Ахметжан Есімовтың айтуынша, Қордың компаниялар тобы штат санын қысқартуға жол бермей, барлық кәсіпорын жұмысын жалғастыруда. Сонымен қатар, "Самұрық-Қазына" ҰӘҚ" АҚ Басқарма төрағасы отандық денсаулық сақтау жүйесін қолдау бойынша жүргізіліп жатқан жұмыстар туралы хабарлады.
Тұңғыш Президент "Самұрық-Қазына" ҰӘҚ" АҚ-ның пандемиямен күресу және денсаулық сақтау жүйесін қолдау процесіне қатысуын ұлғайту қажеттігіне тоқталды.
"Қорды басқару жөніндегі кеңестің төрағасы ретінде "Самұрық-Қазынаның" ішкі резервтерінен ірі мегаполистерде – Нұр-Сұлтан және Алматы қалаларында екі медициналық орталықтың құрылысына қаражат бөлуді тапсырамын. Бұл медициналық орталықтар ғылыми-зерттеу әлеуетін нығайтуға арналған. Болашақ ұрпақты ықтимал қауіптерден қорғайды. Үкімет пен әкімдер бұл бастаманы қолдайтынына сенімдімін", – деді Нұрсұлтан Назарбаев.
Сөз соңында Қазақстанның Тұңғыш Президенті коронавирустық инфекциядан қайтыс болғандардың отбасыларына тағы бір мәрте көңіл айтты және қазақстандықтарды барлық қажетті қауіпсіздік шараларын қатаң сақтауға шақырды.
