Президенттің тапсырмасы бойынша әзірленген 2017-2021 жылдарға арналған өнімді жұмыспен қамту мен жаппай кәсіпкерлікті дамыту бағдарламасы бизнес-бағыттағы шекарасын кеңейтіп жатыр. Үкімет микронесие беруге бюджеттен бөлінген қаражаттың көбеюі бағдарламаға қатысқысы келетін жас кәсіпкерлердің санын арттырады деп отыр.
Еске салар болсақ, ауылдағы, қаладағы кәсіпкерлік бастамаларды жеңілдетілген шартпен қолдау үшін салаға шектеу көрсетілмей, 8000 АЕК-ке (19 млн теңгеге дейін) дейін микронесие берілген. Кепілмен қамтамасыз ету жетпеген жағдайда мемлекет тарапынан (ісін енді бастаған кәсіпкерлер үшін кепіл көлемі микронесие құнынан 85%-ға дейін, бизнесі бар адамдар үшін 50%-ға дейін) кепілдендірілген микронесие беру мүмкіндігі қарастырылды.
2017 жылы несие бойынша қарыз берудің орташа мерзімі 51 айды (төрт жыл, үш ай), ал қарыздың орташа көлемі 10 млн теңгені құраған. Микронесие беруге 40 млрд теңге бөлінген.
Осы жылы бюджет қаражаты 62 млрд теңгеге дейін көбейді. Болжам бойынша, нәтижесінде 14 мыңнан астам адамға микронесие беруге болады, бұл 2017 жылдағы деңгейден екі есе көп.
Ұлттық экономика министрлігінің кәсіпкерлікті дамыту департаменті директорының орынбасары Шыңғыс Ахметов брифинг барысында өңірлерден келіп түскен қажеттілік негізінде қалалар мен шағын қалаларда микронесие беру үшін қосымша 6,1 млрд теңге бөлінгенін айтты. Қаражаттың қалған бөлігі ауылдағы кәсіпкерлік бастаманы қолдауға жұмсалады.
Бағдарламаға қатысушылар санын ұлғайту үшін өзгертулер пакеті әзірленген. Негізі микронесиенің шекті сомасы қайта қаралып, сауда саласындағы айналым қаражатын толтыру мақсатында микронесие алуға кедергі келтіретін шектеулер алынып тасталады.
"Негізгі түзетулер ақшаны шағын жобаларға жұмсауға байланысты болмақ. Осы жылдан бастап бағдарламаға енгізілген түзетулер бойынша бағдарламаға тек үш жыл бойы өзін-өзі жұмыспен қамтып жүргендер ғана қатыса алады. Яғни үш жылдан кейін ЖК болып жұмыс істеп жүргендер бағдарламаға қатыса алмайды", – деп түсіндірді Шыңғыс Ахметов.
Бұл ретте бизнес-жоспар жасап, бірақ қаржыландыруға қол жеткізе алмаған қарыз алушыларға басымдық беріледі. Осыған байланысты істі енді ғана бастап жатқан кәсіпкерлерге бизнесті жүргізудің негізін оқып үйрену ұсынылып отыр. Бүгінгі таңда білім беру құралы базасында екі күннен бір айға дейін оқытатын курстар бар.
"Ауылдық жерлердің тұрғындары міндетті түрде Bastau business бір айлық курсынан өтіп, содан кейін бизнес-жобаны қорғауы керек. Несие берілгеннен кейін "Атамекен" КҰП кеңесшілері бір жыл бойы кәсіпкерге көмек көрсетуі тиіс. Ең бастысы бағдарлама оқуға келген адамдарды сынақтан өткізуді ұсынады. Мұны Joozzy әдісі дейді. Ол әлемдік тәжірибеде қолданылады. Оның негізгі идеясы кез келген адамның бизнеспен айналыса алмайтынын ұғындыру", – деп түсіндірді Шыңғыс Ахметов.
Гүлназ Ермағанбетова, Ирина Севостьянова
