Португалиялық футбол жұлдызы Криштиану Роналду Сауд Арабиясының "Аль-Наср" клубымен келісімшартын 2026 жылдың жазына дейін ресми түрде ұзартты. Бұл жаңалық футбол жанкүйерлерін бейжай қалдырмады. Әлемдік футболдағы ең атақты есімдердің бірі енді аталмыш клубта мансабын жалғастыра бермек.
Роналду "Аль-Насрға" 2023 жылдың қаңтарында ауысып, араб футболының жаңа дәуірінің символына айналды. Оның сауд арабиялық клубқа келуі жаһанның назарын өзіне аудартты. Еуропалық деңгейдегі қызығушылық пен инвестиция тартты. Ал оның спорттық бабы мен алаңдағы өнері жасы келгеніне қарамастан, әлі де жоғары деңгейде екенін дәлелдеді.
2023/24 маусымында Роналду Сауд Арабия чемпионатында 35 матч өткізіп, 35 гол соқты — бұл лиганың рекорды.
Сонымен қатар, 13 нәтижелі пас беріп, командаластарына көмектесу жағынан да үздіктер қатарында болды.
Азия Чемпиондар Лигасында да көзге түсті — 7 ойында 6 гол, 2 ассист.
Жалпы есепте ол "Аль-Наср" сапында 62 матчта 61 гол соғып, 15 ассист жасаған.
Роналду – тек алаңдағы аңыз емес. Оның келуімен бірге клубтың әлеуметтік желідегі жазылушылары бірнеше есе артты, билеттердің сатылымы күрт өсті. Сауд Арабиясы футболы халықаралық аренада танымал бола бастады. Бұл елдің спорттық брендін дамыту жолындағы үлкен қадам.
Келісімшартты ұзарту туралы шешім – "Аль-Насрдың" стратегиялық бағытын айқындайды. Сауд Арабиясы 2034 жылғы әлем чемпионатын өткізуге үміткер ел ретінде әлемдік деңгейдегі жұлдыздарға сүйеніп, ел футболының әлеуетін нығайтқысы келеді.
