/img/tv1.svg
RU KZ
Hang Seng 23 182,08 KASE 2 209,51
FTSE 100 5 415,50 РТС 1 049,88
DOW J 21 056,82 Бидай 551,40
Коронавирус: 31 қаңтардағы соңғы жаңалықтар

Коронавирус: 31 қаңтардағы соңғы жаңалықтар

ДДҰ әлемдік деңгейдегі төтенше жағдай жариялады. 

31 Қаңтар 2020 16:03 19921

Коронавирус: 31 қаңтардағы соңғы жаңалықтар

Автор:

Табиғат Нұрболат

Осы күнге дейін 9000-ға жуық қытайлық, 90 шетелдік азамат вирусты жұқтырған. Осы орайда Дүниежүзілік денсаулық сақтау ұйымының директоры Тедрос Аданом Гебреисус ақыры Қытайдағы коронавирусқа қатысты ахуалды әлемдік деңгейдегі төтенше жағдай деп таныды. Бұл туралы Қытайдың CGTN басылымы хабарлады. Оның айтуынша, енді вирусқа қарсы күрес күшейе түсіп, осы орайда әлем елдері бірлесіп әрекет етеді. Сондай-ақ саяхат және сауда қатынастарына шектеу жасалады.

Италияда екі қытайлық туристің жаңа коронавирус жұқтырғаны тіркелді. Елдің премьер-министрі Джузеппе Конти осындай мәлімдеме жасады. Бұл – Италиядағы алғашқы жағдай. Қазір екі науқас та ауруханада оқшауланған бөлмеде жатыр. Екеуінің де денсаулығы қалыпты жағдайда. Ескере кететін жайт, денсаулық сақтау саласының кейбір мамандары вирус мутацияға ұшырауы мүмкін деген пікір білдіріп отыр. 28 қаңтарда Гонконг ғалымдары оған қарсы вакцинаны тапқан болатын. Бірақ сынақтан өткізу үшін біраз уақыт керек екенін мәлім етті. 

Коронавирус тарап кеткен елдер: Италия, АҚШ, Таиланд, Франция, Германия, Канада, Үндістан, Австралия, Финляндия, Непал, Вьетнам, Камбоджа, Жапония, Оңтүстік Корея,Малайзия, Сингапур, Филиппин, Шри-Ланка, Тайвань, БАӘ.

Оңтүстік Кореяда тағы 4 науқас тіркеліп, олардың саны 11-ге жетті.

Ухань қаласындағы эпидемияға байланысты Моңғолия Қытаймен шекарадағы барлық өткізу пунктін 2 наурызға дейін жауып тастады. 

Түркияның денсаулық сақтау министрі елдің 34 азаматымен қатар, 7 Әзірбайжан, 7 Грузия және 1 Албания азаматын Ухань қаласынан эвакуациялайтынын жариялады. Арнайы әуе кемесі Анкара қаласынан ұшырылмақ.

Вьетнам қытайлық туристерге виза беруді уақытша тоқтатты. Сонымен қатар жергілікті билік тұрғындарға Қытаймен арадағы шекараға бармауға, ал туристік компанияларға эпидемия өршіп тұрған аймаққа туристерді жібермеуге шақырды.

Гонконгтағы мектептер, балабақшалар мен университеттер 2 наурызға дейін жұмыстарын уақытша тоқтатты.

Осы күнге дейін кемінде 17 мемлекет қытайлық туристердің елге кіруіне тыйым салды. Ал 20 шақты әуе компания Қытайға бағытталған рейстерді уақытша тоқтатып, кейбірін кейінге қалдырып жатыр. Рейстер санын қысқартқан немесе уақытша кей рейстерді тоқтатқандардың қатарында: Singapore Airlines, Scoot, SilkAir, Jetstar Asia, United Airlines, American Airlines, Air Asia, Cathay Pacific, Delta, KLM, Air India, IndiGo, Air Canada, Virgin Atlantic, Finnair, Turkish Airlines және Lion Air. Ал British Airways, Lufthansa мен Kenya Airways болса ұшуды мүлдем тоқтатты.

Табиғат Нұрболат

inbusiness.kz-ті қараңыз, оқыңыз :

Неге халық үшін үйде отыру азапқа айналды?

Азаматтар әртүрлі себеп айтып, карантинді бұзуға рұқсат сұрауда.  

05 Сәуір 2020 19:13 74

Неге халық үшін үйде отыру азапқа айналды?

Мемлекет басшысынан бастап қоғам белсенділеріне дейін азаматарды үйде болуға, бей-берекет сыртқа шықпауға шақырып жатыр. Алайда төрт қабырға ішінде қамалып отыру адамдар үшін ең ауыр жаза болып отыр. Мысалы, елордада үй жануарларын көшеде серуендетуге рұқсат етілді. Осыдан кейін ит асырап алушылар көбейе бастаған.

Елорда тұрғыны Болат Келдібеков сыртқа шығу үшін үйіне ит кіргізгісі келмейді. Ол қала әкімі Алтай Көлгіновтен және төтенше жағдайлар мемкомиссиясынан жүгіру, спортпен шұғылдану үшін далаға шығуға рұқсатнама беруді сұрайды.

«Комиссия қабылдаған қатаң шараларды толық қолдаймын. Сонымен бірге тұрғындарға таза ауада, ауладағы спорт алаңында, парктерде, скверлерде, Есіл жағалауында дене шынықтырумен айналысу үшін үйден шығуға мүмкіндік беруді өтінемін. Біз қауіпсіздік шараларын сақтаймыз. Маска киіп жүреміз. Өзге адамдардан аулақ боламыз. Бір жерге шоғырланбаймыз. Тіпті сыртқа шығу уақытын белгілесе де көнеміз. Оған таңғы уақытты бөлсе жарар еді», – дейді ол.

Осы мәселені көтерген қазақстандықтар кез келген вирусқа қарсы тұратын қуатты қару – адамның иммунитеті екенін алға тартады. Ал иммундық жүйені таза ауа мен дене шынықтыру күшейтеді дейді олар.

«Біздің халық онсыз да денені шымыр етуге құлықсыз. Ендеше қазіргі карантинде адамдар өз денсаулығына мән беріп, қол боста спортқа ден қоюы ықтимал. Шылымқор үшін темекі тарту сияқты спортпен ұдайы шұғылданатын адамдар үшін сыртта дене шынықтыру – өткір қажеттілік. Бірқатар елдерде көшеде дене шынықтырумен айналысуға тыйым салынбағанын жаңалықтардан көрдім. Бұқаралық спортқа Елбасының өзі мән беріп отыр ғой. Сондықтан биліктен осы мәселенің оң шешімін тауып, рұқсат беруін сұрадым», – дейді Болат Келдібеков.

Әрине, халықтың спортты таңдауын билік жақтайды. Бірақ көшеде, парктерде дене шынықтырумен айналысуға жол ашса, осыны сылтауратып, барлық адам жаппай көшеге шығып кете ме деп қауіптенеді. Өйткені тәртіп сақшыларына адамның сыртта спортпен шұғылданғанын, әлде басқа мәселемен сенделіп жүргенін анықтау қиынға түспек.

Елорда әкімі Алтай Көлгінов те бұған жол бере алмайтынын жеткізді.

«Мемкомиссияның және Нұр-Сұлтанның жедел штабының нұсқауына сәйкес, азаматтардың және жеке көліктердің қозғалысына шектеу қойылды. Нұр-Сұлтан және Алматы қалаларында жұмыссыз режим 13 сәуірге дейін ұзартылды. Осы уақытта тек бірнеше себеппен ғана сыртқа шығуға болады: біріншіден, жұмыс істеуіне рұқсат етілген ұйымдар қызметкерлері үйінен жұмыс орнына барып-қайта алады. Екіншіден, азық-түлік, дәрі-дәрмек сатып алу үшін үйге не жұмысқа жақын орналасқан дүкен мен дәріханаға баруға рұқсат. Үшіншіден, шұғыл жағдайда емхана-ауруханаға баруға кедергі жоқ. Төртіншіден, үй жануарын үй жанында серуендетуге болады», – деді А.Көлгінов.

ТЖ салдарынан жұмыссыз ерігіп отырған кейбір еркектерді әйелдері үйлеріне сыйғызбайды екен.

Алматы тұрғыны Геннадий Ерохин төтенше жағдай туралы хаттамаға өзгеріс енгізіп, баламен далада қыдыруға рұқсат етуді сұрайды.

«Жаңа туған сәбиім бар. Үйде жылап, мазаны кетіреді. Дала жылы. Демек, бала арбасынан әрі аспайтын бөбектері бар адамдарға көшеде серуендеуге кедергі болмуы керек. Бала арбадан басқа нәрсеге қол тигізбейді», – дейді Геннадий.

Алматы әкімі Бақытжан Сағынтаев тұрғындардан түскен осы ұсынысты қалалық жедел штаб қарағанын хабарлады. Бірақ рұқсат етпепті. Пандемия ошақтарында Covid-19 ауамен таралмасына еш кепіл жоқ.

«Алматы қаласында тұрғындардың қауіпсіздігі үшін режим күшейтілді. Сондай-ақ азаматтардың баспанадан шығуы да шектелді. Сондықтан әсіресе, кішкентай балдырғандары бар адамдарға аса қажеттілік болмаса, сыртқа шықпауға кеңес береміз», – деді Б.Сағынтаев.

Ел Үкіметі Ақмола және Алматы облыстарындағы шипажай-санаторийлерді жауап тастады. Бірақ Көкшетау, Щучинск қалаларында жалға берілетін жеке үйлерге карантиннен қашқан мегаполистер тұрғындары қоныстанып алыпты. Олар әлеуметтік желілер арқылы орманда серуендеп жүргендерін мақтана айтып, фотоларымен бөлісуде. Бұл денсаулыққа дәру, сырқатқа шипа қарағайлы орман аумағында коттедж ұсынатын азаматтарды қуантқанымен, өзге тұрғындарды қапаландырып отыр. Олардың талап етуімен 31 наурыздан бастап Ақмола облысы карантинге жабылған.

«Көкшетау жеке карантинге жабылуы керек. Бұл – қалада пандемия өршімеуі үшін керек. Өйткені Нұр-Сұлтан және Алматы қалалары тұрғындарының 15–25 пайызы карантин қарсаңында Ақмола облысының курорттық аймағына үдере «көшті». Олар Көкшетауға да еніп кетеді. Көкшетау тұрғындары қаланың толық жабылғанын және ешкімнің ішке кіргізілмеуін қалайды», – дейді Ақмола облысының әкiмi Ермек Маржықпаевқа жүгінген қала тұрғыны Забира Шинтемирова.

Алматылық белгілі заңгер Ержан Есімханов қалалықтарға сөз өтпейтініне күйінді.

«Мен Алматыда жеке секторда тұрамын. Жексенбі күні таңертең тұрып, үй ауласын ретке келтірмек болдым. Бәрібір үйде отырмын, баспанамның айналасын тазалайын, дуал сыртындағы ағаштарды суарайын дедім. Осы іспен шұғылданып жатқанымда қасымнан, қара жолмен көліктер жүйткумен болды. Ондаған емес, жүздеген көлік. Музыканы аңыратып, терезесін ашып тастаған, бетін маскамен бүркемелеген тұрғындар көлік жүргізіп барады. Кейбір машина балаға толы. Отбасылар әлдеқайда бет алған. Көңілдері көтеріңкі, күлімсірейді. Тіпті маған қол бұлғады. Жүйені, режимді бұзғанына мәз», – деп реніш білдірді сарапшы.

Мемлекет азаматтарға қашықтан жұмыс істеуге мүмкіндік берді, үйде болуды сұрады. Өтемақы да төлеуде.

«Ал бұлар жүйені «алдап» соққанына мәз. Бұл демалыс күн ғой, әдеттегі жексенбі емес, карантиндегі жексенбі. Олай болса, көшелер босап қалуға, шөл даладағыдай тыныштық орнауға тиіс еді. Олардан қарапайым нәрсе сұралды: жай ғана үйде бол. Басқа ештеңе де істеме. Жиі қол жу. Сонда мемлекет індетті жеңеді. Үкіметті сыйламайды екенсіз, осыны өтінген дәрігерлерді, жұлдыздарды, қайраткерлерді, туысыңызды тыңдаңыз. Алайда кейбір адамдар үшін жүйеге қарсылық білдіруді, көлікке тиеліп, қонаққа баруды бәрінен жоғары қойды. Ертең вирус жұқтыра қалса, өзін емес, билікті, басқасын айыптап шулайтын да осындай жауапсыз адамдар болады», – дейді Ержан Есімханов.     

Сарапшылар өзінің де, өзгенің де өміріне салғырт қарайтын адамдар кесірінен пандемиямен күрес ұзап кетуі мүмкін деген болжам жасайды.

Жанат Ардақ

Қызылорда облысында коронавирустың он шақты ошағы анықталды

Бес мыңға жуық студенттер бақылауға алынып, карантинге жатқызылған.  

05 Сәуір 2020 15:27 1065

Қызылорда облысында коронавирустың он шақты ошағы анықталды

Облыста бүгінгі күні инфекцияның 15 ошағы тіркелген. Бұл туралы облыстық Денсаулық сақтау басқармасының басшысы Жақсылық Абдусаметовтің мәлімдеді.

Аймақта алғашқы науқас тіркелген бері 8 күн өтті. Коронавирустық инфекцияның 15 ошағы анықталып, 31 науқас тиісті ем-домын алып жатыр.

«Осы уақытта Қармақшы және Шиелі аудандарында – 3 ошақтан, Жаңақорған ауданында – 4 ошақ, Қызылорда қаласында – 5 ошақ тіркеліп тұр. Облыс орталығындағы «Мерей», «Ақмешіт» мөлтек аудандарында және Достық, Сүтемген көшелерінде анықталды. Барлық жерлерге дезинфекция жұмыстары жүргізіліп, бақылауда. Ошақтардағы жағдай қанағаттанарлық», – дейді басқарма басшысы.

Өткенде ғана Жаңақорған ауданында коронавирус жұқтырған 8 науқас бір отбасынан шыққан еді, ал бүгін бір ошақтан 21 адам індет жұқтырған. Бұларда – бір үйдің адамдары екені белгілі болды.

«Тұрғындар карантин және оқшаулану талаптарын сақтамаудың соңы қауіпті індеттің өршуіне апарып отыр. Аймаққа шетелдерден келгендердің арасынан 2 адамнан, өзге өңірлерден келгендердің ішінен 3 адамнан қауіпті індет анықталды. Басқа қалаларда оқитын студенттер карантин, оқшаулау талаптарын өрескел бұзып отыр. Осы орайда карантин тәртібін қатаң сақтап, өзіңіздің де, өзгенің де өмірлеріне қауіп төндірмеңіздер», – деді басқарма басшысы.

Қауіпті аймақтардан келген бес мыңға жуық студенттер бақылауға алынып, карантинге жатқызылған. Бұлардың көбісі карантинде болу уақыты аяқталуына байланысты бақылаудан алынған.

Бүгінде Covid-19 індетін жұқтырған өңірдегі 31 науқаспен 740 адам байланыста болған. Жақын қарым-қатынаста – 254, потенциалды байланыста болғандар – 486 адамды құрап отыр. Бүгінде барлығы бақылауға алынып, оқшауланған.

Коронавирустың кесірінен оқушылар 4-ші тоқсанды қашықтан оқыту форматында бастайды. Өңірдегі 293 мектепте 161 779 оқушы білім алады. Мектептердің 78% ауылдарда орналасқан. Еді осы ауылдардағы интернеті мен ұялы байланысы жоқ елді мекендердің саны 25-ті құрап отыр. Ондағы мектептерде 2 696 оқушы білім алады. Бұл оқушылар қандай жолмен білім алатынын облыс әкімінің орынбасары Наурызбай Байқадамов айтып берді.

«Бұл бағытта тиісті дайындық жұмыстары жүргізілді. Интернеті жоқ елді мекендерде кері байланыс алдын ала жасалып, дайындалған тапсырмалар үйлеріне санитарлық қауіпсіздік талаптары сақтала отырып жеткізілетін болады. Бұл кезең – өтпелі кезең. Қашықтан оқыту форматы елімізде бірінші рет қолданылып отыр. Әрине, түрлі ақаулар, түсінбеушіліктер болуы мүмкін. Қиындыққа қарамастан біз үшін әр баланың білім алуы маңызды. Барлық ата-аналарды ұстаздарға қолдау көрсетуге шақырып, бірлікте жұмыс істеуге шақырамын», – деді Н.Байқадамов.

Нұрбек Дәуренбеков

 

inbusiness.kz-ті қараңыз, оқыңыз :

Жаңалықтарға жазылу: