/img/1920х100.png
/img/tv1.svg
RU KZ
DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 403,19 Brent 36,55
Медицина қызметкерлері ауруды асқындырмаудың амалын айтты

Медицина қызметкерлері ауруды асқындырмаудың амалын айтты

Биыл 1 қазаннан бастап тұмауға қарсы жаппай иммундау шарасы өтуде.  

19:32 19 Қараша 2019 3073

Медицина қызметкерлері ауруды асқындырмаудың амалын айтты

Автор:

Нұржан Көшкін

ҚР Денсаулық сақтау министрлігі Тауарлар мен көрсетілетін қызметтердің сапасы мен қауіпсіздігін бақылау комитеті төрағасының орынбасары Жандарбек Бекшин халықты жұқпалы аурулардан сақтану үшін егілуге шақырды.

Жандарбек Бекшиннің айтуынша, тұмаудың алдын алудың тиімді жолы – вакциналау.

«Халық арасында «сары ауру» атауымен белгілі гепатит А 2017 жылы елімізді алаңдатқан еді. Қазір гепатит А ауруы 36%-ға, туберкулез 8%-ға төмендеді. Туберкулез туралы ерекше айтқым келеді, Қазақстан 2018 жылы осы эпидемия аумағынан шықты. Бұл аса үлкен көрсеткіш. Жалпы жылдан-жылға бұл кесел азайып келеді. Тұмаудың алдын алудың ең тиімді әдістерінің бірі – вакциналау. Егер уақытылы екпе алсаңыз, тұмау вирусын жұқтырған жағдайда аурудың қиын өтуінен, асқынуынан құтыласыз. Жыл сайын халықтың 10%-ы егіледі», – деді ҚР Денсаулық сақтау министрлігінің өкілі.

Медицина саласының маманы тұмаудан сақтанудың басқа да жолдарын айтып, кеңес берді.

«Адамдар көп жиналатын жерге, әсіресе кинотеатр тәрізді жабық үй-жайларға баруды шектеу қажет. Бөлмені жиі желдетіп отырыңыз. Имунды түзеуші препараттар пайдаланыңыз, оксолин сияқты майлар жағып жүріңіз. Кешкі аспен зімбір, сарымсақ, пияз көбірек жеңіз. Олар иммунитетті нығайтуға және тұмаумен ауыру ықтималдығын азайтуға көмектеседі. Науқас адамдармен қарым-қатынасты шектеңіз. Өз-өзіңізді емдеумен айналыспаңыз. Өйткені кейде дәрігердің өзі диагнозды дәл қоя алмай жатады. Сіз медицинаға қатысыңыз жоқ адам болсаңыз, қателесіп қалуыңыз ғажап емес», – деді Жандарбек Бекшин.

Айта кетсек, 2019-2020 жылғы эпидемиялық маусымға бюджет қаражатынан 1 млрд 600 млн теңгеден астам қаржы жұмсалды. «Гриппол плюс» вакцинасы Ресейден сатып алынды. Халықтың әлеуметтік тұрғыдан осал топтарының 10%-ы егілді.

Нұржан Көшкін

Кейбір қымбат медициналық қызметтер МӘМС арқылы тегін болмақ

36 млрд теңгеге 250 дана медициналық құрал-жабдық сатып алынды.  

14 Қаңтар 2020 23:02 2353

Кейбір қымбат медициналық қызметтер МӘМС арқылы тегін болмақ

Елімізде міндетті әлеуметтік медициналық сақтандыру (МӘМС) жүйесі іске қосылғаны белгілі. Бұдан былай медициналық қызмет МӘМС және кепілдендірілген тегін медициналық көмек көрсету аясында жүзеге асатын болады. Осы орайда Нұр-Сұлтан қаласы Қоғамдық денсаулық сақтау басқармасының басшысы Сәуле Қисықова міндетті әлеуметтік медициналық сақтандыру жүйесіндегі жаңашылықтар жайлы айтып берді.

«2020 жылдан бастап медициналық көмек көрсетудің бірнеше деңгейден тұруын, жаңа моделдің басты ерекшелігі деп айтуға болады. Бірінші деңгей – кепілдендірілген тегін медициналық көмек. Екінші деңгейі – міндетті әлеуметтік медициналық сақтандыру. Бейінді мамандардың кеңесі, қымбат апаратурада зерттеу жасау, қымбат диагностикалар тәрізді медициналық қызметтерді алу бұдан былай міндетті әлеуметтік медициналық сақтандыру аясында жалпы халыққа қолжетімді бола түсті. Осы бағыттағы 5 млн қызметке 8 млрд теңге бөлінді», – деді Сәуле Қисықова.

Сонымен қатар, денсаулық сақтау саласының лауазымды қызметкері КТ мен МРТ арқылы диагноз қою көпшілік үшін қол жетімді болғанын алға тартты.

«Стоматологиялық көмек, медициналық-генетикалық зерттеулер өткізу де МӘМС арқылы қол жетімді. Қымбат тұратын компьютерлік тамограф (КТ) пен магнитті-резонансты томографияда (МРТ) диагноз жасау көпшілікті толғандырады. Елордада медициналық қызмет көрсетушілер тізіліміне кірген барлық мемлекеттік және жекеменшік медициналық ұйымдарда 17 компьютерлік тамограф аппараты мен 19 магнитті-резонансты томография құрылғысы бар. Өткен жылы 36 млрд теңгеге 250 данадай медициналық құрал-жабдық алдық. Медициналық қызметкерлерміз, алыс-жақын шетелдерге барып, кәсіби біліктілігін шыңдады», – деп атап өтті ол. 

Қоғамдық денсаулық сақтау басқармасының басшысы стаматологиялық қызметті кімдердің тегін алуына мүмкіндігі бар екенін айтып өтті.

«Биыл МӘМС аясында медициналық қызмет көрсетудің жаңа блогы енгізілді. Ол тегін стаматологиялық емдеу. Он сегіз жасқа дейінгі балалар, зейнеткерлер, көп балалы аналар, мүгедектер және жүкті әйелдер қызметтің осы түрін тегін пайдалана алады. Алайда, айта кету керек, тісті протездеу бұл топтамаға кірмейді. Тегін емдеуге жедел көмек пен жоспарлы қарау жатады», – деп түсіндірді.

Сәуле Қисықова мектептер медициналық ұйымдарға бекітілетініне де тоқталып өтті.

«Айта кетерлігі, мектеп медицинасына бөлек тариф енгізілді. Қаладағы барлық мектептер орналасу аумағы бойынша 19 медициналық ұйымдарға бекітілді. Оларға алғашқы санитарлық көмек көрсетіп тұратын болады. Тариф – әр оқушы үшін 470 теңге. Сол себепті мектеп оқушыларының күтімін қарау үшін қаражат бөлінді», – деді ол.

Нұржан Көшкін

Төлемді кешіктірген жеке кәсіпкерден өсімпұл өндіріліп алынады

МӘМС жарналарын әр айдың 25-не дейін төлеу керек.  

13 Қаңтар 2020 21:33 2796

Төлемді кешіктірген жеке кәсіпкерден өсімпұл өндіріліп алынады

Биылғы жылдан бастап еліміздің азаматтары табыстарының бір бөлігін міндетті әлеуметтік медициналық сақтандыру (МӘМС) қорына аударып отыруға міндеттелді. Кәсіпорындар мен мекемелерде төлемдер мен аударымдарды бухгалтерлер орындайтыны белгілі.

Ал штатында есепшісі жоқ жеке кәсіпкерлер мен шаруа қожалығының иелері және жеке тәжірибемен (жеке адвокаттар, сот орындаушылары, т.б.) айналысатын тұлғалар міндетті әлеуметтік медициналық сақтандыру қорына жарнасын ай сайын өзі төлеп отыруы қажет.

Биылдан бастап ай сайын ең төменгі жалақының 5% ставкасы бойынша 1,4  МӘМС жарналарын аудару талап етіледі. 2020 жылы ең төменгі айлық жалақы былтырғыдай 42500 теңге болып қалды. Яғни, жалақысы ең төмен жеке кәсіпкер төлейтін жарнаның көлемі 2975 теңге.

Мысалы, ең төменгі жалақы биыл 42500 теңге дедік. Яғни, 42500 теңге Х 1,4 = 59500 теңге. Ал 59500 теңгенің 5%-ы – 2975 теңге.

«Әлеуметтік медициналық сақтандыру қоры» коммерциялық емес акционерлік қоғамының 1406 колл орталығы операторының айтуынша, жеке кәсіпкер міндетті әлеуметтік медициналық сақтандыру жарналарын табысының болуы, болмауына қарамай, ай сайын төлеуге міндетті.

«Бұл жерде тиянақталған мөлшерлеме бар. Жеке кәсіпкердің қызметі ресми түрде тоқатылмаған болса, сонымен қатар ай сайын табысы болмай, нөлдік салық есептемесін тапсырып отырса да, МӘМС жарналарын аудару заң бойынша міндеттелген. Егер жеке кәсіпкер МӘМС жарналарын төлегісі келмесе, кәсіпкерлік қызметін уақытша ресми түрде тоқтата тұруы керек. Бұндай жағдайда жеке тұлға кәсіпкер ретінде емес, дербес төлеуші санатында өзін-өзі сақтандыра алады», – деді МӘМС кеңесшісі.

Оның айтуынша, табысы жоқ азаматтарға МӘМС жарналарын төлеудің екі жолы бар.

«Алдымен жұмыспен қамту орталығына жұмыссыз ретінде тіркеуге тұру қажет. Жұмыссыз қалған азамат жұмыс тапқанша мемлекет тарапынан уақытша сақтандырылады. МӘМС салымдарын ол азамат үшін мемлекет аударады. Жұмыспен қамту орталығы жұмыс тауып бергеннен кейін, жұмысқа шықса, ары қарай жарнаны жұмыс орны төлейді. Сондай-ақ, жұмыспен қамту орталығында тіркеуге тұрғысы келмейтін немесе жұмысқа шығуға құлқы жоқ азаматтар өзі үшін дербес төлеуші ретінде ай сайын 2125 теңге жарна аударып тұрса да сақтандырылады. МӘМС жарналарын әр айдың 25-іне дейін төлеп отыру қажет. Біздің 1406 номеріне тәуіліктің кез келген уақытында қоңырау шалып, қажетті ақпарат алуға болады», – деді ол.

Айта кетейік, кез келген азамат дербес төлеуші ретінде медициналық сақтандыру үшін, ең төменгі жалақының 5%-ы мөлшерінде төлем жасай алады. Биылғы ең төменгі жалақының 5%-ы – 2125 теңге.

МӘМС жарналарын әр айдың 25-іне дейін аудармаған кәсіпкерлерден салық органдары өсімпұл өндіріп алатынын МӘМС кеңесшісі түсіндірді.

«Өсімпұлды заңды тұлғалар, жеке кәсіпкерлер төлейді. Міндетті әлеуметтік медициналық сақтандыру туралы заңда жарналар уақтылы аударылмаған жағдайда, мемлекеттік кіріс органдары тиісті соманы Ұлттық Банкі белгілеген қайта қаржыландырудың 1,25 еселенген ресми мөлшерлемесі көлемінде мерзімі өткен әрбір күн үшін өсімпұлмен қосып өндіріп алатыны жазылған. Айыппұлдар мен өсімпұлдарды мемлекеттік салық органдары есептейді», – деді ол.

МӘМС төлемдерін банктің немесе «Қазпошта» АҚ кез-келген бөлімшесі арқылы аударуға немесе аванс түрінде төлем хабарламасы, тапсырмасы арқылы жөнелтуге болатыны МӘМС ресми сайтында айтылған. 

Нұржан Көшкін