Ресей Сыртқы істер министрлігінің ресми өкілі Мария Захарова Ұлыбританияға ескерту жасады. Оның айтуынша, Украина Ресей аумағына британдық қаруды қолданып шабуыл жасаса, Мәскеу Ұлыбританияның Украинадағы және одан тыс жерлердегі кез келген әскери нысаны мен техникасына соққы беруі мүмкін, деп хабарлайды inbusiness.kz сайты BILD-ке сілтеме жасап.
"Украинаның Ресей аумағына британдық қаруды қолданып жасаған соққыларына жауап ретінде Украина аумағындағы және одан тыс жерлердегі Ұлыбританияның кез келген әскери нысаны мен техникасына соққы жасалуы мүмкін екенін бірнеше рет ескерттік", – деді Ресей СІМ өкілі.
Захарова мұндай жағдайда "апатты салдар" болуы мүмкін екенін айтып, Ұлыбритания үкіметін Мәскеуге қатысты "дұшпандық және агрессивті" саясаттан бас тартуға шақырды. Британдық БАҚ-тың жазуынша, Лондон Киевке Storm Shadow қанатты зымырандарын өндіру технологияларына қол жеткізу мүмкіндігін беруді жоспарлап отыр. Бұл Украинаға болашақта аталған зымырандарды өз аумағында өндіруге мүмкіндік беруі мүмкін.
The Telegraph басылымының мәліметінше, бірнеше күн бұрын Ұлыбритания премьер-министрі Энди Бёрнэм Киевке сапары кезінде Storm Shadow зымырандары туралы айтқан.
Мәскеуден Ұлыбританияға қатысты мұндай ескерту алғаш рет жасалып отырған жоқ. Тамыз айының ортасында украиналық әскер Ресей аумағына жасалған шабуылдарда британдық өндірістегі дрондарды қолданды деген ақпараттан кейін Ресейдің Лондондағы елшілігі де "салдары болатынын" мәлімдеген еді.
Ұлыбритания Қорғаныс министрлігінің өкілі елдің Украинаға қатысты ұстанымы өзгермейтінін айтты.
