Путинцева Истборн турнирінің үшінші кезеңіне шықты

1395

Қазақстандық теннисшілер Англияның Истборн қаласында өтіп жатқан WTA 500 және АТР 250 теннис турниріне қатысуда.

Путинцева Истборн турнирінің үшінші кезеңіне шықты

Әлемнің 33-ракеткасы Юлия Путинцева Истборн WTA 500 турнирінің үшінші айналымына шықты. Бұл туралы ҚТФ баспасөз қызметі хабарлады.

Жарысты екінші айналымнан бастаған Путинцева әлемнің 40-ракеткасы, испаниялық Сара Соррибес-Тормомен шеберлік байқасты. Тартысты өткен бірінші партияда Юлия таразы басын өзіне аудара білді – 7:5. Екінші сетте Юлия 4:0 есебімен алға кетті. Ақыры матчты жеңіспен түйіндеді – 6:1. Сағат жарымнан астам уақытқа созылған бәсеке барысында қазақстандық спортшы 1 эйс жасап, 9 брейк-пойнттың алтауын пайдалана білді. Путинцева ширек финалға шығу үшін әлемнің 5-ракеткасы, грекиялық Мария Саккари немесе дүниежүзілік рейтингте 36-орында тұрған украиналық Ангелина Калининаның біреуімен таласады.

Қазақстанның бірінші, әлемнің 39-ракеткасы Александр Бублик Истборн АТР 250 турнирінің екінші айналымына шықты. Қазақстандық теннисші алғашқы бәсекесін әлемнің 28-ракеткасы, америкалық Фрэнсис Тиафомен өткізді. Осыған дейін қарсыластар бір-ақ рет кездесіп, онда америкалық спортшының мерейі үстем болған еді. Бұл жолы бірінші партияда Ф.Тиафо басымдылық танытты – 7:5. Екінші сетте Александр тай-брейкте сәтті өнер көрсетті – 7:6 (7:4). Ал үшінші, шешуші парияда қарсыласына бірде-бір гейм берген жоқ – 6:0. Бір сағат 50 минутқа созылған матч барысында қазақстандық теннисші 17 эйс жасап, 12 брейк-пойнттың бесеуін мүлт жіберген жоқ. Қарсыласы 2 эйс, 3 брейктен (6 брейк-пойнт) аса алмады. Бублик екінші айналымда әлемнің 86-ракеткасы, Astana Open 2020 жарысының чемпионы, аустралиялық Джон Миллманмен шеберлік байқасады.

Ал Әлемнің 21-ші ракеткасы Елена Рыбакина Истборнда WTA 500 турнирінің екінші айналымында WTA рейтингінің 114-ші сатысында тұрған украиналық Леся Цуренкодан 6:1, 5:7, 3:6 есебімен жеңіліп қалды., Англия. Матч 2 сағат 16 минутқа созылды. Осы уақыт ішінде 23 жастағы Елена тоғыз эйс және үш брейк жасап, допты ойынға қосу кезінде сегіз рет қателесті. Бұл теннисшілердің алғашқы кездесуі болды.

Ермұхамед Мәулен

Telegram
БІЗДІҢ ТЕЛЕГРАМ АРНАМЫЗҒА ҚОСЫЛЫҢЫЗ Ең соңғы жаңалықтар осында
Жазылу