Дзюдодан Олимпиада чемпионы атанған тұңғыш қазақ Елдос Сметов пен қола жүлдегер Ғұсман Қырғызбаев елге оралды, деп хабарлайды inbusiness.kz сайты.
Дзюдо федерациясы Ғұсман Қырғызбаевқа көлік сыйлады. Парижден елге ұшып келген Олимпиаданың қола жүлдегері Ғұсман Қырғызбаев су жаңа темір тұлпарымен үйіне қайтты.
Сонымен қатар, Елдос Сметов тұратын көшеге жаңа асфальт төселгені түсірілген видеоролик тарады. Аталған видеороликте кадр сыртындағы дауыс бұл көшеде Елдос Сметовтің тұратыны және оның келуіне орай жаңа жол төселгенін айтады. Ал, чемпионның үйінің алдына жол салушылар асфальтті аямай құйғаны көрініп тұр.
Естеріңізге салсақ, Парижде өтіп жатқан Олимпия ойындарында барша Қазақстандықтар тарихи жеңістің куәсі болды. Дзюдодан екі бірдей қандасымыз жоғары нәтижеге қол жеткізіп, жеңіс тұғырынан көрінді.
Жекелей сында 60 келі салмақ дәрежесінде сынға түскен спортшымыз Елдос елімізге Париж Олимпиадасының алғашқы алтынын сыйлады.
Ал, 66 келі салмақта өнер көрсеткен спортшымыз Ғұсман Қырғызбаев үздік үштікті түйіндеді.
