/img/tv1.svg
RU KZ
Павлодар облысына жаңа әкім тағайындалды

Павлодар облысына жаңа әкім тағайындалды

Енді өңірді Әбілқайыр Сқақов басқарады.

08:26 21 Қаңтар 2020 4683

Павлодар облысына жаңа әкім тағайындалды

Автор:

Фархат Әміренов

Фото: azattyq-ruhy.kz

Жаңа әкімді бүгін таңертең ҚР Премьер-министрі Асқар Маминнің өзі әкеп таныстырды.

Әбілқайыр Бақтыбайұлы Сқақов Павлодар облысының тумасы. 1974 жылы дүниеге келген. Жаңа қызметке тағайындалғанға дейін Қазақстан Республикасы Қаржы министрлігінің қаржы мониторингі комитетінің төрағасы қызметін атқарды.

Мамандығы – салықшы, қаржыгер. 

Ақмола қаржы-экономикалық техникумын, Шәкәрім атындағы Семей мемлекеттік университетін, Қазақ құқықтану және халықаралық қатынастар институтын, М.В.Ломоносов атындағы Мәскеу мемлекеттік университетін тәмамдаған. 

1995 жылдан 2005 жылға дейін Павлодар облысы бойынша салық инспекциясының маманы, салық инспекторы, аға салық инспекторы, бөлім бастығы, Павлодар қаласы бойынша Салық комитеті төрағасының орынбасары қызметтерін атқарған.

2005-2006 жылдары Павлодар облысы қазіргі Тереңкөл ауданы бойынша Салық комитетінің төрағасы, 2006-2008 жылдары Павлодар облысы Денсаулық сақтау департаменті директорының орынбасары, 2008-2010 жылдары Павлодар облысы бойынша Салық департаментінің Павлодар қаласы бойынша салық басқармасының бастығы, 2010-2012 жылдары Қостанай облысы бойынша Салық департаментінің бастығы болып еңбек еткен. 

2012-2014 жылдары Қазақстан Республикасы Қаржы министрлігінің Салық комитеті төрағасының орынбасары, 2014 жылдан 2016 жылға дейін Астана қаласы бойынша Мемлекеттік кірістер департаментінің басшысы, 2016 жылғы 1 желтоқсаннан 2019 жылдың сәуіріне дейін Қорғаныс министрінің орынбасары болып қызмет атқарды.

2019 жылдың сәуірінен бүгінгі тағайындауға дейін ҚР Қаржы министрлігі Қаржы мониторингі комитетінің төрағасы болып еңбек етті. 

«Қазақстан Республикасының тәуелсіздігіне 20 жыл» (2011), «Ерен еңбегі үшін» (2014), Салық қызметінің үздігі (2011), Қаржы қызметінің үздігі (2012), Мемлекеттік қызмет үздігі (2014) төсбелгілерімен марапатталған. 

Еске сала кетейік, Павлодар облысын бұған дейін Болат Бақауов басқарған болатын. Ол бұл қызметке 2016 жылдың 25 наурызында тағайындалған еді. Ал 2020 жылдың 15 қаңтарында қызметін асыра пайдаланғаны үшін қамауға алынды. 

Павлодар қаласының мамандандырылған тергеу соты Болат Бақауовты екі айға қамауға алу туралы шешім шығарды. Ол ҚР Қылмыстық Кодексінің 362-бабы 4-бөлігінің 3-тармағы яғни «Өзi немесе басқа адамдар немесе ұйымдар үшін пайда мен артықшылықтар алу не басқа адамдарға немесе ұйымдарға зиян келтiру мақсатында билікті немесе лауазымдық өкілеттіктерді асыра пайдалану» бойынша күдікті деп танылды. Аталған бап бойынша санкция мүлік тәркілеуді, белгілі бір лауазымдарды атқару немесе белгілі бір қызметпен айналысу құқығынан өмір бойына айыра отырып, 5 жылдан 10 жылға дейінгі мерзімге бас бостандығынан айыру жазасын көздейді. 

Болат Бақауов – Павлодар облысының қызметтен түсіп, қамауға алынған үшінші әкімі. Бұған дейін саяси көзқарасы үшін Ғалымжан Жақиянов және жемқорлық үшін Ерлан Арын қызметінен кеткен болатын.  

Фархат Әміренов

Павлодар футболындағы тоқырау

Екінші лигада ойнайтын «Ақсу» таратылып, Бірінші лигадағы «Екібастұздың» басына бұлт үйірілді.  

18 Наурыз 2020 17:55 1824

«Ақсудың» ғұмыры қысқа болды

Осыдан екі жыл бұрын Қазақстан футболында «Ақсу» атты жаңа кәсіби клуб пайда болған еді. Еліміздің Екінші лигасында өнер көрсеткен команда, биыл біржола тарап тынды. Осылайша, Ақсу қаласының футболшылары маусым басталар сәтте жұмыссыз қалды.

Бір қызығы, команда осы күнге дейін толық құраммен жаттығып, жаңа маусымға дайындалды. Қазақстан Кубогы жолындағы жарысқа әне-міне қатысамыз деп отырған тұста, «қаралы хабар» да жетті. «Ақсудың» бапкерлер құрамы мен ойыншылары жағымсыз жаңалықты жарысқа аттанардан бір күн бұрын естіген. Сөйтіп, биылғы чемпионатта үздік бестікке енуді көздеген команданың 25 футболшысы бір-ақ күнде жұмыссыз атанды.

«Осы жылы жақсы құрам жинақталып еді. Клубты не үшін жапқанын білмейміз. Өкінішті, әрине. Клуб директоры қалалық әкімдіктен мән-жайды білуге тырысты. Басшылық жоғары жақтан көмек сұрап көрді. Мәселе шешілген жоқ. Командадағы 25 ойыншы жұмыссыздар қатарына қосылды. Не істерімізді білмейміз», – дейді «Ақсу» футбол клубының капитаны Нұрсұлтан Тасжанов.

«Ақсудың» бас бапкері Виталий Вихляновтың айтуынша, футболшылар – ерекше халық. Ерекшелігі сол олардың қолынан доп тебуден басқа ештеңе келмейді. Такси жүргізушісі немесе даяшы болу – олардың қолы емес.

«Олар өмірін футболға арнаған жандар. Табысы да – осы футбол. Футболшылар ел чемпионатындағы жаңа трансферлік терезе ашылғанға дейін ешқандай клубта ойнай алмайды. Бұл жағдай оларға қиынға соғары анық», – дейді Виталий Вихлянов.

Атап өтерлігі, ақпан айында «Ақсу» ойыншылары жаңа келісімшарттарға қол қойған. Командада бағасы қымбат шетелдік ойыншылар жоқ. Ойыншылардың бәрі жергілікті жастар. Әуелде «Ақсу» клубын ашудағы мақсат та – жергілікті жастарды тәрбиелеу еді. Павлодар облыстық футбол федерациясы «Екібастұз» бен «Ақсу» клубтарын дәл осындай мақсатпен ұстап отырған-ды.

Жоғарыда айтып өткеніміздей, команда жаңа маусымға толыққанды дайындалды. Ел Кубогының іріктеу турниріне қатысу үшін Шымкентке аттануы керек еді. Ақыры билеттерін кері өткізуге мәжбүр болды.

«Қалай болса да, оң шешім күтеміз. Клубтың бюджеті де аса ауқымды емес. Бірақ, Екінші лигаға қатысу жарнасы көбейді. Бюджет көлемі өткен жылмен салыстырғанда өзгерген жоқ», – дейді Виталий Вихлянов.

Команданың не үшін таратылғаны әлі нақты хабарланған жоқ. Ол туралы футболшыларға да, бапкерлерге де айтылмаған. Дегенмен, бірнеше болжам бар. Соның негізгісі – қаржының жоқтығы. «Ақсу» клубын ұстап тұру үшін шамамен 70 млн теңге керек екен.

«Екібастұздың» басына бұлт үйірілді

Қазақстанның Бірінші лигасында ойнайтын «Екібастұз» футбол клубы да тығырыққа тірілді. Бұл клубқа да қаржылық қиындықтар себеп болуда.

«Екібастұз» жаңа маусымға дайындық жұмыстарын Өзбекстан жерінде өткізген болатын. 1-14 наурыз аралығында оқу-жаттығу жиындарын өткізді. Өкінішке қарай, екібастұздықтар өзбектерге 5 млн теңге қарыз болып қалған. Ал клубтың жалпы қарызы – 8 млн теңге. 

«23 футболшы мен бапкерлік құрамдағы 6 адамның тамақтанып, тұрғаны үшін өзбекстандық тарапқа 5 млн теңге төлеуге тиіспіз. Бұл соманы бірнеше күн ішінде өтемесек, ойыншыларды шекарадан өткізбеуі мүмкін», – деп мәлімдеген болатын «Екібастұз» футбол клубының директоры Ғалым Байкен.

Қаржының қайдан табылғаны белгісіз, әйтеуір «Екібастұз» футболшылары елге аман-есен оралды. Ал 16 наурыз күні спортшылар Шымкент қаласындағы Қазақстан Кубогының іріктеу турниріне қатысуы керек-тін. Алайда, елдегі төтенше жағдайға байланысты бұл жарыс кейінге шегерілді. Ал «Екібастұздың» Бірінші лигада ойнау-ойнамауы әлі сұрақ күйінде қалып отыр.

«Екібастұз» футбол клубының тұрақты демеушісі жоқ. Толығымен бюджет есебінен қаржыландырылады. Былтыр команданы ұстап тұру үшін қазынадан 200 млн теңгеге жуық қаражат жұмсалған. Биыл да осы көлемдегі қаржы қажет. Алайда Екібастұз қаласының әкімдігі футболды қаржыландыруға жергілікті бюджеттің мүмкіндігі жоқ екенін айтқан. Клубтың Павлодар облысының билігінен көмек сұраудан басқа амалы жоқ.

«Біздің командадағы 26 ойыншының 19-ы – жергілікті жастар. Легионерлер мүлде жоқ. Тренерлік штабта 6 білікті маман жұмыс істейді. «Екібастұзды» Қазақстанның премьер-лигасында ойнайтын «Ертіс» футбол клубын мықты футболшылармен қамтитын база десек те болады. Мұның барлығы ескерусіз қалмауы керек. Облыс басшылығы қол ұшын созса дейміз. Әйтпесе, Екібастұз футболының тарихы осы жылмен тәмамдалуы мүмкін», – дейді Ғалым Байкен.

«Ертістің» де жағдайы мәз емес

Облыстың бас командасы «Ертістің» де жетісіп тұрғаны шамалы. Бұған дейінгі маусымдарды әупіремдеп жүріп өткізгені жанкүйер қауымға мәлім. Биыл «Ертісті» ұстап тұруға 3,8 млрд теңге қаржы бөлінді. Оның 1,8 млрд теңгесі облыстық қазынадан берілсе, 2 млрд теңгесін клубтың бас демеушісі ERG компаниясы аударған. Жалпы алғанда, «Ертіс» үшін осы соманың өзі жеткілікті. Бірақ осыдан біршама уақыт бұрын ФИФА клубты сотқа берген команданың бұрынғы бас бапкері Димитар Димитровтың пайдасына шешім шығарды. Енді «Ертіс» болгариялық маманға 1,2 млн еуро төлеуі керек. Бұл аздай, Димитар Димитровтың көмекшілері Петер Колев пен Георги Чиликов та «Ертісті» сотқа беріп жеңіп шықты. Команда бұларға да өтемақы төлеуге міндетті. Мұның бәрі «Ертістің» «қалтасына» салмақ салатыны айтпаса да түсінікті.  

Ол аздай, Павлодар облысына Әбілқайыр Сқақовтың тағайындалуымен, клубтың басшылығы да өзгерді. Клубтың спорттық директоры болып атышулы Дмитрий Васильев тағайындалды. Кезінде «Ақтөбе» клубын жерге қаратып, Қазақстан футбол федерациясын қаралаған Васильевтің «Ертіске» келуімен онсыз да проблемасы көп ұжымның іргесі сөгіле бастады. Олай дейтініміз, жуырда «Ертіс» футбол клубының ойыншылары мен әкімшілігі, бапкерлер құрамы мен футбол орталығының жаттықтырушылары Павлодар облысының әкімі Әбілқайыр Сқақовтан көмек сұрап өтініш жазды. Олар кеше ғана келген Дмитрий Васильевтің клубтан кеткенін қалайды.

Бәріне уақыт төреші, әрине. Тек, Павлодар футболы біржола тұралап, тоқырап қалмаса екен дейміз. Бұл – жанкүйер қауымның тілегі.

Фархат Әміренов

«Ұсталған Болат Бақауов емес...»

«Парамен ұсталды» деген оның орынбасары да жұмыста жүр. 

16 Қаңтар 2020 12:36 5323

Кеше кешкісін әлеуметтік желілер мен ақпараттық сайттарда «Павлодар облысының әкімі Болат Бақауов пен оның көмекшісі парамен ұсталды» деген ақпарат тарап, жұртшылық шу ете түсті. Артынша «Әкімді жиналыс жүргізіп отырған жерінен ұстап, қолына кісен салыпты» деген ақпарат шықты. Енді біреулер оның «параны ақшамен емес, алтынмен алғанын» жарыса жазып жатты. Елдің ентігі басылған сәтте «әкім тергеліп жатыр» деген сөз тарады. Ел ішінде алып-қашпа түрлі әңгімелер айтылып, түрлі байламдар жасала бастағандықтан Павлодар облысы әкімінің баспасөз қызметі арнайы мәлімдеме жасады. 

«БАҚ-та, әлеуметтік желілер мен мессенджерлерде «Павлодар облысының әкімі ұсталды, тергеліп жатыр» деген мазмұндағы хабарламалар мен аудиожазбалар таралуда. Дәл қазіргі уақытта аталған ақпаратты растайтын ресми деректер жоқ. Ресми деректер жарияланғанға дейін қандай да бір тұжырым жасаудан аулақ болуға шақырамыз. Біз Сіздерді өзіміздің әлеуметтік желілер арқылы хабардар ететін боламыз», – делінген әкімдіктің хабарламасында. 

Ал түнгі ондар шамасында Болат Бақауов өзінің Instagram желісіндегі жеке парақшасына күндіз өткізген жиналыстар туралы жазба қалдырды. Жазбаның соңы былай аяқталған: «... Осы аптада Павлодар облысының басқа да басқармаларының қатысуымен алқа мәжілісі форматындағы кездесулерді жалғастыратын боламыз». Жазбаны оқыған адам әкімнің жұмысты одан әрі жалғастыратынын аңғартысы келгенін бірден ұғары анық. 

Бір қызығы, осыдан соң «парамен ұсталған Болат Бақауов емес, оның орынбасары Арыстан Қабыкенов екен» деген ақпарат тарады. Әлдекімдердің жазуынша, «тінту жұмыстары дәл осы Қабыкеновтің кабинетінде жүргізілген».

Көпшілік бүгінгі күнді асыға күтті. Алдын ала жасалған хабарламаға сәйкес, бүгін Болат Бақауов екі бірдей басқарманың алқа мәжілісіне қатысуы керек еді. Алайда, екі жиын да кейінге шегеріліпті. 

Көп кешікпей Павлодар облысы әкімінің баспасөз қызметі келесі мәлімдемені хабарлады. 

«Дәл қазіргі уақытта облыс әкімдігінің басшылығы күнделікті режимге сәйкес жұмыс істеуде. Әкім жұмыс орнында жоқ. Дегенмен, ол жұмыс бабы бойынша қала ішінде жүр. Ол таңертең Инвесторлар үйінде жиын өткізуі керек еді. Жұмыс кестесінің тығыздығына байланысты кездесуді оның орынбасары Арыстан Қабыкенов жүргізді», – делінген баспасөз қызметінің мәлімдемесінде. 

Осы хабарламаға сенсек, кеше түнде айтылған әңгімелердің бәрі шындыққа жанаспайтындай. Өйткені, әкім де, оның орынбасары Арыстан Қабыкенов те жұмыста жүр.

Сонда ұсталған кім?

Біз жағдайды назарда ұстайтын боламыз.  

Фархат Әміренов