Бұл туралы Президенттің баспасөз қызметі Twitter-де жазды, деп хабарлайды inbusiness.kz тілшісі.
Алдымен Қасым-Жомарт Тоқаев енді қаңтар оқиғасы сияқты қасіретке жол берілмейтінін айтты.
"Бұдан былай мұндай қасіретке жол бермейміз. Халқымыз бірлігінің арқасында осы сын-қатерге төтеп берді. Қазір алдымызда барлық саланы қайта жаңғырту міндеті тұр. Бұл – мемлекеттік аппаратты ғана жаңарту деген сөз емес", – деді Мемлекет басшысы елордада өтіп жатқан Nur Otan партиясының кезектен тыс съезінде.
Ол елдегі қоғамдық құндылықтар жүйесіне, саяси және әлеуметтік-экономикалық салаларға түбегейлі өзгеріс енгізу керегін жеткізді.
"Осы ретте, азаматтық қоғам институттарына зор міндет жүктеледі. Әсіресе, саяси партиялар айрықша рөл атқарады", – деді Қасым-Жомарт Тоқаев.
Сондай-ақ бүгінде халық арасында тарап жатқан түрлі жағымсыз әңгімелерге тоқталып:
"Осыған байланысты Мемлекет басшысы ретінде тағы да қайталап айтамын. Тұңғыш Президентіміз елімізді іргесі берік мемлекетке айналдыру үшін зор еңбек сіңірді. Біз бұған дейінгі жетістіктерімізден айырылып қалмауымыз керек. Мемлекетімізді нығайтып, кез-келген сынаққа дайын болуымыз қажет. Табысқа жету үшін, ең алдымен, ауызбіршілік керек екенін есте ұстайық", – деді Мемлекет басшысы.
Дәурен Ерболат
