Таяу Шығыстағы жағдайға байланысты біраз спортшылар 2026 жылғы Қысқы Паралимпиада ойындарына уақытында жете алмауы мүмкін. Бұл туралы Халықаралық паралимпиадалық комитет (IPC) мәлімдеді.
Сенбі күні Израиль мен АҚШ қарулы күштері Иран аумағына соққы жасап, ислам республикасына қарсы әскери операция басталғанын мәлімдеді. Осы жағдайдан кейін Таяу Шығыстағы бірқатар мемлекет әуе кеңістігін уақытша жапты.
Ойындар 6-15 наурыз аралығында Милан және Кортина-д’Ампеццо қалаларында өтеді. Халықаралық паралимпиадалық комитетінің өкілдерінің айтуынша, ұйым жағдайды жіті бақылап отыр. Қазір барлық делегациялармен байланыс орнатылған. Көптеген құрамалар Еуропада дайындалып жатыр. Бірақ әуе кеңістігінің жабылуы кейбір командалардың Италияға ұшып келуіне кедергі келтіруде.
"Бұл жағдай тек Ойындарға қатысатын ұлттық паралимпиадалық комитеттерге ғана емес, ұйымның барлық мүшелеріне әсер етіп отырғанын түсінеміз. Ең алдымен, біз адамдардың қауіпсіздігіне алаңдаймыз. Қазіргі сәтте осы жағдайдан зардап шеккен жандарға қолдау білдіреміз", – делінген IPC мәлімдемесінде.
Комитет нақты қай елдердің қиындыққа тап болғанын жариялаған жоқ. Дегенмен ұйымдастырушылармен бірге мәселені шешу жолдары қарастырылып жатқаны хабарланды.
