Америка құрлықтарының үздік спортшылары қатысуда.
Қазақстан құрамасы бұл додаға мықты құраммен аттанды. Ел намысын Кирилл Герасименкомен қатар Дастан және Айдос Кенжигуловтар, Санжар Жұбанов, Искендер Харки, Ирисбек Артукметов, Бақдәулет Әкімали, Сарвиноз Миркадирова қорғауда.
