DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 286,33 Brent 36,55
«Ортақ валюта болмайды»

«Ортақ валюта болмайды»

Ұлттық банк кесімді пікір білдірді. 

30 Қыркүйек 2019 15:38 7758

«Ортақ валюта болмайды»

Автор:

Абылай Бейбарыс

Еуразиялық даму банкінің басқарма төрағасы Андрей Бельяниновтың Еуразия экономикалық одағына мүше-мемлекеттердің қолданысына

ортақ валюта енгізуге қатысты келіссөз жүріп жатқаны туралы мәлімдемесі шындықпен жанаспайды. ҚР Ұлттық банкінің баспасөз қызметі осылай деп хабарлады.

Қаржы реттеушісінің түсіндіруінше, бұл Еуразия экономикалық одағы аясындағы келіссөздерге қайшы.

«Қолданысқа ортақ валюта енгізу мәселесі қарастырылған жоқ. Орталықтандырылған банк жүйесін құру туралы бастама да күн тәртібіне қойылған емес. Ақша-несие саясатын Ұлттық қаржы реттеушісінен жоғары органның бақылауына беру туралы әңгіме болған емес. Атап көрсетерлігі,

Еуразиялық даму банкі Еуразия экономикалық одағының жұмыс органы саналмайды. Сондықтан оның құзіреті келісімшартта нақтыланбаған», – деп жазды қаржы реттеушісінің баспасөз қызметі.

Ұлттық банктің хабарлауынша, Еуразиялық даму банкінің қызметі одаққа мүше-мемлекеттердің инфрақұрылымын, өндірістік және инвестициялық жобаларын қаржыландыруға  бағытталған.

Естеріңізге салайық, таяуда Еуразиялық даму банкінің басқарма төрағасы ресейлік басылымға берген сұхбатында қаржы нарығындағы ортақ экономикалық кеңістікке бірыңғай айырбас құралы қажет екенін айтты. Оның ойынша, рубль ортақ валютанының қызметін атқара алады. Себебі ол одаққа мүше-мемлекеттердің барлығында қолданылады.

Бұл мәселе бұған дейін де талқыланған. Ұлттық банк төрағасының орынбасары Олег Смоляков биыл жазда, сенатта осыған қатысты пікір білдірген. Ол WhatsApp арқылы тараған ақпаратты тілге тиек етіп: «Тарап жатқан барлық мәлімет жалған. Одаққа мүше-мемлекеттерде «Алтын» деген валюта қолданысқа  енгізіледі деген бос сөз. Мұндай мәселе көтеріліп, күн тәртібіне қойылған жоқ. Еуразия экономикалық одағының бірде-бір құжатында бұл туралы айтылмаған. Ортақ валюта болмайды», – деген. Айтпақшы, былтыр желтоқсан айында сол кездегі Ұлттық экономика министрі Тимур Сүлейменов Еуразия экономикалық одағына ортақ валюта енгізілмейтінін мәлімдеген.

«Қолданысқа ортақ валюта енгізу үшін валюта, бюджет саясаты үйлестіріліп, одаққа мүше елдердің барлығы бірдей экономикалық саясаттың ортақ ұстанымына, яғни бірыңға талапқа көшуі керек», – деген болатын Тимур Сүлейменов. Ол бұған қатысты осыдан 4 жыл бұрын да осыған ұқсас пікір білдірген.

«Еуразия экономикалық одағының келісімшартында ортақ валюта енгізу мәселесі қарастырылмаған. Сондықтан бұл сұрақты талқыламаймыз», – дегенді айтқан Тимур Сүлейменов.

Абылай Бейбарыс

inbusiness.kz-ті қараңыз, оқыңыз :

Қазақстан қолдамайды

ЕАЭО аумағында квази, прокси валюталарға жол берілмеуге тиіс.

19 Желтоқсан 2018 16:02 2612

Қазақстан қолдамайды

Қазақстан Ресей ұлттық төлем кеңесінің доллардан біртіндеп бас тарту үшін Еуразиялық экономикалық одақ (ЕАЭО) елдеріне электронды валюта енгізу  қажет деген бастамасын қолдамайды.

Ұлттық экономика министрі Тимур Сүлейменовтің сөзінше, бұл Ресей Федерациясы үкіметінің емес, ұлттық төлем кеңесі деңгейінде талқыланып жатқан мәселе. Яғни ресми мәлімделмеген бастама. Мұндай ұсынысты Қазақстан қаржыгерлер қауымдастығы да ұсына алады.

«ЕАЭО аумағында қолданысқа бірыңғай электронды валютаның енгізілуін қолдамаймыз. Ұлттық валюта – егемендігіміздің символы. Ол әнұран, ту,  елтаңба секілді. Сондықтан біз оны сақтап, дамытуымыз керек. Осыған орай қандай да бір квази, прокси валюталарға жол бермеуге тиіспіз», – деді Тимур Сүлейменов.

Ресей ұлттық төлем кеңесі жаңа валютаны Ресей, Армения, Беларусь, Қырғызстан және Қазақстан арасындағы сауда операцияларында электронды түрде қолдануды ұсынды. Мұндағылардың мәлімдеуінше, электронды валюта санкция қаупі төнген кезде есеп айырысуды жеңілдетеді.

Айта кетейік, трансшекаралық алыс-беріс барысында қолданылатын жаңа валютаның бағамы ЕАЭО елдері ұлттық валюталарының өзара қатынасына тәуелді болады-мыс.

РФ қаржы министрінің орынбасары Алексей Моисеевтің мәлімдеуінше, ЕАЭО елдеріне электронды валюта енгізу бастамасын қазірдің өзінде қолдап отырған бірнеше қаржы ұйымдары бар.

«Еуразиялық экономикалық одаққа ортақ болуы мүмкін жаңа валюта одаққа мүше елдерді доллардан бас тартқызуды көздейді. Электронды валюта еуроның пайда болуына түрткі болған Еуропадағы ЭКЮ сияқты болады. ЕАЭО-ның ақша бірлігі дәстүрлі фиат ақшаға айналмайды, клирингтік операцияларға ғана қолданылады», – деді Алексей Моисеев.

РФ қаржы министрі орынбасарының осылай деуі заңдылық, себебі бұл жерде  Ресейдің мүддесі жатыр.

Осы мәселеге қатысты экономист Мақсат Халық Abctv.kz тілшісімен ой бөлісті. Оның пікірінше, біріншіден, ЕАЭО аумағында электронды валюта қолдану ісі бүгін, ертең жүзеге аспайды. Екіншіден, одақ мүшесі ретінде Қазақстан бұған келісім бермейді.

«Қолданысқа электронды валюта енсе, ізінше ЕАЭО-ға ортақ валюта шығару мәселесі туады. Бұл ұлттық валютамыз – төл теңгемізге қауіп төндіреді. Әлемде Электронды валюта, ортақ валюта қолданыста бар нәрсе. Алайда ЕАЭО-ға мүше мемлекет ретінде бұл Қазақстанға қажет емес. Себебі ол біздің мүддеміз үшін жұмыс істемейді»,– деді Мақсат Халық. Ал экономист Рахым Ошақбаев БАҚ-қа берген сұхбаттарының бірінде бірыңғай валюта Қазақстан үшін жат нәрсе екенін айтты.

Оның ойынша, Қазақстан үшін ЕАЭО саяси емес, экономикалық одақ. Біз АҚШ, Қытай және Еуропа елдерімен де алыс-беріс жасаймыз. ЕАЭО мүшесіміз деп біздің ел Ресейдің айдағанына жүруге немесе әріптес елдермен арадағы экономикалық байланыстан бас тарта алмайды», – деді Рахым Ошақбаев.

Қанат Махамбет

inbusiness.kz-ті қараңыз, оқыңыз :

Жаңалықтарға жазылу: