Көпбалалы аналарға өмірбойы жәрдемақы төленеді

Көпбалалы аналарға өмірбойы жәрдемақы төленеді

Вице-министр жұмыс беруші кімдермен еңбек шартын бұза алмайтынын айтты.

09 Шілде 2019 17:01 27628

Көпбалалы аналарға өмірбойы жәрдемақы төленеді

Автор:

Қанат Махамбет

Inbusiness.kz тілшісінің ана мен балаға төленетін әлеуметтік төлемдер қалай индекстеледі, қандай санаттағы адамдар әлеуметтік көмек алады, үкімет кімдерге сатып алу құқығынсыз тұрғын үйді жалға береді деген сұрақтарына Еңбек және халықты әлеуметтік қорғау вице-министрі Ақмади Сарбасов жауап берді.

«Ана мен балаға төленетін барлық әлеуметтік төлемдер жыл сайын инфляция деңгейіне сәйкес индекстеледі. Аналарға бала тууына байланысты біржолғы жәрдемақы беріледі. Оның мөлшері туу тәртібіне байланысты бекітіледі. Биыл бірінші, екінші, үшінші бала туғанда берілетін жәрдемақы мөлшері – 95 950, төртінші және одан да көп балаға 159 075 теңгені  құрап отыр. Соңғы 3 жылда бұл жәрдемақының мөлшері 38%-ға өсті. Бұдан бөлек, жұмыс істейтін және жұмыс істемейтін аналарға 1 жасқа дейінгі балаға күтім жасау үшін әлеуметтік қолдау көрсетіледі. Егер баланың анасы жұмыс істемесе, онда бала туылғаннан кейін, оған ай сайын төленетін 1 жасқа дейінгі балаға күтім жасау жәрдемақысы беріледі. Жәрдемақының мөлшері 14 444 теңгеден 22 473 теңгеге дейінгі аралықта болады. 2018 жылдың қорытындысы бойынша мұндай жәрдемақыны 125 мыңнан астам адам алды. Соңғы 3 жылда бұл жәрдемақының мөлшері 19%-ға өсті. Егер баланың анасы жұмыс істесе және оған әлеуметтік аударымдар түскен болса, онда ол мемлекеттік әлеуметтік сақтандыру қорынан әлеуметтік төлем алады. Біріншіден, жүктілігі мен босануы бойынша төлем, оның мөлшері соңғы 12 айда әйелдің орташа айлық кірісіне байланысты. Өткен жылдың қорытындысы бойынша мұндай төлемнің орташа мөлшері 391 170 теңгені құрады; екіншіден, соңғы екі жылдағы орташа айлық кірістің 40% мөлшерінде 1 жылға дейінгі балаға күтім жасау ақысы. Бұл төлемнің орташа мөлшері 2018 жылы 32 361 теңгені құрады. 2018 жылы жалпы сомасы 165 млрд теңгеге ана мен бала жағдайына мемлекеттік әлеуметтік сақтандыру қорынан 400 мыңға жуық ата-ана төлем алды. Бұдан басқа мемлекет әлеуметтік аударымдарды есептеу кезінде ескерілетін орташа айлық табыстың 10% мөлшерінде міндетті зейнетақы жарналарын субсидиялайды. Бұл әйел босану демалысында болғанда зейнетақы жинақтарын тоқтатпауы үшін жасалады», – деді вице-министр.  

Ақмади Сарбасовтың сөзінше, жұмыс істейтін әйелдердің құқықтары мен кепілдіктері еңбек заңнамасымен қорғалады.

«Жүкті әйелдермен, 3 жасқа дейінгі балалары бар әйелдермен, 14 жасқа дейінгі баланы (18 жасқа дейінгі мүгедек баланы) тәрбиелеп отырған жалғызбасты аналармен, аталған балалар санатын анасыз тәрбиелеп отырған өзге де адамдармен еңбек шартын жұмыс берушінің бастамасы бойынша бұзуға жол берілмейді. Өз ісін ашқысы келетін әйелдер үшін елімізде әйелдер кәсіпкерлігін қолдаудың түрлі бағдарламалары жүзеге асырылуда. 2018 жылы жұмыспен қамтуды және жаппай кәсіпкерлікті дамытудың бағдарламасы бойынша 3033 әйелге шағын несие берілді және 1 243 әйел 100 АЕК көлемінде жаңа бизнес-идеяларды дамытуға грант алды», – деді министрдің орынбасары.

Ақмади Сарбасовтың айтуынша, «Алтын алқа» және «Күміс алқа» алқаларымен марапатталған немесе бұрын «Батыр ана» атағын алған, I және II дәрежелі «Ана даңқы» ордендерімен марапатталған көпбалалы аналарға ай сайынғы мемлекеттік жәрдемақы төленеді. Бұл жәрдемақы өмірбойы төленеді, яғни зейнеткерлікке шыққаннан кейін де  беріледі және оның табысына байланысты болмайды. Жыл сайын осы жәрдемақыны төлеуге 45 млрд теңгеге жуық қаражат бөлінеді.

«Алтын алқа» және «Күміс алқа» алқаларымен марапатталған көпбалалы аналар бірқатар салық төлемдері мен мемлекеттік баж төлеуден босатылады.

4 және одан да көп кәмелетке толмаған балалары бар көпбалалы отбасыларға 2018 жылдың 1 қаңтарына дейін тағайындалған арнайы мемлекеттік жәрдемақы төленеді. Өткен жылы 271 мың отбасы 32,8 млрд теңгеге осындай жәрдемақы алды. Зейнетақымен қамтамасыз етуге қатысты 5 және одан да көпбала туып, оларды 18 жасқа дейін тәрбиелеген аналар 53 жасында зейнетке шығу құқығына ие. Сонымен қатар 2018 жылдың 1 шілдесінен бастап Елбасының тапсырмасы бойынша 18 жастан асқан бала кезінен бірінші топтағы мүгедекке күтім жасау бойынша жәрдемақы енгізілді. Өткен жылы оны 11,5 мың адам алды. 2019 жылы жәрдемақы мөлшері 31 183 теңге (1,05 АЕК) құрады, ал 2019 жылғы 1 шілдеден бастап 41 578 теңгені құрайды», – деді вице-министр.

Үкіметтен әлеуметтік көмек алатын отбасылар 5 санатқа жіктелген екен. Бұл туралы Ақмади Сарбасов: «Елімізде мемлекеттік жәрдемақы жүйесі, әлеуметтік жәрдемақы жүйесі, жұмысқа орналасуға жәрдемдесу шаралары мен салықтық жеңілдіктерді қамтитын көпбалалы отбасыларға қолдау көрсетудің кешенді үлгісі жасалды. Сәйкесінше, бір жасқа дейінгі балалары бар аналар мен отбасыларға, көпбалалы отбасыларға,  мүгедектігі бар бала бағып отырған отбасыларға, аз қамтылған отбасыларға, асыраушысынан айырылған және балаларды қамқорлыққа немесе қамқоршылыққа алған отбасыларға өмірінің барлық кезеңінде қолдау көрсетілетін болды. Отбасыларды әлеуметтік қолдау жүйесі әртүрлі өмірлік жағдайларды қамтамасыз етеді», – деп жауап берді.

Вице-министр индустрия және инфрақұрылымдық даму министрлігінің мәліметін алға тарта отырып, халықтың әлеуметтік осал топтары үшін сатып алмай жалға берілетін тұрғын үй құрылысына 2019 жылы республикалық бюджеттен 32,8 млрд теңге қарастырылғанын, жоспар бойынша 4,5 мың пәтер салу көзделіп отырғанын мәлімдеді.

«2019 жылға арналған республикалық бюджетті нақтылау шеңберінде Елбасының Nur Otan партиясының XVІІІ съезінде берген тапсырмасын іске асыру мақсатында аз қамтылған көпбалалы отбасылар үшін сатып алмай, жалға берілетін тұрғын үй салуға және сатып алуға қосымша 50 млрд теңге бөлінген. Жалпы осы іс-шараға 2025 жылға дейін 350 млрд теңге сомасында қаражат бөлу жоспарлануда. Бұл жыл сайын 6 мың аз қамтылған көпбалалы отбасыларды пәтермен (2025 жылға дейін 40 мыңнан астам пәтер) қамтамасыз етуге мүмкіндік береді. Сонымен қатар Елбасының тапсырмаларын іске асыру мақсатында Тұрғын үй құрылыс жинақ банкі арқылы көпбалалы отбасыларға, мүгедек балалары бар немесе осындай бала тәрбиелеп отырған отбасыларға, толық емес отбасыларға жылдық 2% 20 жылға дейінгі мерзімге бастапқы жарна 10% - дан бастап жеңілдетілген несие беру енгізілген. Аталған механизмді жүзеге асыру асыру үшін 3 жыл ішінде 150 млрд теңге қажет, жыл сайын 50 млрд теңгеден. 2019 жылға арналған республикалық бюджетті нақтылау шеңберінде 50 млрд теңге қарастырылған. Жыл сайын 6 мың несие беру жоспарланып отыр (3 жыл ішінде 18 мыңға жуық несие). Тұтастай алғанда, берілген қаражат әрбір отбасы үшін қолайлы өмір сүру жағдайының қосымша әсерін және қол жетімділігін қамтамасыз етеді, олардың өмір сүру жағдайларын жақсартады», – деп қорытты ойын Ақмади Сарбасов.

Қанат Махамбет

inbusiness.kz-ті қараңыз, оқыңыз :

«Қазпошта» АҚ басшысы карантин кезінде зейнетақы мен жәрдемақы қалай берілетінін түсіндіреді

42 500 теңге алу үшін «Қазпошта» арқылы экспресс-карта ашуға болады.  

07 Сәуір 2020 14:30 1210

«Қазпошта» АҚ басшысы карантин кезінде зейнетақы мен жәрдемақы қалай берілетінін түсіндіреді
Карантин кезінде пошташылар мен курьерлердің қызметіне сұраныс артқан екен. «Қазпошта» акционерлік қоғамы осы сұранысты қанағаттандыру үшін мобильді қосымшасын жетілдіріп, сайтына түрлі онлайн қызметтердің үлгісін жүктеп жатыр. Ұлттық пошта операторының басшысы Сәкен Сәрсенов тікелей эфир арқылы сол қызметтердің негізгілеріне тоқталды

«Біздің сайт  (http://post.kz/ ред) пен мобильді қосымшамыз арқылы сәлемдемелерді үйге жеткізуге, курьерді шақырып, жөнелтімді алып кетуге тапсырыс беруге болады. Сонымен қатар коммуналдық немесе басқа да төлемдерді төлеуге, мемлекеттік органдармен хат алмасуға мүмкіндік бар. Елдегі жағдайға қарамастан, барлық пошташы мен курьер поштаны, хаттар мен газеттерді штаттық режимде жеткізуде. Біздің  қызметкерлер күн сайын маршруттарына шығып, сіздерге қызмет көрсетеді. Сондықтан олардың еңбектеріне құрметпен қарауды, олармен  қауіпсіз қарым-қатынас ережелерін сақтауларыңызды сұраймын», – деген акционерлік қоғамның басқарма төрағасы зейнетақыны үйге алдыру үшін қайда хабарласу керектігін түсіндірді.  

«Біздің сайтта төлем карталары мен зейнетақыны үйге жіберу бойынша өтініштер  рәсімдейтін жедел байланыс нөмірлері жарияланған», – деді ол. 

«Қазпошта» басшысы сәуір айының зейнетақысы қалай төленетінін де түсіндірді. 

«Қолайсыз эпидемиялық жағдай кезінде «Қазпошта» қазақстандықтардың үйден шықпай қызмет алуы үшін барлығын жасауда. Қазір қозғалыстың шектелуіне байланысты біз бұрын пошта бөлімшесіне зейнетақы алу үшін келетін барлық зейнеткерге сәуір айының зейнетақыларын үйлеріне жеткізіп беріп жатырмыз. Қалғандарына төлем карталарын ашып, ақшаларын сол картаға аударып, карталарды үйлеріне жеткізіп беріп жатырмыз», – деген ұлттық оператор басшысы зейнетақыны карантин біткеннен кейін поштаға келіп алуға да болатынын жеткізді. 

«Еңбек  және халықты әлеуметтік қорғау министрлігімен бірге 1-15 сәуір аралығында зейнетақыны үйге жеткізу кестесін бекіттік. Сол кесте бойынша бүгінгі күні 389 572 зейнеткердің үйіне зейнетақысын жеткізіп, 6 мыңға жуық зейнеткерді төлем карталарына көшірдік. Біздің зейнетке шыққан клиенттеріміздің қатарында карантин біткен соң, зейнетақыларын бөлімшеге келіп алғылары келетіндер де бар. Біз олармен үнемі байланыста боламыз», – деді ол. 

Атышулы 42 500 теңгені алу үшін «Қазпошта» арқылы да құжат рәсімдеуге болады.  Ал төтенше жағдай кезінде көмек ретінде берілген бұл ақшаны салық органдары мен жеке сот орындаушылар бұрынғы берешек үшін алып қоя алмайды. Сәкен Сәрсенов карантин кезінде табысынан айырылған азаматтарға осындай маңызды ақпаратты жеткізді.

«Өздеріңіз білетіндей, Президенттің тапсырмасымен табыссыз қалған азаматтарға ай сайын 42500 теңге көлемінде әлеуметтік көмек аударыла бастады. Осыған байланысты біз барлық бөлімшелерімізде, соның ішінде ауылдық жерлерде экспресс-карталар мен ағымдағы шоттар ашып, БЖТ-ны қабылдап жатырмыз. Ұлттық банктің түсіндірулері бойынша осы жәрдемақыны алу үшін арнайы шоттар ашудың қажеті жоқ. Бұл жәредамақыны банктер, салық органдары, сот атқарушылардың алып қоюға құқықтары жоқ. Кез келген банктің немесе «Қазпоштаның» карта шоттарын пайдалануға болады. Ұлттық пошта операторының басшысы ретінде қайталап айтқым келеді. Ешкім олардың қаражаттарын ұстауға құқылы емес. Уәкілетті мемлекеттік органдардың түсіндірулері бойынша кез келген ағымдағы шотты қолдануға болады», – деген басқарма төрағасы БЖТ-ны үйден шықпай-ақ төлеу мүмкіндіктері туралы айтты. 

«Соңғы алты күнде 42500 теңгелік төлемнің аясында біз 237 мың адамға қызмет көрсеттік. Жетінші сәуірдегі соңғы мәлімет бойынша «Қазпошта» арқылы 126 204 шот ашылды. 163 129 мың адам БЖТ төледі. БЖТ-ны  онлайн төлеу мүмкіндігі туралы барлық нұсқау «Қазпоштаның» әлеуметтік желілердегі парақшаларында және біздің сайтта орналастырылған. Сізге ыңғайлы болуы үшін Post.kz сайтында  шотты онлайн ашып, виртуалды карта шығару қызметін іске қосу мүмкіндігін қарастырып жатырмыз.  Оның іске қосылғаны туралы қосымша хабарлаймыз», – деді ол. 

  

Есжан Ботақара

15 баласы бар отбасыға 159 мың теңге төленеді

Биыл ана мен баланы қолдауға 559 млрд теңге бөлінді.   

17 Ақпан 2020 11:18 1563

15 баласы бар отбасыға 159 мың теңге төленеді

Еңбек және халықты әлеуметтік қорғау министрлігінің алқа отырысында 2020 жылдың 1 қаңтарынан бастап көпбалалы отбасыларға табысына қарамай төленіп жатқан мемлекеттік жәрдемақының тағайындалу тәртібіне өзгеріс енгізілетіні жарияланды. 

Министр Біржан Нұрымбетов алдағы уақытта 8 және одан көп баласы бар отбасылар мемлекеттік жәрдемақыны бала санына қарай алатынын айтты. 

«Қазіргі уақытта 7 баладан әрі қарай біркелкі мөлшерде жәрдемақы жоқ. Сондықтан енді 8 және одан көп баласы бар отбасыларға да біркелкі жәрдемақы беру қарастырылды. Мысалы, 8 балаға - 85 мың теңге, 10 балаға - 106 мың теңге, 15 балаға - 159 мың теңге төленеді», – деді министр.

Естеріңізге салайық, қаңтар айынан бастап кәмелетке толмаған төрт және одан да көп балалары, оның ішінде 23 жасқа дейін студент балалары бар отбасыларға төленетін мемлекеттік жәрдемақы көлемі 4 балаға – 42 496 теңге, 5 балаға – 53 127 теңге, 6 балаға – 63 757 теңге, 7 және одан көп балаға – 74 388 теңге болып бекітілген. 8 және одан көп баласы бар отбасыларға  – 74 388 теңге тағайындалған болатын. Олар бұдан артық ақша алмайтын. 

Министрдің мәлімдеуінше, бүгінгі таңда 370 мың көпбалалы отбасы табысына қарамай мемлекеттік жәрдемақы алып отыр. 

«Былтыр ана мен баланы қолдауға 372 млрд  теңге бөлінді. Биыл бұл мақсатқа 559 млрд теңге қарастырылды. Көпбалалы отбасыларды қолдау көлемін әлі де көбейту керек деп ойлаймыз. Жәрдемақының түрлері мен оны төлеудің мерзімін ұлғайтуды қарастырып жатырмыз», – деді Біржан Нұрымбетов.

Қанат Махамбет

inbusiness.kz-ті қараңыз, оқыңыз :

Жаңалықтарға жазылу: