Кукушкин бірінші сетті өзіне сенімді бастады. Ол ойынға қосылған допты жеңіл қайтарып отырды. Солақай аргентиналық теннисші форхэнд әдісімен айласын асыруға тырысты және сет ортасында алғашқы брейкке қол жеткізді. Тізгінді босатудан бас тартқан Кукушкин барын салды. Көп ұзамай кері брэйктің куәсі болдық. Партия соңына қарай екі мықтының кездесуі қыза түсті. Бірінші сет тай-брейкке ұласты. Бұл бөлімде қысқа есеппен Дельбонис басымдылық танытты.
Екінші сеттің басында Кукушкин қарсыласын өз ойын өрнегіне, өзі үйренген жылдам доп алмасуларға көндірді. Нәтижесінде аргентина теннисшісіне еш амал қалдырмаған жерлесіміз брейктен алға шығып, соңына дейін жеңісті уысынан шығарған жоқ.
Шешуші сетте Михаил Кукушкин үшінші геймде қарсыластың доп беру ді өз қолына алды. Келесі геймді де Кукушкин өз пайдасына қарай өрбітті. Бұл брейк қазақстандықтың жеңіске жетуге сенімділігін арттыра түсті. Есеп: 6:7 (5:7), 6:3, 6:2.
1/8 финалда Михаил Кукушкин турнирдің бірінші нөмірлі теннисшісі Бенуа Пэрмен ойнайды.
Қазақстанда алғаш рет өтіп жатқан ATP 250 турнирінің жалпы жүлде қоры 275 мың доллар. Коронавирус пандемиясына байланысты жарыс жанкүйерсіз өтіп жатыр. Матчтардың барлық трансляциясы QAZSPORT арнасы арқылы таратылады.
Ермұхамед Мәулен
