Сингапурда өтіп жатқан халықаралық үстел теннисі турнирінде Қазақстан құрамасының көшбасшысы Кирилл Герасименко сәтті өнер көрсетті.
1/16 финалда отандасымыз әлемнің үшінші ракеткасы, екі дүркін Әлем кубогының иегері, Азияның үш дүркін чемпионы Линь Шидунмен (Қытай) кездесті. Тәжірибесі мол әрі титулға бай қытайлық спортшы бұл ойында 3:0 есебімен жеңіске жетіп, 1/8 финалға жолдама алды.
Дегенмен, Кирилл Герасименко турнир барысында жоғары деңгейдегі ойын өрнегін көрсетті. Ол жалпы есепте 100 рейтингтік ұпай жинап, төрт сенімді жеңіске қол жеткізді. Атап айтқанда, румыниялық Овидиу Ионескуды 3:1, швециялық Маттиас Фалькты 3:1, бельгиялық Сендрик Нюйтинкті 3:2 және англиялық Том Джарвисті 3:0 есебімен тізе бүктірді.
Бұл ұпайлар Кирилл Герасименконың әлемдік рейтингтегі орнын нығайтуға мүмкіндік берді.
