Таиландта өтіп жатқан Олимпиадалық іріктеу турнирінің кезекті жарыс күні қазақстандық боксшылардан шаршы алаңға алғашқы болып Валентина Хальзова шықты. 75 келі салмақ дәрежесіндегі шешуші жекпе жекте Хальзова колумбиялық Ширлейдис Оросконы 5:0 есебімен жеңіп, төртжылдықтың басты додасына жолдама алды, деп хабарлайды inbusiness.kz сайты.
Бангкоктағы лицензиялық турнирде Валентина Украина, Моңғолия және Колумбия боксшыларынан басым түсті.
Назым Қызайбай шешуші жекпе-жекте солтүстік кореялық Канг Су Хуангтан басым түсті. Кездесу тағдыры соңғы раунда шешілді. Қорытынды есеп — 5:0. Назым Қызайбай 50 келі салмақ дәрежесінде Париж Олимпиадасына барады.
Сондай-ақ Олимпиадаға іріктеу турнирінде Қазақстан ерлер құрамасы соңғы жолдамасын алды. 63,5 келі салмақта сынға түскен Мұхамедсабыр Базарбайұлы шешуші жекпе-жекте молдовалық Александр Парасчивті 5:0 есебімен жеңді. Осылайша, Мырзағали Айтжанов шәкірттері Олимпиадаға толық құраммен аттанады.
Айта кетейік, Қазақстан ерлер құрамасы 7 лицензия иеленді: Сәкен Бибосынов – 51 келі, Сабырхан Махмуд – 57 келі, Мұхаммедсабыр Базарбайұлы – 63,5 келі, Асланбек Шымбергенов – 71 келі, Нұрбек Оралбай – 80 келі, Айбек Оралбай – 92 келі, Қамшыбек Қоңқабаев — +92 келі.
Ал қыздара арасында Назым Қызайбай (50 келі), Карина Ибрагимова (57 келі) және Валентина Хальзова (75 келі) лицензияға ие болды.
