Басылым кейбір қызметкерлерге, соның ішінде жақында тағайындалған клуб басшылығының өкіліне өткен аптада қысқартылатыны туралы хабарланғанын мәлімдеді. Тағы бірнеше адамға олар да жұмысынан айырылып қалуы мүмкін екені ескертілген.
Қысқартулардан ең көп зардап шеккен бөлім – скаутинг бөлімі. Өткен аптада клубтың скаутинг жөніндегі директоры Стив Браунның да 9 жылдық қызметінен кейін кететіні белгілі болды.
Джим Рэтклифф пен Ineos басшылыққа келгеннен кейін, жалпы саны 450 қызметкер жұмыстан босатылды. Бұл жалпы штат санының үштен бірінен астам бөлігін құрайды.
Клуб соңғы үш жылда £300 миллионнан астам қаржыға шығындалған.
Рэтклиффтің пікірінше, қатаң шаралар қабылданбаса, "Манчестер Юнайтед" 2025 жылдың соңына дейін қаржылық дағдарысқа ұшырап, күйреп қалуы мүмкін еді.
Ол клубқа £240 миллион инвестиция салды, алайда бұл жағдайды тұрақтандыруға жеткіліксіз болды.
Қайта құрылымдаудың және жұмысшы санын қысқартулардың мақсаты – 2 жыл ішінде клубты қайта табысқа шығару.
