Сауд Арабиясында өткен жастар арасындағы Азия чемпионатының финалында Өзбекстан жеңіске жетті.
Алаң қожайындарымен өткен шешуші матчта өзбек жасөспірімдері алғашқы таймда 2 ойыншыдан айырылып (Нұрбек Сарсенбаев – 40’, Миразиз Абдукаримов – 45+2’), тоғыз ойыншымен қалды.
Соған қарамастан есепті ғана ұстап қалмай, 2 гол соғып жеңіске жетті. 51 минутта Мұхаммад Хакимов пенальтиден есеп ашса, 70-минутта Садриддин Хасанов екінші голды соқты.
Осылайша, Өзбекстан бұл жас санатында екінші рет Азия чемпионы атанып отыр (бірінші рет – 2012 жылы, ол кезде турнир U-16 ретінде өтті).
Команда енді 2025 жылдың қарашасында Қатарда өтетін U-17 әлем чемпионатына қатысады. Бұл Өзбекстанның жастар арасындағы төртінші әлем чемпионаты болмақ.
Сондай-ақ, Тәжікстан да ерекше көзге түсті. Олар алғаш рет ширек финалға дейін жетіп, Оңтүстік Кореямен тең ойнап (2:2), пенальти сериясында жеңілді.
Бүгінде Өзбекстанның футбол академиясынан шыққан дарынды ойыншылар жаңа буынның көшбасшысы болып келеді. Өзбек футболы халықаралық аренада жаңа деңгейге көтерілуде.
