DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 314,56 Brent 36,55
М.Гурман: Томасовқа агенттер тыныштық берер емес

М.Гурман: Томасовқа агенттер тыныштық берер емес

«Астана» командасының хорватиялық легионеріне шет елдік командалар қызығушылық танытуда. 

26 Тамыз 2019 18:42 1425

М.Гурман: Томасовқа агенттер тыныштық берер емес

Автор:

Ермұхамед Мәулен

«Таразбен» өткен ойыннан кейін Жаңа еңбек келісімі бойынша қорғаушы Антонио Рукавина 2021 жылға дейін «Астана» жейдесінде төр төгеді. 35 жастағы сербиялық футболшы 2018 жылдың бел ортасында «Астана» қатарына қосылған. Осы уақыт аралығында 45 матчта алаңға шығып, 3 гол салған. Ал шабуылшы Марин Томасов 2022 жылға дейін елордада қалмақ. Ол ел чемпиондарының сапына 2017 жылы келген-ді. Бас-аяғы 96 ойында 40 гол мен 41 нəтижелі пасы бар.

«Біз екі бірдей негізгі ойыншымен келісімшартты қайта жасастық. Олардың келісімдерінің мерзімі аяқталып бара жатты. Менің ойымша, олар Қазақстандағы ең мықты екі ойыншы. Марин Томасовтың өнеріне жанкүйерлер де, біз де ризамыз. Ойыншы енді 2022 жылдың соңына дейін біздің командада тер төгеді. Антонио Рукавина болса Сербия құрамасының қорғаушысы. Ол біздің командадағы ең пайдалы ойыншылардың бірі. Көп шабуыл дәл соның қапталы арқылы өтеді»,–деді «Астана» футбол клубының президенті Михаил Гурман. 

Алып-қашпа әңгімелерге сенсек Мәскеудің «Спартак» командасының агенттері хорватиялық ойыншыны «Астанадан» сатып алғысы келетін көрінеді. Дегенмен, Марин елордалық ұжыммен келісімді одан әрі создыртып отыр. 

«Мен «Астана» командасымен келісім жасағаныма қуаныштымын. Маған мұнда барлығы ұнайды. Стадион, жанкүйерлер, атмосфера барлығы тамаша. Біз бір отбасы секілдіміз. Командаға пайда әкелуге тырысамын», –деді өз кезегінде Марин Томасов. 

Ермұхамед Мәулен

inbusiness.kz-ті қараңыз, оқыңыз :

Үздіктер құрамасы

Қазақстан премьер-лигасының алғашқы тур ойындарында үздік болған футболшылардың құрамын назарларыңызға ұсынамыз. 

31 Наурыз 2020 19:59 1218

Үздіктер құрамасы

Қазақстан премьер-лигасы да өзге спорттық жарыстар секілді мерзімінен бұрын тоқтады. Қазіргі төтенше жағдайға байланысты амалсыз қабылданған шешім. Ел біріншілігі енді басталған еді – небәрі екі тур ойындары өтті. Сосын коронавирустың кесірінен елдегі аяқдоп бәсекесі шектелді. Чемпионат жыл соңына дейін созылады. Сондықтан біз өткен екі турда көзге түскен футболшыларды саралап, солардың аяқ алысын әңгіме етеміз. Яғни, премьер-лиганың таңдаулы құрамын жасақтаймыз. Олар алғашқы екі турда: тұрақты ойынымен көзге түсіп, матч нәтижесіне атсалысып, өз позициясында үздік шыққандар.   

Ең алдымен қақпашыларға тоқталайық. Жақсы қақпашы – команданың жарты ойыншысы деген қағида бар. Қақпашылар позициясында екі үміткер бар: Алмат Бекбаев пен Марсель Исламқұлов қырағылық танытып, өзгелерден озық тұр. «Жетісу» қақпашысы «Тобылға» қарсы тамаша ойын көрсетті. Қорғаныс сыр бергенде Бекбаев кезек алды. Алматтың сенімді қимылы командаға дем берді.Ол матчтың MVP ойыншысы атады. Дмитрий Огай шәкірттері тең есепте сақтап қалды. Алғашқы турда «Каспийге» қарсы кездесуде Бекбаев аса көп терлей қоймады. Есесіне, Марсель Исламқұлов белсенді. «Қайсар» қақпашысы «Ертіске» қарсы матчта пенальти қайтарып, «қасқырлардың» мерейін үстем етті. Ал Көкшетауда Марсельге көп жұмыс табылмады. Сондықтан екі қақпашы арасынан үздігін таңдау қиын. Біздің пікір Бекбаевқа тоқтады. Себебі ол «Тобылдың» өте қауіпті үш соқысын қайтарды.  Исламқұловтың пенальти қайтарғаны болмаса, өзге көзге түсер сәттерін байқамадық. Бұл жерде Леван Куталияның он бір метрлік соққыны сәтсіз тепкенін де айта кетейік.   

Алаңдағы таңдаулылар тізімін жасақтауда, үш қорғаушы қағидасын таңдадық. Алдымен Дино Миканович. «Қайрат» ойыншысы үш матчқа қатысты. «Таразға» қарсы кездесуде ол қапталда атой салды. Дино тіпті алғы шептегі әріптестеріне тамаша пастар да беріп отырды. Қапталдағы қорғаушының бір ойында 10 рет айып алаңына түзу пас беруі айтарлықтай көрсеткіш. «Қайрат» «Оқжетпеспен» кездесуде аса қинала қоймады. Ал «Шахтерге» қарсы сәтсіздікте Миканович алғашқы таймда жарақат алып қалды. Бірақ алғы шепке асырған пастары өтімді болды. Оның позициясындағы үздіктер тізімінен «Қайсарлық» Ілияс Әмірсейітов те үмітті еді. Қызылорда командасының футболшысы қорғаныста көзге түскенімен, шабуылға аса көп араласа бермейді. Ілиястың негізгі міндеті допқа талас және өз шебіндегі қауіптің бетін қайтару. Миканович қорғаныс пен шабуыл арасында шапқылайды.     

Келесі мықтыңыз – Иван Граф. Әуелеп келген допқа таласуде сөзсіз шебер. Пас беру мен позиция таңдауда да сауатты екенін дәлелдеді. «Қайсар» футболшысы орталық қорғаушыға тән қасиеттерге ие екенін көрсетті. Иван «Ертіспен» болған матчта командаласы Лобжанидзеге нәтижелі пас берді. Бұл кездесу тағдырын шешкен гол болды. Граф «Оқжетпеске» қарсы ойында Жасұлан Молдақараев пен Марко Обрадовичтің гол соғуына мүмкіндік бермеді. Орталық қорғаушының сенімді ойынының арқасында «Қайсар» алғашқы екі турда ұпайдан шашау шығарған жоқ.

Үздік үштіктегі таңдаулы қорғаушының бірі Дмитрий Шомко. «Астананың» вице-капитаны үш матчқа да толық қатысты. «Қызыл-Жармен» болған кездесуде екі нәтижелі шабуылға араласты. «Каспийге» қарсы ойында Барсегянның аяғына доп салып берді. Дмитрий шабуыл шебінде ғана емес, допқа талас кезінде де сауатты ойын көрсетті. Әр кездесуде кем дегенде 4 мәрте допқа бұрын жетіп, қарсыласынан тартып алды. Қорғаушы үшін жаман емес. «Астана» үш ойында қақпасына 3 гол жіберді. Бірақ оған Шомконың қатысы шамалы.

Қорғаныс пен шабуылды үйлестіруші, орталық алаңның күретамыры саналатын – тірек аумағына келіп жеттік. Мұнда Қостанай мен Шымкенттің жартылай қорғаушылары жүр. «Тобылдық» Ника Квеквескири мен «Ордабасылық» Май Махлангу тірек аумағының нағыз тірегіне айналды.  Грузиялық жартылай қорғаушы «Шахтер» және «Жетісумен» болған кездесуде үздік ойыншы атанды. Ника қорғаныста сауатты ойнап, қауіпті шабуылдарға негіз болған пастарымен көзге түсті. Джаба Канкаваны да таңдаулылар қатарына қосуға болар еді. Бірақ ол тек қорғанысты күзетуге басымдық береді. Сондықтан Квеквескиридің бірнеше позицияда тиімді ойнайтынын ескердік. 

Квеквескиридің қасында Май Махлангу бар. «Ордабасылық» футболшы әріптесі Абдуллай Диакатеден озып тұр. Майдың қаншығасы майланбаса да, командаластарының мергендік танытуына үлес қосты. «Оқжетпеске» қарсы ойында ол нәтижелі пас берді. «Астана» мен «Таразға» қарсы кездесуде белсенділігімен көзге түсті. Махлангудың «Ордабасы» сапындағы орны маңызды. Ол Шымкент клубының шабуылын ұйымдастырушы әрі еңбекқор,  күш-қуаты мол футболшы.   

Оң қапталдағы жартылай қорғаушы Тони Сильва. «Тараз» жейдесін киген Гвинеялық ойыншы негізінен шабуыл шебінде жүреді. Бірақ чемпионатта шабуылшыға көмекші қызметін де жақсы атқаратынын байқатты. «Қайратқа» қарсы кездесуде Алматы командасын әбігерге салды. Тонидің Цатлға берген пасынан кейін гол соғылды. Матч соңына қарай қақпаға қауіпті соққы жасады. Оған қоса екі мәрте «Ордабасы» қорғаушыларының қателесуіне себеп болды. Сильваның бұрыштан асырған екі добын қорғаушылар өз қақпасына соғып алды. Тонидің шірене тепкен добы қақпа бағанынан кері серпіліп, Таубайдың аяғынан табылды. Ал ол «Ордабасы» қақпасына жеңіл гол соғып кетті. «Тараз» ойыншысы таңдаулылар тізімінен лайықты орын алды.   

Орталық шабуылдаушы жартылай қорғаушы – Рубен Бригидо. «Ордабасы» футболшысы тізімге тегін кіріп отырған жоқ. Португалиялық азамат премьер-лигада әлі бірде-бір матчта толық ойнамады. Есесіне, әр өзіне берілген әр минутты тиімді пайдаланды. Бригидо қарсыластың айып алаңында допқа иелік етсе, қауіп төнді дей бер. Техникалық шеберлігі, допты ырқына көндіруі, әбжіл қимылы – шын шеберге тән қасиет. Ол бірнеше ойыншыны алдап өте алады. «Оқжетпеске» жеңіс голын соққаны да айта кетейік. Рубен биылғы маусымда үздіктер қатарынан табылуы тиіс. 

Сол қапталдағы жартылай қорғаушының позициясы Тигран Барсегянға тиесілі. «Астана» сапына биыл қосылған футболшы алғашқы екі турда өз мықтылығын паш етті. Армениялық аяқдоп шебері өткен жылы «Қайсар» сапында көзге түсті. Михал Билек Барсегянның талантына тәнті болғанын тілге тиек етіп жүр. Бапкер мен ойыншы өзара тіл табысқан секілді. Тигран «Ордабасыға» қарсы матчта нәтижелі шабуылға араласып, Щеткиннің бос қақпаға допты бұра салуына жағдай жасап берді. «Каспиймен» болған ойында гол соқты. Барсегян ел чемпиондарының қатарынан тегін қосылмағанын дәлелдеді.    

Шабуыл шебіндегі жұптың бірі Элгуджа Лобжанидзе. «Қайсар» командасы голдан тау тұрғызбаса да ұпайдан шашау шығарған жоқ. Бұған грузин жігітінің қосқан үлесі зор. Бойшаң футболшы баспен де жақсы ойнады. Позиция таңдаудағы сауаттылығының арқасында екі рет жеңіс добын соғып, «Қайсарға» алты ұпай сыйлады. Статистика Лобжанидзенің Қазақстан премьер-лигасынағы ең пайдалы ойыншы екенін көрсетіп тұр.         

Екінші шабуылшы – Абат Айымбетов. Әрине, келіспейтіндер де табылар. «Шахтерға» қарсы ойында ол білгенінен жаңылды. «Қайрат» жеңіліп қалды. Бірақ командаласы Эсеолаға қарағанда ол белсенділік танытып жүр. «Оқжетпес» қақпасына екі доп соқты. «Таразбен» болған қиын кездесуде пенальтиден жеңіс голын еншісіне жазды. Айымбетов талай жарақатты бастан кешірді. Былтырғы біріншілікте тамаша ойынымен есте қалды. Қазақстандық футболшы «Қайрат» сапында да шеберлігін паш етеді деп үміттенеміз.  

Чемпионаттағы үздік 11 ойыншыға тиесілі орын өз иесін тапты. Премьер-лига уақытша үзіліс алды. Футболшылар осы кезде бабтарын жоғалтпай, үй-жайында жаттыға береді деген үміттеміз. Себебі олар несібесін жасыл алаңда тауып жүрген кәсіби спортшылар ғой. Біз таңдаулылар тізімінен әлі талай футболшыны көреміз деген ойдамыз. 

Ермұхамед Мәулен

"Екібастұз" клубы кімге ұнамады?

"Екібастұз" футбол клубы жабылудың аз-ақ алдында тұр. 

25 Наурыз 2020 22:02 1427

"Екібастұз" клубы кімге ұнамады?

«Батыр», «Энергетик», «Экибастузец», «Угольщик» аттарымен таныс «Екібастұз» футбол клубының тарихы бай. Атауы өзгергенімен команданың дәстүрі мен таланттар шығару тәртібі еш өзгермей келді. Павлодар облысындағы футболға бөлінетін қаржыны қайта қарастыру барысында «Екібастұз» командасы жабылатын болды деген ақпарат жанкүйер жүрегіне қанжардай қадалған еді. Тіпті ол аз болғандай екінші лигада ойнайтын «Ақсу» командасы да жабылып қалудың аз ақ алдында тұр екен. 

"Екібастұз" командасы футболда талай жетістікке қол жеткізді. 1993 жылы команда Қазақстан чемпионатының күміс жүлдегері атанды. Сол жылы біріншіліктің үздік сұрмергені болып "Екібастұз" ойыншысы Николай Курганский танылды. Талантты шабуылшы сол жылы 26 рет гол соқты. Ал 1998 жылы клуб Владимир Линчевскийдің баптауымен клуб сол жетістігін қайталаған еді. Ал қазір жетістіктер мен медальдар туралы айту сәл қиындау. Команда 10 жылға жуық уақыт премьер-лигаға көтеріле алмай келеді. Алайда, Екібастұз футболы таланттарға кенде емес.

"Курганский, Шомко, Федин, Спарышев, Есімов. Мен бұл тізімді әлі де жалғастыра аламын. Қалада көптеген жігіттер футболмен өмір сүреді. Жастар үшін серуен құратын дүние онсыз да аз. Ал енді футбол клубын жапса, онда бұл спорт бұл өңірре өлді деп айта берсеңіз болады. Жанкүйер үшін клубты жабады деген қауесет ақпараттың өзі жүрекке ауыр тиеді. Осы жақында мен команда капитаны Айдын Біралинмен сөйлестім. Ол клубтың тағдыры қыл үстінде тұр деп қорқытты" дейді команда жанкүйері Әлібек Даңғарин. 

Ал екінші лигада ойнайтын «Ақсу» клубын жабу қандай ойдан туғанын әкімшіліктегілер ашып айта алмайды. Павлодар облысының бұл командасының да жағдайы шамамен ұқсас. Ал облыс үшін үш футбол клубы қалтаға ауыр соққы секілді көрінеді.

Ермұхамед Мәулен

inbusiness.kz-ті қараңыз, оқыңыз :

Жаңалықтарға жазылу: