Конькимен жүгіруден Қытай құрамасының мүшесі, Қытайда туып-өскен этникалық қазақ спортшы Ақнар Адаққызы Харбинде өтіп жатқан ІХ қысқы Азия ойындарының алтын медаль иегері болды, деп хабарлайды inbusiness.kz сайты.
Ол конькимен жүгіру спортындағы әйелдер арасындағы командалық жарыстың финалында Хань Мэй және Ян Биньюймен бірге Қытай командасының құрамында қатысып, қарсыластарынан озып шықты.
Қазақ қызы әйелдер арасында конькимен жүгіруден командалық із қуу жарысында чемпион атанып отыр. Қытай құрамасының нәтижесі – 3 минут 02.75 секунд.
Ал, Жапония және Оңтүстік Корея құрамалары күміс пен қола медальді өзара бөлісті.
Конькиші Ақнар Адақ бұған дейін 2019 жылғы Қытай біріншілігінің 5 000 метрлік жарысында – алтын, 3 000 метрде – күміс медаль алған.
Сондай-ақ, халықаралық жарыстарға да қатысып, жүлдегерлер қатарынан көрініп жүр. 2016 жылы Қытайдың ұлттық құрамасына қабылданған.
