Алматылық команданың өкілі, екі дүркін Әлем чемпионы 27 жастағы Назым Қызайбай Қазақстан боксында өзінің көшбасшылық орнын кезекті рет дәлелдеді. Финалда ол шымкенттік Анжелина Лукаспен жекпе-жек өткізді. Бұған дейін Лукас Сербияда өткен Ұлттар кубогында Қызайбайды жеңген болатын. Сонымен қатар Ангелина Жарылғаповты еске алуға арналған турнирдің чемпионы. Шымкенттік боксшы қыз қарсыласына шабуыл стилі мен үлкен қысым көрсетті. Дегенмен, төрешілер бірауыздан Назым Қызайбайға басымдық берді. Сондай-ақ 51 келіге дейінгі салмақта шымкенттік Жайна Шекербекова мен Жамбыл облысының өкілі Жансая Абдраимова қола медальға ие болды.
Қостанайлық Владислава Кухта 57 келіге дейінгі санаттағы ел чемпионатының финалында 2016-жылғы Әлем чемпионатының қола жүлдегері қарағандылық Айжан Ходжабековамен жұдырықтасты. Екеуі де мықты жекпе-жек көрсетті. Бірақ Владислава рингте басымырақ болып, 5: 0 есебімен жеңіске жетті. Осылайша, Айжан күміс медальға ие болды. Ал Владислава ұлттық құраманың бірінші құрамына алғаш рет енеді.
Астаналық бапкерлердің шәкірті, халықаралық дәрежедегі спорт шебері Римма Волосенко ел чемпионатының финалында 60 келіге дейінгі салмақта акмолалық Карина Ибрагимованы жеңді.
2019 жылғы Әлем чемпионатының жүлдегері және 2018 жылғы ел чемпионы Қарағанды облысынан келген Милана Сафронова ел чемпионатында 64 келіге дейінгі салмақта алтын алса, шымкенттік Лаура Есенгелді күмістен алқа тақты.
Нұр-Сұлтаннан шыққан Әлем чемпионы Валентина Хальзова Рио ойындарының жүлдегерін алматылық Дариға Шәкімованы Қазақстан чемпионатының финалында 5: 0 есебімен жеңді. Валентина өзінің жекпе-жегі үшін ойластырылған тактиканы таңдаған екен: "Мен оның артынан жүгіріп, шабуылдаудың ақымақтық екенін білдім, - деді Хальзова жекпе-жектен кейін."Бірақ, сөзсіз, Дарига керемет мықты қарсылас, мен оған бұл жекпе-жек үшін алғысымды білдіремін", - деді Валентина.
Әйелдер финалындағы ең қызықты жекпе-жектердің бірі 75 келіге дейінгі салмақта өтті. Лондондағы ойындардың жүлдегері, ұзақ үзілістен кейін рингке оралған 31 жастағы Марина Вольнова 20 жастағы қостанайлық спортшы Надежда Рябецпен жұдырықтасты. Рябец жастар құрамасында жарқырай көрінді, Әлем чемпионы атанды, ересектер санатында ұлттық құрамаға әрең дегенде ауысып, Токиоға жолдама жеңіп алған болатын. Ал бүгін қиын, қыңыр және сонымен бірге динамикалық қарсыластықта өзінің басымдығы мен ұлттық құраманың бірінші нөмірлі боксшысы екенін тағы бір дәлелдеді.
Әйелдер арасындағы 81 келіге дейінгі салмақта шымкенттік командаға алтын медальді Азия чемпионатының 25 жастағы жүлдегері Фариза Шолтай алып келді. Күміс жүлде қарағандылық Виолетта Князеваға, қола - алматылық Элдана Талипова мен Қызылорда облысынан келген Гүлсай Ержанға бұйырды.
Екі Әлем чемпионы 81 келіден жоғары салмақ дәрежесінде финалда кездесті. Шымкенттік команда атынан Жастар арасындағы Әлем чемпионы Дина Исламбекова мен астаналық команданың намысын қорғаған "ересектер" санаты бойынша 2016 жылғы Әлем чемпионы Ләззат Күнгейбаеваөзара сынға түсті. Нәтижесінде 33 жастағы Күнгейбаева 2020 жылы ел чемпионы атанды. Қола медаль Альбина Вахитова (СҚО) мен Валерия Аксеноваға (Ақмола облысы) бұйырды.
Әйелдер арасындағы 54 келіге дейінгі салмақ дәрежесінде Қазақстан чемпионатының алтыны 2016 жылғы Әлем чемпионы, Қазақстанның еңбек сіңірген спорт шебері, 27 жастағы Дина Жоламанға бұйырды. Жастар құрамасындағы жеңістерді қоса есептегенде Дина үшін бұл ұлттық чемпионаттағы оныншы алтын медаль. Күміс бұл жолы алматылық Балауса Мұздиманға, қола жүлде Дәметкен Келімбетке (Қызылорда облысы) және Әйгерім Ошақбайға (Жамбыл облысы) бұйырды.
Жамбыл облысының спортшысы, 24 жастағы Алуа Балқыбекова 48 келіге дейінгі салмақта ел чемпионы атанды. Финалда Алуа Нұр-Сұлтаннан келген Арайлым Маратты жеңді.
Ермұхамед Мәулен
