Әлемнің 28-ракеткасы Юлия Путинцева екінші айналымда дүниежүзілік рейтингте 67-орында тұрған бельгиялық Элисон Ван Эйтванкпен шеберлік байқасты. Қарсыластар бұған дейін үш мәрте кездесіп, бәрінде де Юлия жеңіске жеткен болатын. Бірінші партияда есеп 3:3 болған мезетте қазақстандық теннисші брейк жасай алды. Содан кейін сетке доп бергенде, қателескен жоқ – 6:4. Есесіне екінші сетте бельгиялық спортшы брейкпен алға шықты – 2:0. Тағы бір брейк – 4:0. Ақыры ол сол басымдылығын сақтап қалды – 6:1. Үшінші, шешуші партияда қазақстандық теннисші брейкпен алға кетті – 3:1. Ақыры ол матчты тағы бір брейкпен түйіндеді – 6:2. Тартысты бәсеке 1 сағат 55 минутқа созылды.
Путинцева үшінші айналымда әлемнің 5-ракеткасы, украиналық Элина Свитолина немесе рейтингте 48-сатыдағы АҚШ-тың жас жұлдызы, 16 жастағы Кори Гауффтың біреуімен кортқа шығады.
Сонымен қатар еліміздің бірінші ракеткасы Елена Рыбакина да осы турнирге қатысқан болатын. Бірақ Екінші айналымда ол әлемдік рейтингте 46-орында тұрған француз Фиона Ферродан жеңіліп қалды - 4: 6, 4: 6. Матч 1 сағат 36 минутқа созылды. Бұл Рыбакина мен Ферро арасындағы үшінші кездесу болды. Былтыр Санкт-Петербургтегі турнирде Рыбакина айқын жеңіске жетті - 6: 3, 6: 4. Бірақ соңғы кездесуде Фиона басым түсті. Екі теннисші арасындағы кездесу 2020 жылдың қазанында Ролан Гарроста өтті және Ферро үш сетте жеңіске жетті - 6: 3, 4: 6, 6: 2.
Келесі раундта Ферро Ига Швентек (Польша) - Камила Джорджи (Италия) жұбының жеңімпазына қарсы кортқа шығады.
Мельбурнде өнер көрсеткен тениисшілердің бірі Александр Бублик болатын. Қазақстандық екінші турда сербиялық Душан Лайовичке (23) төрт сетте 4: 6, 6: 7, 6: 4, 3: 6 ұтылып, жарысты аяқтады. Матч 3 сағат 5 минутқа созылды. Енді Лайович үшінші айналымда финляндиялық Эмиль Руусувуориді (1: 6, 6: 3, 6: 2, 7: 6) жеңген испандық Педро Мартинеспен кездеседі.
Ермұхамед Мәулен
