Туризм және спорт министрі Ербол Мырзабосынов дзюдошы Галбадрах Отгонцэцэгтің мәселесіне қатысты пікір білдірді, деп хабарлайды inbusiness.kz сайты.
"Галбадрах Отгонцэцэг ұлттық құрама сапында өнер көрсетті. Олимпиада ойындарының қола жүлдегері атанды. Біз федерациямен осы тақырып бойынша сөйлестік. Спортшының отбасы мен түп-тамыры Моңғолияда. Енді ол жұмысты өз құрамасымен жалғастырады. Әрине, мұндай тәжірибелер бар. Өзге елдерден келген спортшылар жөнінде осыған дейін де мәселелер көтерілген", – деп жауап берді ведомство басшысы.
Министрлік алдағы уақытта отандық спорт мектебінің спортшыларымен жұмыс істеп, оларға басымдық беретін болады.
"Осылайша өз кадрларымызды дайындаймыз. Сұрақтың қай бағытта қойылғанын түсініп отырмын. Осы кейстің біздің спортқа көп пайдасы тиді. Спортшы ретінде де, жаттықтырушы тәлімгер ретінде де спортшыларымызға белгілі бір серпін әкелді", – деді Ербол Мырзабосынов.
Министр дзюдошының келісімшарт бойынша жұмысын толық атқарғанын айтты.
