Бүгінде елімізде 50-ден астам серіктестік негізіндегі автокөлік жанармай құю станциясы жұмыс істеп тұр, алдағы уақытта тағы да жаңа нүктелер ашу жоспарланған, деп хабарлайды inbusiness.kz сайты.
Компания өз тарапынан жанармаймен қамтамасыз етіп, технологиялық шешім мен құқықтық қолдау көрсетеді. Ал кәсіпкерлер станцияларды салуға инвестиция құяды.
DODO бағдарламасы 2021 жылдан бері жұмыс істеп келеді. Бұл кәсіпкерлерге танымал бренд аясында өз жанармай құю станциясын ашуға мүмкіндік сыйлайды. Мысалы, Талдықорған қаласындағы Qazaq Oil серіктес компаниясының өңірлік директоры Айгүл Өтетілеуова франшизаға дейін жанармай бекеттерін өз бетінше сатып алған. Ал Qazaq Oil-мен әріптестік жаңа даму кезеңіне жол ашып отыр.
– Qazaq Oil-мен серіктестіктің арқасында бизнесіміз белсенді дами бастады. Алматы облысында – екі, Жетісу облысында – үш, Батыс және Оңтүстік Қазақстанда бір-бір АЖС жұмыс істеп тұр. Компания бағдарламалық қамтамасыз ету мен заңгерлік мәселелерде толық қолдау көрсетеді, – деп қуанышын білдірді ол.
Qazaq Oil-дің Талдықорғандағы мұнай өнімдерін сату секторының бас менеджері Рахат Әлімханұлының сөзінше, қазіргі уақытта шалғай өңірлер де франшизаға қызығушылық танытып келеді.
– Станция серіктестің қаржысына салынды, ал жанармайды компания жеткізеді. Құрылысы тоғыз айға жетпей аяқталды. Қазіргі уақытта бұл – заманауи стандарттарға сай сапалы АЖС. Жалпы, Алматы облысының өзінде Qazaq Oil-мен жұмыс істеуге дайын 10 серіктес бар, – деді ол.
Франчайзинг аясында Qazaq Oil серіктестеріне бренд, сапа стандарттары, технологиялық регламенттер, жанармай мен басқа да тауарларды жеткізу кепілдігін ұсынады. Кәсіпкерлерден құрылысқа инвестиция салу, кей жағдайларда жер телімінің болуы талап етіледі. Компания сарапшылары болашақ нүктенің орналасуын зерттеп, тәуекелдер мен рентабельділікті бағалайды. Осыдан кейін қаржылық модель әзірленіп, әріптестік жөнінде шешім қабылданады.
Осы уақытта Qazaq Oil брендімен еліміз бойынша 370-тен астам АЖС жұмыс істейді. Франшиза негізіндегі станциялар халықаралық талаптарға сай жабдықталған. Оның ішінде Q-cafe кафелері, супермаркеттер, кең автотұрақтар мен душ кабиналары да қарастырылған.
Qazaq Oil франшизалық желіні ұлғайту арқылы аймақтардағы инфрақұрылымның дамуына және жаңа жұмыс орындарының көптеп ашылуына мұрындық болуда. Сарапшылардың болжамынша, DODO бағдарламасы еліміздің түрлі өңіріне таралып, кеңеюін әлі де жалғастыра түседі.
