Бұл туралы Астана қаласының әкімі Жеңіс Қасымбек мәлімдеді, деп жазады inbusiness.kz сайты.
Оның сөзінше, LRT ашылған сәттен бастап екі апта ішінде жолаушылар ағыны 1 млн адамға жетті. Күн сайын жолаушылар саны шамамен 65-75 мың адамды құрайды.
– Бұл көрсеткіш қалалық рельсті көліктің жаңа түрі елорда тұрғындары мен қонақтары арасында сұранысқа ие екенін көрсетеді. LRT-ны белсенді пайдаланып, жаңа көлік жүйесіне сенім артқаны әрі инфрақұрылымға жауапкершілікпен қарағаны үшін жолаушыларға алғысымды білдіремін, – деді Жеңіс Қасымбек.
Әкім атап өткендей, Қосшы бағытындағы LRT-ның екінші кезеңі қолға алынды.
– LRT-ның Қосшы бағыты бойынша екінші кезеңін іске асыру жұмыстары басталды. Жобаның жүзеге асуы көлік инфрақұрылымын одан әрі дамытуға мүмкіндік береді, – деп жазды шаһар басшысы Instagram-дағы парақшасында.
