/img/tv1.svg
RU KZ
DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 426,85 Brent 36,55
Пәтер бағасы: қай қалада қанша?

Пәтер бағасы: қай қалада қанша?

Өткен айда Атырау, Қызылорда, Түркістан облыстарында үй сату көрсеткіші төмен болды.  

14:42 12 Шілде 2019 15265

Пәтер бағасы: қай қалада қанша?

Автор:

Абылай Бейбарыс

Әділет министрлігінің мәліметінше, 2019 жылдың алғашқы 6 айында тұрғын үй сату мен сатып алуға қатысты 144 299 мәміле жасалды. Ал осыдан бір ай бұрын, яғни маусым айында 29 543 үй сатылды. Өткен айда үй алғандардың саны мамырда үй алғандардан 7,4%-ға артық болды.  

2019 жылдың қаңтар-маусым айларындағы тұрғын үй сату мен сатып алу көрсеткішін өткен жылдың сәйкес кезеңімен салыстыратын болсақ, биыл рәсімделген мәміле бір жылда 21,2 %-ға ұлғайды.  

Статистика агенттігінің дерегінше, тұрғын үй нарығындағы алыс-берісте Алматы қаласы көш бастаған. Мұнда маусым айында 4,4 мың үй сатылып, бір жыл бұрынғы көрсеткіш 45%-ға көбейген.

Нұр-Сұлтан қаласында өткен айда 4 мың мәміле жасалған. Үздік үштікті Қарағанды облысы тұйықтаған. Бұл өңірде өткен айда 3,3 мың адам тұрғын үй нарығының көрігін қыздырған.

Маусым айында Атырау, Қызылорда, Түркістан облыстарының тұрғындарын тұрғын үй нарығы қызықтырмаған. Сәйкесінше Атырау облысында - 584, Қызылорда облысында - 648, Түркістан облысында - 738 үй сатылған.

Өткен айда тұрғын үй нарығындағы баға сатушылар үшін оң, сатып алушылар үшін теріс динамика көрсеткен. Мамыр айымен салыстырғанда әрленген пәтер бағасы - 0,6%-ға, әрленбеген пәтер құны - 0,5%-ға, ал жаңа тапсырылған тұрғын үйлердегі пәтер бағасы - 0,1%-ға өскен.

Тұрғын үйді жалға алу нарығында да өсім байқалған. Меншік иелері пәтер жалдаушылардан бір ай бұрынғы көрсеткіштен 0,3% артық ақша алған.

Тұрғын үй нарығындағы сату мен сатып алу көрсеткішінің жақсаруына «7-20-25» ипотекалық бағдарламасы оң ықпал еткен. Бағдарлама аясында бүгінге дейін баспаналы болғысы келген 8 844 отбасыға несие түрінде 101,9 млрд теңге қарыз берілген.

«Баспана» ипотекалық компаниясы» АҚ коммуникациялар қызметі басшысының орынбасары Айбар Олжаевтың айтуынша, Нұр-Сұлтан қаласы  тұрғындарының бағдарламадағы үлесі 34%-ды, ал алматылықтардың үлесі 21%-ды құраған.

Бірінші жартыжылдықта тұрғын үй бағасы айтарлықтай қымбаттаған. Бұл туралы krisha.kz порталы: «2019 жылдың алғашқы алты айында Қазақстанның тұрғын үй нарығында қымбатшылық байқалды. Нақты қалаларға бөлетін болсақ, Петропавловда +4, 6%, Өскеменде +4,4 %,  Шымкенте +3,7 % өсім болды. Петропавлда тұрғын үйдің бір шаршы метрі - 205 985, Өскеменде - 189 175, Шымкенте - 229 050 теңгеден сатылды», – деп жазды.

Белгілі болғандай, Павлодарда баға 3,4 %-ға өсіп, бір шаршы метр 180 600 теңгеден саудаланған. Ақтауда үйдің құны 2,8 %-ға қымбаттап, бір шаршы метрдің құны 201 425 теңгені құраған. Қостанай, Орал қалаларында тұрғын үйдің орташа бағасы 2,5 %-ға ұлғайып, 200 050 және 189 275 теңге шамасында болған.

Алматыда тұрғын үйдің бір шаршы метрі - 382 575, ал Нұр-Сұлтанда - 338 775 теңгеден саудаланған.

Қазір талдықорғандықтар тұрғын үйдің бір шаршы метрін - 181 425, тараздықтар - 157 300, көкшетаулықтар - 197 875, қарағандылықтар - 204 225, семейліктер - 171 925 теңгеден сатып алып жатыр.

Абылай Бейбарыс

Павлодардағы таун-хаустар сатылмай жатыр

Әуежай қалашығындағы 55 үйді сатып алуға 30 адам ғана өтініш берген.  

11 Маусым 2020 21:36 3340

Павлодардағы таун-хаустар сатылмай жатыр

Павлодар қаласының әуежайы маңында мемлекеттің көмегімен салынып жатқан 55 тұрғын үйдің құрылысы аяқталуға таяу. Бұл аумақта жекелеген тұрғындардың тұрғызып жатқан баспаналары да бар.  Аумақ Кенжекөл ауылдық округіне қарағандықтан, жергілікті әкімдік тұрғын үйлерді «Нұрлы жол» бағдарламасы арқылы сатуда. Бірақ, көркі көз тартатын жаңа үйлер өтпей жатыр.  Себебі, аталмыш үйлер орталық жылу құбырына қосылмаған.

Бұл аумақ Әуежай қалашығы деп аталады. Мұндағы жеке үйлер құрылысына жер телімін беру ісі 2007 жылы қолға алынған болатын. Сол кезде жер кодексінің талабына сәйкес, кезекте тұрған азаматтарға 10 соттық жер тегін үлестірілді. Өкінішке қарай, инженерлік инфрақұрылым (электр желісі, су және канализация құбырлары, жылу көзі) тартылмағандықтан, жер учаскесінің иелері 10 жылдан астам уақыт бойы құрылысты бастай алмай келді. Бұл мәселе көптен бері айтылып та келеді.

2018 жылға дейін электр қуатын тарту мәселесі ғана шешімін таппады. Дәл осы жылы 400 млн теңгеден астам соманы құрайтын электр қуатын тарту бойынша жоба қолға алынды. Павлодар қалалық құрылыс бөлімінің тапсырысы бойынша, республикалық бюджеттен екі кезеңмен бөлінген қаржыға электр желісі екі жыл бойы тартылды. Нәтижесінде 2019 жылы тұрғындар электр көзіне қосылуға техникалық рұқсат қағаздарын алып, армандаған мүмкіндікке қол жеткізе бастады. Бірақ, орталық су құбыры және канализация жүйелері дайын болмай шықты.

Белгілі болғандай, аталмыш құбырлар тартылған, бірақ жер учаскесінің иелері әлі күнге дейін оларға қосылуға болатынын-болмайтынын анық білмей дал. Осылайша, орталық жылу желілеріне қосылу туралы мәселе басы ашық күйінде қалып отыр.

Жоғарыда бұл аумақта жергілікті биліктің 55 жеке тұрғын үй салып жатқанын айтты. Осы орайда, әуелде 15 соттықтан иеленген 400-ден астам адамның 120-сынан көбі учаскелерді уақытында игере алмауына байланысты мемлекетке қайтаруға мәжбүр болды. Аталған Әуежай қалашығына кіретін ИЖС-1 және ИЖС-1А  алаңдарында бірыңғай типтегі 2 қабатты таун-хаус және 1 қабатты жеке үйлер салынуда. Пәтерлердің 1 шаршы метрі «Нұрлы жер» бағдарламасымен 120 мың теңгеге ұсынылып отыр. Алайда, ауданы 120 шаршы метрден асатын, 2 қабатты таун-хаустарды сатып алған адамдар үйін жеке пешпен жылытуға мәжбүр болады. Себебі, әуежай қалашығына орталық жылу құбыры тартылмаған.

Әуежай қалашығында салынып жатқан 55 үйдің құрылысы аяқталып қалды. Жұртшылыққа ол үйлерді түрлі бағдарламалар арқылы сатып алу ұсынылуда. Барлығы 30 адам өтініш беріп, 8-і ғана төлем қабілетін растаған. Алайда, өтініші қабылданған азаматтар да шағын ауданға халық толық қоныстанбаса, олар да көше алмайтынын айтуда. Ал толық қоныстану мәселесі жылумен қамту проблемасы шешілгеннен кейін мүмкін екені айтпаса да түсінікті.

Басынан соры арылмай келе жатқан Әуежай қалашығында кейінгі жоспар бойынша, 200 балаға арналған 2 балабақша, мектеп, сауда орталығы, әмбебап дүкен, өрті сөндіру депосы және демалыс саябағын салу қарастырылған.  Айтпақшы, бұл жерде 2000 жылдың басынан бері «Балалар ауылы» қоныстанып, қызмет көрсетіп келеді. Жылумен қамту мәселесі шешілсе, қалада жаңадан шағын аудан пайда болмақ.

Фархат Әміренов

«5-10-20»: Павлодардағы үйлердің бағасы 12 млн теңгеден аспауы керек

Жергілікті әкімдіктер салған несиелік үйлердің бір шаршы метрі үшін белгіленген баға – 160 мың теңге.

22 Мамыр 2020 15:23 5291

«5-10-20»: Павлодардағы үйлердің бағасы 12 млн теңгеден аспауы керек

Ел президенті тұрғын үй кезегінде тұрған азаматтардың баспана мәселесін шешу үшін «Нұрлы жер» бағдарламасының кезекті бағыты ретінде «5-10-20» ипотекалық бағдарламасын әзірлеуді тапсырды. Қазір жаңа бағдарламаның талаптары жан-жақты пысықталып, қанатқақты жоба ретінде қарастырылуда. Бағдарлама 1 шілдеде қабылданады деген болжам бар.

«Тұрғын үй құрылыс жинақ банкі» АҚ Павлодар облыстық филиалының директоры Талғат Баиловтың айтуынша, қазірдің өзінде бірқатар талаптары белгілі. Біріншіден, баспана алуға ниетті тұрғын жергілікті атқару органында тұрғын үй кезегінде тұруға тиіс. Екіншіден, алғашқы жарна ретінде пәтер құнының кемінде 10 пайызын төлеуі керек. Сол кезде ипотекалық несие 5 пайыздық мөлшерлемемен 20 жылға дейін беріледі.

«Павлодар облысында жеке құрылыс компаниялары ұсынған жаңа үйлердің бағасы 12 млн теңгеден аспауы керек. Ал жергілікті әкімдіктер салған несиелік үйлердің бір шаршы метрі үшін белгіленген баға – 160 мың теңге. Осы сомадан аспауы керек», – дейді Талғат Баилов.

Сонымен қатар, «Тұрғын үй құрылыс жинақ банкі» жанынан жыл соңына дейін «Отбасы банкі» құрылады. Бұл институт баспанаға мұқтаж азаматтарды есепке алу, тіркеу және тұрғын үйді үлестірумен айналысатын болады.

«Тұрғын үй кезегіндегі азаматтардың қай бағдарлама бойынша баспаналы болатыны тұрғын үй қолжетімділігі сатысына сәйкес бағаланады. Атап айтқанда, табысы төмен, яғни отбасының бір айлық кірісі жан басына шаққанда бір күнкөріс минимумынан аспайтын отбасыларға сатып алу құқығынсыз үйді жалға алу мүмкіндігі ұсынылады. Екі күнкөріс минимумына дейін табыс табатын көпбалалы, толық емес және мүмкіндігі шектеулі балаларды тәрбиелеп отырған отбасылар «Бақытты отбасы» бағдарламасына, ал 3,1 күнкөріс минимумына дейін табысқа ие баспанасыз отбасылар «5-10-20» жобасына қатыса алады. 2020 жылдың 1 сәуірінен бастап күнкөріс минимумы 32 668 теңгеге дейін өсті. Осылайша, «5-10-20» арқылы баспаналы болу үшін жан басына шаққандағы отбасы табысы 101 270 теңгеден аспауы тиіс», – деді Талғат Баилов.

Оның сөзінше, «Бақытты отбасы» бағдарламасында төлем қабілеттілігін растау кезінде мемлекеттен алатын түрлі төлемдер есептеледі. Ал «5-10-20» бағдарламасына қатысты мұндай талаптың болар-болмасы әзірше белгісіз.

«Павлодар облысында тұрғын үй кезегінде тұрған адам «5-10-20» бағдарламасы бойынша басқа аймақтан үй ала алмайды. Бүгінде аймағымызда 27 мыңнан астам адам кезекте тұр. Олар аталмыш бағдарлама арқылы Павлодар облысының аудан-қалаларынан ғана баспаналы бола алады», – деді облыстық филиал директоры.

Тұрғындар үшін тиімді жобаларының бірі - «Бақытты отбасы» бағдарламасы. Бағдарлама арқылы тұрғын үй кезегінде тұрғандар үй бағасының 10 пайызын алғашқы жарна ретінде төлеп, 20 жылға дейін жылдық 2 пайыздық мөлшерлемемен несие ала алады.

«Наурыз айында Павлодар қалалық қаржы бөлімі 497 өтінішті қабылдап, түрлі себепке байланысты 15 өтінішті кері қайтарды. Қалған 482 өтінішті қарастырып, біздің банкке 338 жолдама берді. «Тұрғын үй құрылыс жинақ банкі» аталмыш бағдарлама бойынша өтініштерді қарастыру үшін міндетті түрде жергілікті әкімдіктен жолдама берілуі керек. Бүгінде 338 өтініштің 76-сы мақұлданды», – деді Талғат Баилов.

Фархат Әміренов