Магомед Адиев: "Словакия құрамасында әлемдік жұлдыздар ойнайды"

953

Өкінішке орай бүгінгі кездесуге ұлттық құраманың көшбасшы ойыншыларының бірі Асхат Тағыберген қатыса алмайтын болды.

Магомед Адиев: "Словакия құрамасында әлемдік жұлдыздар ойнайды"

Қазақстан құрамасының бас бапкері Магомед Адиев Словакиямен болатын матч алдында баспасөз мәслихатына қатысып, тілшілердің сұрақтарына жауап берді.

– Словакия командасы жайлы не айта аласыз? Команданың Беларусьпен болған ойынын бақыладыңыз ба?

– Словакия бұл ойында позициялық шабуылдары көп ұйымдастырды. Ал Беларусь құрамасы жақсы қорғана білді. Команда шабуылда белсенді түрде әрекет етіп, қарсыласына қысым көрсетті. Сондықтан бұл матчта заңды нәтиже тіркелді деп ойлаймын. Словакия біздің топтың фавориті болып табылады. Құрамында Лоботка, Шкриньяр секілді әлемдік деңгейдегі ойыншылар бар. Сондай-ақ жеке шеберлігімен көзге түсетін футболшылар жеткілікті. Куцка мен Вайссты және ірі денелі шабуылшы Алмашиді де ерекшелеп айтуға болады. Қапталдағы қорғаушылары да мықты, шабуылға жақсы қосылады. Сондықтан бізге ертең ұйымдасқан түрде ойнау қажет.

 Жол жүруге жеті сағат кетті. Жігіттер қалпына келіп үлгерді ме?

 Дұрыс айтасыз. Өткен матч пен алыс сапарды ескерсек, бұл ойыншыларға әсер етпей қоймайды. Жігіттердің қалпына келген-келмегенін ертеңгі ойында байқайтын боламыз. Біз ертең негізгі құрамды қайта жасақтаймыз. Тығыз график болғандықтан, құрамда біршама өзгерістер болады.

 Ертеңгі ойында капитан қызметін кім атқарады? Команданың вице-капитаны Исламбек Қуат бұл матчқа дайын ба?

 Исламбек командадағы негізгі ойыншылардың бірі, бойында көшбасшылық қабілеттері бар. Асхатты алмастыратын футболшылар жеткілікті, бірақ ертеңгі матчта капитан қызметін Қуат атқарады.

Естеріңізге сала кетейік, Ұлттар лигасы аясында футболдан Қазақстан ұлттық құрамасы Словакиямен кездеседі. С дивизионының екінші турының ойыны Трнава қаласында өтеді. Матч осы "қала" халқының төрттен бір бөлігін, шамамен 19-20 мың көрерменді қабылдайтын Антон Малатинский атындағы стадионда өтеді. Матч Нұр-Сұлтан уақыты бойынша 6 маусымнан 7 маусымға қараған түні 00:45-те басталады.

Ермұхамед Мәулен