Ұстаздық жолды таңдаған ару жақында 23 жасқа толды. Мереке күні дүние есігін ашқан оның ата-анасына алғысы шексіз.
"Бұл күн еліміз үшін айтулы мереке. Қазақ халқы үшін маңызды күні дүниеге келгеніме қуаныштымын. Қазіргі таңда мектепте ұстазбын. Елдігіміздің мерейін өсірген мереке маңызын балаларға түсіндіріп келемін. Ата-бабамыздың ерлігін ұлықтау ұрпақ парызы екенін ұғындырғым келеді. Баршаңызды Республика күнімен құттықтаймын. Еліміз аман, жұртымыз тыныш болсын. Аспанымыз ашық, бейбіт заман болсын", – дейді Ділдә Мұратова.
Айтулы күнді әскери теңізшілер де атап өтті.
Ақтау гарнизонында
Әскери бөлім қолбасшылығы мен Қорғаныс министрлігінің марапатымен әскери қызметшілер мен мерзімді қызмет сарбаздары марапатталды.
Шарада әскери оркестр мен десант-шабуыл батальоны ұжымының көркемөнерпаздар концерті ұйымдастырылды.
Сондай-ақ теңізшілер "Менің туым – менің мақтанышым" челенджін аяқтады. Теңіз жаяу әскерлері бригадасының әскери қызметшілері мерекенің құрметіне мемлекетіміздің туымен шеруге шықты.
Мереке күні екі апта бұрын ғана қызметке шақырылған жас сарбаздар шеруде Тумен салтанатты шеру жасады.
"Тамаша мереке – Республика күнімен құттықтаймыз! Бұл мереке көпұлтты халықтың бірлігінің, әрқайсымыздың туған өлкемізге деген шексіз сүйіспеншілігіміздің, тарихи қауымдастығымызды және республиканың елеулі әлеуетін түсінудің символы болып табылады. Сіздерге шын жүректен зор денсаулық, барлық жоспарланған жоспарларды іске асыру және туған Қазақстанның игілігі үшін сіздің қызметіңізде одан әрі табыстар тілейміз", – деді мерзімді қызметтің жаңадан келген сарбазы, қатардағы жауынгер Асылбек Болатбай.
Ақтауда Республика күніне орай мемлекеттік ту ілу акциясы өтті.
Балкондарына мемлекеттік туды іліп, акцияға 26, 14, 28, 17, 11, 28а және 21 шағын аудан тұрғындары белсенді қатысты.
"Республика күні – ұлттық мереке. Бұл күнді әрбір қазақстандық ерекше атап өтуі керек деп есептеймін. Акцияға қатысу үшін таңертең тұрып, үйімнің балконына мемлекеттік туды ілдім. Акцияға қатысу арқылы ұлттық мерекенің аталып өтуіне өз үлесімді қосқаныма қуаныштымын. Барша ақтаулықтарды Республика күнімен құттықтаймын!", – деді қала тұрғыны Толқын Жарасова.
Мерекеге орай, шаһарда мотошеру де өтті.
Мотоцикл жүргізушілері көк байрақты желбіретіп, 1 сағат көлемінде қаланы аралап шықты.
Ұйымдастырушылардың айтуынша, бұл шара жастарды отансүйгіштікке тәрбиелеуге бағытталған.
"Мотошерудің мақсаты – ұлттық мерекемізді ұлықтау, мемлекеттік туымызды насихаттау. Мотоцикл жүргізушілері "Ақбота" саябағынан бастап 18-шағын аудан және теңіз жағалауына дейін көк байрақты желбіретті. Қала тұрғындары мен қонақтарын 25-қазан Республика күнімен құттықтаймын!", – деді "Маңғыстау жергілікті бастамалар орталығы" қоғамдық қорының директоры Жақсыгүл Маханбетова.
"Достық" үйінде "Тұғыры биік туған жер" атты мерекелік салтанатты шара өтті.
"Біздің ортақ міндетіміз – рухани және мәдени құндылықтарды сақтау, халықтың бірлігі мен елдегі тұрақтылықты сақтау және нығайту. ҚХА-ның өткен Республикалық сессиясында Қазақстан Президенті Қасым-Жомарт Тоқаев Қазақстан азаматтарының бірлігі үшін негізгі құрамдас бөлігі, бізді бір Отанның балалары ретінде біріктіретін межелерді атап өтті. ҚР егемендігі туралы декларация қабылданған сәттен бастап тарихи стандарттар бойынша салыстырмалы түрде аз уақыт өтті. Бірақ осы уақыт ішінде Қазақстан үлкен жолдан өтті. Мемлекет басшысы жүргізіп отырған саяси, экономикалық және басқа да реформалар жарқын болашаққа үміт артуға негіз береді. Еліміздің бағдарламалық құжаттарында президент біз қол жеткізуіміз керек мақсаттарды атап өтті. Осы мақсаттарға қол жеткізген кезде әрбір қазақстандықтың өмір сүру жағдайы артады. Осы айтулы күнмен шын жүректен құттықтаймын! Елімізде бейбіт аспан, келісім мен тұрақтылық болсын!", – деді облыс әкімі Нұрлан Ноғаев.
Мереке күні Германияда хирург-дәрігер болып еңбек ететін маңғыстаулық Дастан Нұрмағанбетов: "Барша қазақстандықтарды ұлық мерекемен құттықтаймын! Қазақстан – мәңгілік ел болсын! Біз озық елдерден жинаған тәжірибемізді Отан дамуы үшін жұмсайық. Еңселі, ерен елім аман болсын!" деді.
Осылайша, Маңғыстауда Республика күні кең көлемде аталып өтті. Өңірдің жер-жерінде 50-ден астам шара өтті.
