/img/1920х100.png
/img/tv1.svg
RU KZ
DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 384,89 Brent 36,55
Отандық зауыттар «оталды»

Отандық зауыттар «оталды»

Мамырда елімізде 2 572 автокөлік құрастырылды.

16:13 15 Маусым 2018 7112

Отандық зауыттар «оталды»

Автор:

Фархат Әміренов

«ҚазАвтоӨндіріс» Қазақстан автомобиль саласы кәсіпорындары одағының хабарлауынша, қаңтар-мамыр аралығында отандық зауыттар жалпы құны 71,5 млрд теңге болатын 11 869 автокөлік құралын құрастырған. Бұл өткен жылдың сәйкес кезеңімен салыстырғанда 70,8%-ға артық. Құрастырылған техникалардың басым бөлігі (11 118) – жеңіл автокөлік. Жалпы, жеңіл автокөліктер өндірісі былтырғы жылмен салыстырғанда 77,5%-ға ұлғайып отыр.

Сондай-ақ, жыл басынан бері 135 автобус құрастырылыпты. Бірақ, бұл көрсеткіш былтырғы деңгейден 5,6%-ға төмен. Бұдан бөлек, жүк көліктерін құрастыру 3,2%-ға кеміген. Қаңтар-мамырда 365 жүк көлігі өндірілген. Осы уақыт аралығында нарыққа жол тартқан мамандандырылған арнайы автотехникалар саны – 56. Бұл өткен жылғы деңгейден жоғары. Былтыр 38 арнайы автотехника құрастырылған болатын. Сонымен қатар, тіркеме өндірісі де өсім көрсеткен. Былтыр 130 тіркеме құрастырылса, биыл 195 тіркеме зауыттан шыққан.

Ал мамыр айының қорытындысы бойынша 2 572 автокөлік құрастырылыпты. Аталған көрсеткіш былтырғы деңгейден 34,4%-ға артық. Былтыр мамырда 1 913 автокөлік нарыққа жол тартқан еді.

Соңғы бес айда 10 202 отандық автокөлік сатылған. Ал былтыр 5 320 көлік өз иесін тапқан еді. Бір жылдағы айырмашылық 91,8%-ды құрап отыр. Отандық автоөндірістің нарықтағы үлесі 33,7%-дан 47,3%-ға ұлғайған.

Әдеттегідей, отандық автоөндіріс саласында «АЗИЯ АВТО» АҚ көш бастап тұр. Компания жыл басынан бері 5 786 техниканы құрастырған. Бұл бес айда өндірілген жалпы көлік санының 56,7%-ына тең. Одан кейінгі орынға «СарыарқаАвтоӨндіріс» ЖШС (3 915 техника құрастырған, жалпы үлесі – 38,4%) жайғасқан. Сондай-ақ, тізімде «СемАЗ» ЖШС (210 техника, 2,1%), «КАМАЗ-Инжиниринг» АҚ (162 техника, 1,6%), «Hyundai Trans Auto» ЖШС (74 техника, 0,7%) және «Daewoo Bus Kazakhstan» ЖШС (55 техника, 0,5%) компаниялары бар.

Ал ел тұрғындары тарапынан сұранысқа ие бренд – Lada. Қаңтар-мамырда сатылған көліктердің 4 537-сі осы брендке тиесілі. Сондай-ақ, қазақстандықтар Hyundai (2 454 бірлік), KIA (1 007 бірлік), JAC (526 бірлік) және Ravon (508 бірлік) брендтеріне де қызығушылық танытады екен.

Жеңіл автокөліктер сатылымында алғашқы үштікке Lada брендінің модельдері енген. Нақтырақ айтсақ, жыл басынан бері 1 336 бірлік Lada Granta, 1 275 бірлік Lada 4x4, 804 бірлік Lada Vesta өз иесін тапқан. Сонымен қатар, қазақстандықтар Hyundai Tucson (774 бірлік) мен Hyundai Accent (611 бірлік) көліктеріне де қызғушылық танытады.

«ҚазАвтоӨндіріс»-тің мәліметінше, қаңтар-мамыр аралығында жеңілдетілген автонесие мемлекеттік бағдарламасының қатысушыларына 2 063 автокөлік берілген. Бұл – жалпы автокөлік сатылымының 20,2%-ы.

Бес айдың қорытындысы бойынша отандық автозауыттардың жалпы ішкі өнімге қосқан үлесі 71,5 млрд теңгеге тең болған. Бұл бір жыл бұрғынғы көрсеткіштен 82,3%-ға жоғары.   

«ҚазАвтоӨндіріс» Қазақстан автомобиль саласы кәсіпорындары одағы директорлар кеңесінің төрағасы Олег Алфёровтің сөзінше, отандық зауыттар өндіріс көлемін тұрақты түрде ұлғайтып келеді. Мәселен, мамыр айында өндіріс үш есе артқан.

«Отандық автокөліктер сатылымы мамыр айында жақсы нәтиже көрсетті. 2015 жылдың ортасынан бастап есептегендегі ең үздік көрсеткіш осы айда тіркеліп отыр. Жыл басынан бері импорттық автокөліктер сатылымы 9%-ға өссе, отандық көліктерге деген сұраныс екі есе ұлғайды. Қазақстанда құрастырылған көліктерге деген сұраныс жоғары болып отыр. Бұл тенденцияның сақталып келе жатқанына біршама уақыт болды», – дейді Олег Алфёров.

Фархат Әміренов

Павлодарда қытай тракторлары құрастырылады

Ауыл шаруашылығы техникасы Ресей, Өзбекстан және Қырғызстан мемлекеттеріне экспортталады деп күтілуде.

22 Желтоқсан 2019 15:16 5462

Павлодарда қытай тракторлары құрастырылады

Павлодар қаласында тракторлар құрастырылатын болды. Ауыл шаруашылығы техникасын қазақтар мен қытайлар бірлесіп шығармақ. Қазіргі уақытта жобаны жүзеге асыру үшін «KSW Agrotech» компаниясы құрылды. Компанияның 40 пайызы қазақтардың үлесіне тиесілі де, қалған 60 пайызы қытайлық «Wan E» компаниясының еншісінде.

«KSW Agrotech» ЖШС бас директоры Рустам Ибрагимовтың айтуынша, жобаның техникалық-экономикалық негіздемесі дайын. Жақын уақытта құрастыру желілерін жеткізу үшін алдын-ала төлем жасалмақ.

Тракторларды құрастыру үшін Павлодардағы бұрынғы автобаза пайдаланылмақ. Техниканың қуаттылығы 300 аттың күшіне тең болмақ. Тракторлардың алғашқы легі 2020 жылғы күзгі жиын-терім жұмыстарына дейін дайын болады деп күтілуде.

Жалпы, жобаны жүзеге асыру үш кезеңнен тұрады екен. Алғашқы кезеңде автобазаның қолданыстағы инфрақұрылымын пайдалана отырып, жылына 3000 трактор құрастыру қолға алынады.

«Егер бәрі жоспар бойынша жүретін болса, 2021 жылы «Павлодар» арнайы экономикалық аймағының аумағынан әлдеқайда үлкен кәсіпорын салуды бастаймыз. Бұл кәсіпорынның қуаттылығы жылына 30 мың техника құрастыруға дейін жетпек. Болашақта аталған өндірісті Павлодар облысында біржола дамытып, металл бұйымдары мен ауыл шаруашылығы техникаларына арналған бөлшектерді шығармақпыз», – деді Рустам Ибрагимов.

Бас директордың сөзінше, компания шығарылған өніммен ішкі нарықты қамтып, кейін Ресей, Өзбекстан және Қырғызстан мемлекеттеріне экспорттауға ниетті.

«Біздің өнімнің басты артықшылығы бағасы болмақ. Трактордың құны шамамен 130-150 мың долларды құрамақ. Ал дәл осындай америкалық, еуропалық техникалар 500-700 мың доллар тұрады. Оның үстіне біз тракторларды лизингке беруге және ауыл шаруашылығы өнімдеріне айырбастауға әзірміз», – дейді «KSW Agrotech» компаниясының басшысы.

Белгілі болғандай, Қытай тарапына құрастыру желілерімен, техника бөлшектерімен және қаржылық тұрғыдан қамту жүктелген. Ал қазақстандық тараптың мойнына өндірістік база және қаржылық қолдау артылған.

Өкінішке қарай, жобаның құны туралы нақты ақпарат жоқ. Тараптар мұндай ақпаратты жарияламай отыр.

«ФИНАМ» компаниясының сарапшысы Алексей Калачев kursiv.kz порталына берген сұхбатында мұндай өндірістердің құны аса қымбат болмайтынын атап өтіпті.

«Егер база дайын болса, онда өндіріске қомақты инвестиция қажет емес. Ғимараттар дайын тұрса, демек инженерлік коммуникациялар да бар деген сөз. Әрі кетсе жөндеу жұмыстарын жүргізер. Оның үстіне қытайлық құрастыру желілері аса қымбат тұрмайды. Меніңше, аталған жобаға салынатын жалпы инвестиция көлемі 500 мың доллардан аспайды және 3-5 жылдың ішінде өзін ақтап шығуға тиіс», – дейді Алексей Калачев.

Еске сала кетейік, бұған дейін Павлодарда трактор зауыты жұмыс істеген болатын. 1966 жылы құрылған зауыт 1999 жылы жабылып қалған еді. Бүгінде бұрынғы трактор зауытының ғимараттарын «Кастинг» және «KSP Steel» кәсіпорындары пайдаланып отыр.

Фархат Әміренов

Жаңадан сатып алынған әр екінші көлік Қазақстанда жасалған

Автоөндірушілер келер жылы абсолют рекорд орнатпақ.

11 Ақпан 2019 11:38 14552

Жаңадан сатып алынған әр екінші көлік Қазақстанда жасалған

Былтыр Қазақстанда 30 мың көлік құрастырылды. Бұл алдыңғы жылмен 78,8% пайызға артық. Айта кетейік, 2013, 2014 жылдары Қазақстанда шығарылған көліктер саны тиісінше 37,5 және 36,2 мыңға жеткен еді. Дегенмен, 2016 жылы көрсеткіш 5,2 мыңға дейін құлдырап кеткен болатын.

Құрастырылған көліктердің 60,8%-ы, яғни 18,3 мыңы Шығыс Қазақстан облысына тиесілі. Өскемендегі «Азия Авто» АҚ өндірісті былтырғыдан 59,9%-ға көбейтіп отыр. Осы зауыттың өзі биыл өндірісті 30 мыңға жеткізуді жоспарлап отыр екен. Зауыт серіктестерінің қатарында Volkswagen Group, General Motors, Renault-Nissan-АвтоВАЗ мен KIA Motors концерндері бар екені белгілі. Зауыт LADA (Granta, Vesta, Xray, Largus, Kalina, 4×4), ŠKODA (Octavia, Rapid, Superb, Yeti, Kodiaq), Chevrolet (Aveo, Captiva, Cruze, Tracker), KIA (Rio, Cerato, Optima, Cadenza, Quoris, Picanto, Soul, Sportage, Sorento, Mohave) көліктерін шығарады.

Компания басшылығының мәліметінше, былтыр компания конвейерінен 14 жаңа және жаңартылған модельдер шыққан. 2019 жылы олардың қатарына тағы 6 модель мен 4 бренд қосылмақ. Қазіргі таңда Қазақстанда жаңадан алынған әрбір үшінші көлік осы зауыттан шығады екен.

Қазақстанда шығарылған көліктердің 39,2%-ы Қостанай облысына тиесілі. Қостанайда былтыр шыққан көлік саны алдыңғы жылдағыдан екі есеге өсіп, 11,8 мыңға жеткен. Қостанайдағы «СарыарқаАвтоӨнеркәсіп» ЖШС JAC, Peugeot, IVECO, ANKAI, Hyundai, Ravon, Chevrolet Niva көліктерін шығарып, Қазақстанның барлық өңірінде дилерлік орталықтар ашқан.

Алдын ала болжам бойынша, 2019 жылы Қазақстанда шығарылған автокөлік саны 40 мыңнан асып, абсолют рекордқа жетпек.

Алдыңғы жылы қазақтардың сатып алған жаңа көліктерінің әрбір үшіншісі отандық өнім болса, былтыр әрбір екінші көлік Қазақстанда құрастырылған екен. Осы орайда импортталатын көліктер саны да былтыр ішкі өндірістің өсуі себепті 3,3% азайған.

«ҚазАвтоӨнеркәсіптің» мәліметінше, өткен жылы ресми дилерлер 57,9 мың көлік сатып, былтырғы көрсеткішті 24,9% көбейткен. Сатылым көлемі көбейгенімен, экспорттың былтырғыдан азайып кеткені байқалады. Мәселен, алдаңғы жылы Қазақстан шығарылған көліктің 4,4 пайызын шетелге сатса, былтыр көрсеткіш 1%-ға түсіп кеткен екен.

Сонымен қатар, былтыр Қазақстан бойынша сатылған барлық көліктің 29,6 мыңы яғни 51,1%-ы импорт болса, 28,3 мыңы 48,9%-ы отандық өнім болған.

Айта кетейік, жақында Ұлттық банк басшысы Данияр Ақышев «7-20-25» бағдарламасы секілді отандық автокөліктерді несиелендіруге арнайы бағдарлама бекіту керектігін ұсынған. Мемлекет басшысы ұсынысты толығымен қолдайтынын айтып, автокөлік өндірісінің артуы экономикаға жан-жақты пайда әкелетінін мәлімдеген. Осы орайда автоөндірушілердің келер жылға 40 мыңды көздеп отырғаны бекерге емес секілді.  

Қазақстанда ең өтімді көліктердің көш басында Lada (13,4 мың сатылған), одан кейін Toyota (12,3 мың) Hyundai (8,7 мың), KIA (2,9 мың) және GAZ (2,7 мың) көліктері. Сонымен қатар үздік ондықта Nissan (2,4 мың), Renault (2 мың), Ravon (1,7 мың), Volkswagen (1,5 мың) және UAZ (1,5 мың) бар. Отандық өнімдер ішінде ең көп сатылатыны Skoda (835 көлік), Ravon (552), Peugeot (149) және SsangYong (16).

Қазақстандық ең ірі дилер ретінде «Бипек Авто – Азия Авто» сақталуда. Бұл компания былтыр ел бойынша сатылған барлық көліктің 31,5%-ын сатқан екен. Тағы 22,8%-ын «Астана Моторс» компаниясы сатса, үздік ондық ішінде «Вираж» (8%), «Тойота Сити Алматы» (5,3%), Allur Auto (2,5%), Mercur Auto (2,5%), «Тойота Жетісу Орталығы» (2,3%), Aster Auto (2%), «Автомир» (2%) и «Тойота Атырау Орталығы» (1,2%) бар.

Жаңа авто ең көп сатылған өңір ретінде Алматы қаласы аталады. 2018 жылы алматылықтар 15,5 мың авто сатып алса, Астана тұрғындары 10,4 мың, атыраулықтар 4,3 мың жаңа көлік мінген. Одан кейін тиісінше Шымкента (3,8 мың), Қарағанды (3,6 мың), Қостанай (3,5 мың), Орал (2,6 мың), Өскемен (2,4 мың), Ақтау (2,3 мың) және Ақтөбе (2,1 мың) қалалары.

Бауыржан Мұқан