Өкінішке қарай, Қазақстан құрамасы бұл турнирде жолдама ала алмады және Парижде толық құраммен өнер көрсетпейді. Оның үстіне тарихта алғаш рет әйелдер күресінен бірде-бір өкіл болмайды, деп хабарлайды inbusiness.kz сайты.
Жасыратыны жоқ, Қазақстанда күрес көптен бері дағдарысқа ұшырады. Салыстырмалы түрде айтсақ, көрші Қырғызстанда бұл спорт түрі керемет дамып келеді. Мұның бәрі Ақжол Махмудов пен Айпери Медет қызының халықаралық жетістіктерінің арқасында.
Қазақстанда Ризабек Айтмұханның Сербияда өткен әлем чемпионатындағы тарихи табысынан кейін азғантай серпілу байқалса да, айтарлықтай өзгеріс жоқ. Айтпақшы, онда Қырғызстан құрамасы бес медаль (үш алтын, бір күміс және бір қола) жеңіп алып, жалпы командалық үшінші орынды иеленді.
Ризабек Олимпиадаға бармайды, себебі ол 97 келі салмақ дәрежесіндегі бәсекені тәжірибиелі Әлішер Ерғали жеңіліп қалған. Еркін күрес палуандары арасында Париж-2024 додасына Азамат Дәулетбеков (86 келі), Жүсіп Батырмырзаев (125 келі) секілді сайыпқырандар барады.
Мадияр Құрамысовтың шәкірттері үш салмақ дәрежесі бойынша лицензия ала алмады. Мысалы 57, 65, және 74 келі салмақ дәрежесіндегі Олимпиада рұқсатнамасы қолға түспеді. Ал қыздар жағында бұл мәселе тіпті нашар. Барлық 6 салмақ дәрежесінде біздің қыздар іріктеу жарыстарын құртып алды. Тек Жәмилия Бақбергенова ғана жолдамаға жақын болды. Алайда, Бішкекте өткен іріктеу сайысында отандасымызға сәл ғана сәттілік жетіспеді.
Грек-рим күресі бойынша жолдамалар жағы әлдеқайда жақсы. Айдос Сұлтанғали (60 келі), Демеу Жадыраев (77 келі), Нұрсұлтан Тұрсынов (87 келі), және Әлімхан Сыздықов (130 келі) Париж Олимпиадасына жолдама жеңіп алды.
Десе де Олимпиада ойындарында алтын медаль аламыз деп үміттенбесек те болатындай. Күміс немесе қола жүлде қоржынымызға түсіп жатса, соған да шүкіршілік ететін секілдіміз. Қыздар құрамасының бас бапкері Қайрат Сағадиев Стамбұлдағы сәтсіздіктен кейін жарқын болашақта медаль алады-ау деген жастардың да жоқ екенін тілге тиек етті. Соның салдарынан шығар, Түркиядағы додаға ел намысын қорғауға 38 жастағы Елена Шалыгина барды.
Соңғы кездері талантты спортшылардың күресіп жүріп, кейіннен ақша қуып ММА секілді жертөледегі тайталастарға кетіп қалып жатқаны көңілді жабырқатады. Осыдан кейін елімізде кезінде дүркіреген күрес түрлері қатты ақсап жатыр. Бұл мәселеге кім нүкте қояды немесе кім көмек қолын созады, әзірге белгісіз.
