"Эмирейтс" (БАӘ) пен болгариялық "Ботевке" қарсы өткен екі кездесуге қазақстандық футболшы дене қызуының көтерілуіне байланысты қатыспады. Сондай-ақ оның коронавирусқа тесті оң нәтиже бергені хабарланды. Айта кетейік, Нұралы Әліп алғаш рет "Зенит" сапында негізгі құрамда алаңға шықты. Енді Санк-Петербор командасы 28 қаңтар күні Португалияда өтетін екінші оқу жаттығу жиындарына аттанады.
Жолдастық матч аяқталған соң қазақстандық ойыншы "Матч.Тв" арнасына сұхбат берді. Сол сұхбатты назарларыңызға ұсынамыз.
- "Зенитпен" өткізіп жатқан оқу-жаттығу жиынынан алған әсеріңіз қандай?
- Қарқынды жұмыс істедік. Маған өте ұнады. Әрбір жаттығу мен үшін жаңа нәрсе.
- Жаттығу процесі "Қайраттағыдан" несімен ерекшеленді?
- Мысалы, "Қайраттағы" таңғы жаттығулар негізінен жаттығу залында өтсе, мұнда көбінесе доппен ойнатады.
- Командада сізді қалай қабылдады?
- Жігіттер жақсы қабылдады. Барлығы мені "қазақ" деп айтатын шығар деп ойладым. Бірақ жағдай басқаша өрбіді. Әріптестер де, бапкерлер штабы да қолдау көрсетті. Әсіресе, Тимощук пен Анюков.
- Қазіргі таңда жарты Қазақстан Сіз үшін алаңдап отырған сияқты?
- Біз, қазақтар шетке шыққан футболшыларымызды әрдайым қолдаймыз. Instagram-да пікірлер жазып, (жымиды) Қазақстан тарапынан жақсы қолдау көрсетеді.
- Байқаудан өтіп жатқаныңыз Сізді біраз қобалжыта ма?
- Әлбетте, байқауда жүрген соң барымды көрсеткім келеді. Ішкі қобалжуды жеңіп, толығымен ашыла білуім қажет. Бапкерлердің қырағы көзіне түсу үшін еңбектеніп жатырмын.
- Алаңдағы әріптестеріңізбен қалай тіл табысып жатырсыз?
- Кішігірім жарақатымның кесірінен жалпы топпен жаттықпадым. Негізгі топқа кеше келіп қосылдым.
Ермұхамед Мәулен
