Нысан күн сәулесін тікелей электр энергиясына айналдыратын фотоэлектр станциясы мен күн жылуын жинап, сақтайтын мұнаралық жүйені біріктіреді.
Кешеннің жалпы қуаты 900 МВт фотоэлектр станциясы және 100 МВт күн жылу станциясынан тұрады.
Жобаның ерекшелігі – күн энергиясын тек панельдер арқылы өндірумен шектелмей, оның бір бөлігін жылу түрінде жинақтауында. Арнайы мұнараларға бағытталған күн сәулесі балқытылған тұзды қыздырады. Жиналған жылу кейін су буын өндіруге жұмсалып, бу турбинаны айналдыру арқылы электр энергиясын өндіреді.
Кешенде күн сәулесін мұнараларға бағыттайтын 10 мыңнан астам гелиостат орнатылған. Олар күннің қозғалысына қарай бағытын өзгертіп, сәулені орталық қабылдағыштарға шоғырландырады.
Жүйенің маңызды артықшылығы – энергияны балқытылған тұзда сақтау мүмкіндігі. Соның арқасында станция күн сәулесі азайған немесе күн батқан уақытта да жинақталған жылудың есебінен электр өндіруді жалғастыра алады.
Қытай билігінің мәліметінше, кешен жыл сайын шамамен 2,2 млрд кВт·сағ электр энергиясын өндіреді деп күтіледі. Бұл шамамен 690 мың тонна стандартты көмірді үнемдеуге және көмірқышқыл газы шығарындыларын жылына 2,07 млн тоннаға азайтуға мүмкіндік береді.
Жаңа нысан Қытайдың жаңартылатын энергия көздерін дамыту және электр энергиясын өндіруді тұрақтандыру стратегиясындағы маңызды жобалардың бірі саналады. Әсіресе күн энергетикасында энергияны сақтау мәселесі өзекті: фотоэлектр станциялары электрді негізінен күндіз өндірсе, мұнаралық жылу жүйесі жинақталған энергияны кейін пайдалануға мүмкіндік береді.
Цинхай провинциясы күн мен жел энергетикасын дамытуға қолайлы аймақтардың бірі. Мұнда жаңартылатын энергия көздерінен өндірілген электр энергиясын елдің басқа өңірлеріне жеткізуге бағытталған ірі энергетикалық жобалар жүзеге асырылып келеді.
Жаңа гибридті кешеннің іске қосылуы Қытайдың күн энергетикасында өндіріс көлемін ғана емес, энергияны сақтау технологияларын қатар дамытуға басымдық беріп отырғанын көрсетеді.
