/img/tv1.svg
RU KZ
DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 417,69 Brent 36,55
Оралда кеме қағып кеткен әйелдің өлімі тергеліп жатыр

Оралда кеме қағып кеткен әйелдің өлімі тергеліп жатыр

Оның туыстары мен сараптамаға алынған қайық иелері тергеу барысына наразы.  

13:59 02 Тамыз 2020 545

Оралда кеме қағып кеткен әйелдің өлімі тергеліп жатыр

Автор:

Құралай Қуатова

БҚО-да Шаған өзенінде моторлы қайық қағып кеткен әйелдің өлімі жөнінде бұған дейін жазылған болатын. Өкінішке қарай, 40 жастағы Е.Ананьеваның денесінің жұлынып кеткен бөліктері ақыры табылмағандықтан, солай жерлеуге тура келген. Қазіргі күні тергеу амалдары жүргізілуде.

Алайда, полиция тергеу барысында сараптама жүргізуге алған кемелердің иелері наразылық білдіруде. Олардың айтуынша, бір жарым ай бойына оларға тиеселі жүзу құралдарын тәртіп сақшылары негізсіз ұстап отыр. Бірінішіден, қайғылы жағдай болған кезде олардың көпшілігі басқа жерде жүзіп жүрген; екіншіден, сараптама бір ай ішінде жасалуы тиіс болған.

«Осылайша, жаз мезгілі түгелдей өтіп кететін түрі бар. Ал тергеу үздіксіз созылып жатыр. Мен оқиға болған кезде сол жерде жүрген бір қайықты көргенімді айтқанмын, бірақ, одан бері де айға жуық уақыт өтті, мені жауап алуға бір де бір рет шақырған жоқ», – дейді Валерия Жукалина.

Қылмыстық іс бойынша сараптама жасау үшін барлығы жеті қайық алынған. Жукалинаның айтуынша, оның екеуінің көлемі кішкентай, көзі танитын адам олардың суда кісі қағып кетуі мүлкін еместігін бірден аңғарады; тағы біреуі ауға әбден шырмалып қалған, яғни көптен бері жүзбегені көрініп-ақ тұр. Бұдан бөлек, оларды сақтауда ешқандай техника талаптары сақталып отырған жоқ. Кемелер ішіне құйылып қойған жанар-жағармайларымен бірге күн түсіп тұрған, құрғақ жерге әкеліп қойылған. Оның үстіне, әйел кеменің винтіне оралып қаза тапқасын, су көліктерінің мұндай тетіктерін түгел бұрап шешіп алыпты. Кемелері жарамсыз болып қала ма деп те қорыққан олардың қожайындары жақын арада мүліктері қайтарылмаған жағдайда ҚРО Ішкі істер министрлігіне шағымданбақ ниетте.

БҚО полиция департаменті тергеу басқармасының бастығы  Николай Коломоцкий түсіндіргендей, сараптаманың созылып кетуіне оның қайда жасалатыны анықталмағаны себеп болып отыр. Егер ол Оралда емес, басқа өңірде жасалатын болса тағы да қосымша уақыт алуы мүмкін.

Сонымен бірге, Е.Ананьеваның туыстары да БАҚ арқылы тергеу барысына риза еместігін бірнеше рет мәлімдеген еді. Белгілі болғандай, Екатерина суға түскенде алысқа жүзбеген және жанында құрбысы болған. Куәгердің айтуымен және өздері де болған жайды зерттеп көрген марқұмның жақындары кеменің «Yamaha» фирмасының қара маторы орнатылған ақ түсті екенін, алдында әйнегі болғанын болғанын анықтаған. Оралда мұндай 150 ат күші бар мықты мотор төрт кемеде ғана бар екендігін полиция да жасырмаған. Соған қарамастан, кінәлілер әлі күнге анықталмауда.

Құралай Қуатова

Оралдағы қарттар үйіндегі қариялар дабыл қақты

Қайтыс болғандардың денесі мәйітханада жатып қалуда.

20 Шілде 2020 20:10 967

Оралдағы қарттар үйіндегі қариялар дабыл қақты

Орал қаласындағы арнайы әлеуметтік қызметтер көрсету орталығындағы даудың нүктесі қойылды. Бұған дейін әлеуметтік желіде бұрын қарттар мен мүгедектер үйі деп аталған мекеме тұрғындар видео жүктеп, қариялардың күн санап баудай түсіп жатқаны, ал мекеме басшылысының еңбек демалысына кетіп, соңғы екі медбикенің жұмыстан шығуға арыз жазғаны баяндалған болатын.

Осыған байланысты аймақтағы БАҚ өкілдеріне түсінік берген орталық директорының орынбасары Қаршыға Нұрмашевтың айтуынша, карантин кезінде қарт кісілердің өмірден өтуіне тек қана короновирус инфекциясы себепкер емес. Олардың барлығы дерлік – қандай да бір созылмалы дерті бар науқас ретінде тіркеліп тұрған. Бұдан бөлек, орталық пен жерлеу рәсімін өткізетін «Ритуал» мекемесінің арасында екі келісім-шарт болғанмен, шілде айында ол жердегі жерлеу қызметі уақытында атқарылмай, қайтыс болғандардың денесі орталық мәйітханасында жатып қалған.

«Арнайы әлеуметтік қызметтер көрсету орталығында 489 адам тұрып жатыр. Өкінішке қарай, 13-19 шілде аралығында 18 тұрғынға уақыт болды. Қазір қатаң карантин жариялап отырмыз. Орталықтың бас дәрігері өткен аптада өз еркімен қызметтен кетті. Орнына басқа маман алып жатырмыз. Бүгінде бізге №4 қалалық емхананың дәрігерлері мен эпидемиологтары көмектесіп отыр», – дейді Қаршыға Нұрмашев.

Ал короновирус инфекциясымен орталықта екі адам ауырған. Олардың біреуі қайтыс болып, екіншісі Батыс Қазақстан облыстық жұқпалы аурулар ауруханасында емделуде. Мекемедегі аға медбикенің міндетін атқарушы Майра Жазитова бұған дейін осында жатқан қарт кісілердің түгел ПЦР-тестілеуден өткенін, жақын арада екінші қайтара өтетіндерін айтады.

Сондай-ақ, бейнебаяндағы екі медициналық қызметкердің қиын-қыстау кезде жұмыстан шығып кеткені рас болып шықты. Дегенмен, әріптестері оларды кіналаудан аулақ. Карантин кезі орталық қызметкерлерінің жүйкесіне кәдімгідей салмақ түсірген. Оның үстіне, мекемеде жатқан егде жастағы жандарды күтіп-бағу да кез-келгеннің қолынан келе бермейді екен. Тағы белгілі болғаны, орталық қазірде дәрі-дәрмекпен және қорғаныш құралдарымен жеткілікті қамтылғанмен, медиктер аса тапшылық етіп тұр екен.

Орал қаласындағы арнайы әлеуметтік қызметтер көрсету орталығының директоры Әнуарбек Қабышев ресми түрде 2 шілдеден бастап заңды еңбек демалысына шыққан көрінеді. Алайда, оны жұмысқа кері шақырып алу жөнінде шешім қабылданған.

Құралай Қуатова

Орал 3D бойынша жобаланады

Қазақстанның батысындағы облыс орталығы енді 3D-жобалау технологиясы бойынша салынады.

03 Тамыз 2017 10:31 2711

Орал 3D бойынша жобаланады

Батыс Қазақстан облысы әкімінің орынбасары Арман Өтеғұлов Оралда іске асырылып жатқан «Смарт-сити – Ақылды қала» жобасы аясында болашақта салынатын үйлер мен әлеуметтік нысандарды 3D-жобалау механизмі іске қосылғанын хабарлады.

Еске сала кетейік,  3D -жобалау – дизайнерлік жобаларды үш өлшемде көруге болатын компьютерлік графиканың бір бөлігі,  бұл жерде сөз тұрғын үйді үш өлшемде көру туралы болып отыр. Бұл салынып жатқан не салу жоспарланған нысандардың соңғы нәтижесін көруге және оның қоршаған ортаға үйлесімділігін бағалауға мүмкіндік береді.

Одан бөлек 3D-жобаның тағы бір артықшылығы – нысанның жобасынан әлдебір кемшілік анықталса оған бірден түзету енгізуге болады, ал ол кейінірек шынайы нысанға көшіріледі. Нысанды 3D-жобалаумен қатар тиісті жобалық құжат та автоматты түрде жүргізіледі, яғни түзетулер жобалық-сметалық құжаттамаға автоматты түрде енгізіледі.

Арман Өтеғұловтың айтуынша, Оралда 3D-жобалау әлеуметтік нысандар мен тұрғын үйлердің құрылысын жоспарлауда қолданылады. Тапсырыс беруші құрылыс жұмыстары басталмас бұрын құрылыс үлгісі мен оның ішкі интерьерімен танысады, осының негізінде жобалық-сметалық құжаттама әзірленеді.

«Бұл құрылыс жұмыстарын дұрыс жүргізіп, кемшіліктер мен қателіктер жібермеуге мүмкіндік береді», – деп түсіндірді әкімнің орынбасары.

Арман Өтеғұловтың айтуынша, құрылыс саласындағы мұндай жаңашылдық қазіргі кезде Оралда іске асырылып жатқан «Смарт-сити – Ақылды қала» жобасымен байланысты болып отыр. Астанада да осыған ұқсас жоба іске асырылып жатыр, батыста бұл жоба халық өмірінің қауіпсіздігін, қоғамдық тәртіпті қамтамасыз ету, көлік қозғалысы ережелерінің сақталуы мен қоршаған ортаны қорғауға бағытталған.

«Финляндиялық инвесторлармен инновациялық технологияларды қолдануға, халықтың өмірін жақсартуға бағытталған жұмыс жалпы әлеуметтік-экономикалық саланы дамытуға жақсы ықпал етеді», – деді облыс әкімінің бірінші орынбасары. Орал қаласының аса маңызы аудандарына, әлеуметтік нысандары, аулалары мен көлік жолдарына бейнебақылау камералары орнатылады.

Жобаға Қазақстан тарапынан «Сергек» компаниясы қатысады. Компания 300 бейнебақылау камерасын орнату керек, қазірдің өзінде оның 200-і орнатылған. Мемлекеттік-жеке әріптестік барысында қала бюджетінен тағы да 100 камера орнатуға қаражат бөлінеді.

«Жоба облыс,  қала әкімдігі, сондай-ақ Финляндия, Ресей, Франция, Аустрия және отандық дамыту институттары өкілдерінің қатысуымен өткен инновациялық форум кезінде шетелдік және отандық компаниялар арасында жасалған меморандумға сәйкес іске асып жатыр», – деп нақтылады Арман Өтеғұлов.

Финляндия инвесторлары «Смарт-сити» жобасынан басқа да шараларға ат салысып, Батыс Қазақстан облысының нарығын құрылыс материалдарымен толтыруға  өз үлестерін қоспақшы. Әкімдік өкілінің мәліметі бойынша,  «Дженерал Финланд» фин компаниясы және ресейлік «Стеклосервис» ЖШС фин технологиясы бойынша құрылыс материалдарын шығаратын бірлескен жобаны іске қосады. 1 шілдеден бастап Батыс Қазақстан облысында «KAZAKH INVEST» ҰК» АҚ-тың өңірге қажетті инвестицияларды тартуға бағытталған өңірлік өкілдігі жұмыс істейтін болады.

Ал әзірге әкімдікте инвесторларға арналған интерактивті карта әзірленіп жатыр. Картада жоба және инвестицияға қатысты барлық ақпарат көрсетіледі, сондай-ақ Оралда жыл сайын өтетін халықаралық инвестициялық форум мен келешек инвесторларға арналған көрмемен аттас www.westkazinvest.kz сайты жұмыс істейді.

Әйгерім Сүлейменова, Игорь Воротной